ភ្នំពេញ ថ្ងៃទី១៥ ខែវិច្ឆិកា ឆ្នាំ២០២៦–ពីមុនមក ភាសាបារាំងដើរតួជាមធ្យោបាយនៃការយោគយល់គ្នាតាមរយៈវប្បធម៌ និងការអប់រំ។ ប៉ុន្តែនៅថ្ងៃនេះ ភាសាបារាំងបានក្លាយជាកម្លាំងចលករផ្នែកសេដ្ឋកិច្ច ជំរុញការផ្លាស់ប្ដូរពាណិជ្ជកម្ម ផ្សារភ្ជាប់ទីផ្សារឱ្យកាន់តែជិតស្និទ្ធ បង្កើនការយល់ចិត្តគ្នា កសាងភាពជាដៃគូ និងជំរុញកិច្ចសហប្រតិបត្តិការរវាងទ្វីបមួយទៅទ្វីបមួយទៀត។
នេះជាប្រសាសន៍របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងពិធីប្រកាសបើកជាផ្លូវការព្រឹត្តិការណ៍ «ហ្វ្រង់កូតិច ២០២៦» (FrancoTech 2026) នារសៀលថ្ងៃទី១៥ ខែវិច្ឆិកា ឆ្នាំ២០២៦ នៅមជ្ឈមណ្ឌលសន្និបាត និងពិព័រណ៍កោះពេជ្រ រាជធានីភ្នំពេញ ដោយមានការអញ្ជើញចូលរួមពីសមាជិករដ្ឋាភិបាល និងភ្ញៀវកិត្តិយសជាង ១ ៥០០នាក់ មកពីបណ្ដាប្រទេសជាង១០០ ព្រមទាំងមានក្រុមហ៊ុនចូលរួមជាង ១ ០០០ក្រុមហ៊ុនផងដែរ។
ក្នុងឱកាសនោះ សម្ដេចធិបតី ហ៊ុន ម៉ាណែត បានថ្លែងអំណរគុណចំពោះអង្គការអន្តរជាតិហ្វ្រង់កូហ្វូនី (OIF) សម្ព័ន្ធនិយោជកហ្វ្រង់កូហ្វូនី និងដៃគូពាក់ព័ន្ធទាំងអស់ ដែលបានរួមចំណែករៀបចំព្រឹត្តិការណ៍នេះឡើង ហើយមូលបទនៃព្រឹត្តិការណ៍របស់យើងគឺសាមញ្ញប៉ុន្តែមានន័យជ្រាលជ្រៅ នោះគឺសហគមន៍ហ្វ្រង់កូហ្វូនីទាំងមូល គឺជាធ្លុងមួយតែមួយ។ សម្ដេចធិបតីបានលើកឡើងថា យោងតាមរបាយការណ៍របស់អង្គការ OIF ភាសាបារាំងមានអ្នកប្រើប្រាស់ជិត៤០០លាននាក់ និងត្រូវបានចាត់ថ្នាក់ជាភាសាដែលគេនិយាយច្រើនជាងគេទី ៤ នៅលើពិភពលោក។
សម្ដេចធិបតីនាយករដ្ឋមន្រ្ដីបានបញ្ជាក់ថា ទំហំទីផ្សារដ៏ធំនេះ គឺជាឱកាសមាសសម្រាប់សហគ្រិន និងអ្នកវិនិយោគ ហើយកម្ពុជាបានខិតខំរៀបចំ និងអភិវឌ្ឍប្រទេសដោយផ្សារភ្ជាប់ពីមរតកប្រវត្តិសាស្ត្រដ៏រុងរឿងនៃតំបន់អង្គរ ទៅកាន់ការរីកចម្រើននាពេលបច្ចុប្បន្ន ជាពិសេសការសម្រួលដល់វិស័យទេសចរណ៍ និងការទូទាត់ប្រាក់ឱ្យកាន់តែងាយស្រួល។
ជាមួយគ្នានេះ សម្ដេចធិបតីនាយករដ្ឋមន្ត្រីបានបន្ថែមថា ព្រឹត្តិការណ៍ពិព័រណ៍ហ្វ្រង់កូតិច (FrancoTech) គឺជាវេទិកាដ៏ជាក់លាក់មួយសម្រាប់ការចែករំលែកបទពិសោធន៍ ការពារឯករាជ្យភាព គោរពភាពចម្រុះនៃភាសា និងជំរុញកិច្ចសហប្រតិបត្តិការសេដ្ឋកិច្ចរវាងសហគ្រិនជាង ១ ០០០ ក្រុមហ៊ុននៅក្នុងលំហហ្វ្រង់កូហ្វូនី ជាពិសេសការតភ្ជាប់ជាមួយបណ្ដាប្រទេសនៅតំបន់អាស៊ី៕
ប្រភពក្រសួងព័ត៌មាន.





