ខេត្តកំពង់ស្ពឺ៖ រឿងអយុត្តិធម៌នៅតែបន្តកើតមាននៅក្នុងខេត្តកំពង់ស្ពឺ ខណៈប្រជាពលរដ្ឋចំនួន៤គ្រួសារ បានចេញមកស្រែកដង្ហោយរកយុត្តិធម៌ និងដំណោះស្រាយ បន្ទាប់ពីពួកគាត់បានសម្រេចចិត្តលក់ដីរបស់ខ្លួនទៅឱ្យអ្នកគួកជេរ (មេខ្យល់ដីធ្លី) ដើម្បីរៀបចំប្រគល់បន្តទៅឱ្យក្រុមហ៊ុនចិនសាងសង់រោងចក្រ ប្រមាណជាង២ឆ្នាំកន្លងទៅហើយ រហូតមកដល់ពេលនេះមិនទាន់បានលុយគ្រប់ចំនួននោះទេ បើទោះបីជាអាជ្ញាធរនិងជំនាញពាក់ព័ន្ធធ្វើការសម្របសម្រួលម្តងជាពីរដងហើយក្តី។
ជួបជាមួយអ្នកសារព័ត៌មានយើង អ្នកស្រី ឡុង សុខឡាង អាយុ៦១ឆ្នាំមុខរបរកសិករ ឈ្មោះ ឃុន សុខស៊ីណា ភេទស្រី អាយុ៤០ឆ្នាំមុខរបរកសិករ ឈ្មោះ ឃុន ពន្លក ភេទស្រី អាយុ៣៨ឆ្នាំ មុខរបរកសិករ និងឈ្មោះ ឃុន សំណាង ភេទស្រី អាយុ៣៤ឆ្នាំ មុខរបរកសិករ ទាំង៤នាក់ រស់នៅក្នុងភូមិស្រង់ ឃុំស្រង់ ស្រុកគងពិសី ខេត្តកំពង់ស្ពឺ បានរៀបរាប់ថា ពួកគាត់បានសម្រេចចិត្តឱ្យ ប្តី និង ឪពុក ឈ្មោះ ឃុន សុភាព អាយុ៦៦ឆ្នាំ លក់ដីទំហំជាង២ហិកតា ស្ថិតនៅក្នុងភូមិស្រង់ ឃុំស្រង់ ស្រុកគងពិសី ខេត្តកំពង់ស្ពឺ ឱ្យទៅឈ្មោះ ហ៊ុន សារឿន ភេទប្រុស អាយុ៥៣ឆ្នាំ ជាអ្នករៀបចំដីធ្លី និងគួកជេ ដើម្បីលក់បន្តទៅឱ្យក្រុមហ៊ុនចិនមួយ ធ្វើជារោងចក្រ តាំងពីអំឡុងខែកុម្ភៈ ឆ្នាំ២០២៤មកម្ល៉េះ សរុបជាទឹកប្រាក់ប្រមាណជាង៤១ម៉ឺនដុល្លារសហរដ្ឋអាមេរិក។
ប្រជាពលរដ្ឋដដែលបានបន្តទៀតថា ដោយការលក់ដីនោះ ភាគីអ្នកទិញទូទាត់តាមតំណាក់កាលនីមួយៗ បានលុយទើបតែ២៦៣០០០ដុល្លារតែប៉ុណ្ណោះ នៅសល់ទឹកប្រាក់ចំនួន១៥៣៨៣២ដុល្លារទៀតទើបគ្រប់ចំនួន ប៉ុន្តែភាគីអ្នកទិញគេចវេសមិនព្រមប្រគល់លុយឱ្យមកពួកគាត់គ្រប់ចំនួនឡើយ។
ប្រជាពលរដ្ឋបានបន្ថែមទៀតថា កន្លងទៅអាជ្ញាធរនិងជំនាញសុរិយោដីខេត្តបានហៅពួកគាត់ទៅធ្វើការដោះស្រាយម្តង ជាពីរដងមកហើយ ប៉ុន្តែមិនមានលទ្ធផលទាល់តែសោះ។ ទើបពួកគាត់ជាប្រជាពលរដ្ឋម្ចាស់ដី ទទូចធ្វើការស្នើសុំដល់ អ្នកទិញដីធ្លីពីពួកគាត់ ប្រគល់លុយមកឱ្យពួកគាត់គ្រប់ចំនួនតាមកិច្ចសន្យាផង។ ជាពិសេសធ្វើការសំណូមពរដល់អាជ្ញាធរនិងជំនាញពាក់ព័ន្ធ ពិសេសមន្ទីររៀបចំដែនដីនគរូបនីយកម្មសំណង់ និងសុរិយោដីខេត្តកំពង់ស្ពឺ មេត្តាជួយពន្លឿនដោះស្រាយ ឱ្យពួកគាត់ទទួលបានយុត្តិធម៌ផង។ មិនត្រឹមតែពួកគាត់ចំនួន៤គ្រួសារនេះទេ នៅមានប្រជាពលរដ្ឋផ្សេងទៀត ក៏មិនទាន់ទទួលបានលុយថ្លៃលក់ដីគ្រប់ចំនួនដែរ។
ប្រជាពលរដ្ឋសង្ឃឹមថា អ្នកទិញដី ពីពួកគាត់ អាជ្ញាធរ និងជំនាញពាក់ព័ន្ធនឹងជួយអន្តរាគមន៍ដោះស្រាយ ដល់ពួកគាត់ជាម្ចាស់ដី រងភាពអយុត្តិធម៌ជាង២ឆ្នាំទៅហើយ ដោយក្តីអនុគ្រោះ៕
