ខេត្តព្រះវិហារ៖ហ្វូងសត្វដំរីព្រៃ ក្នុងភូមិសាស្ត្រស្រុកចំនួន៣ គឺស្រុកគូលែន, ស្រុកត្បែងមានជ័យ និងស្រុកជាំក្សាន្ត នៃខេត្តព្រះវិហារ បានវាយប្រហារពលរដ្ឋ បណ្តាលឲ្យមានមនុស្សស្លាប់ និងរបួស ទើបអាជ្ញាធរស្រុកទាំង៣ សហការជាមួយមន្ត្រីជំនាញមន្ត្រីបរិស្ថាន ប្រជាពលរដ្ឋ ចុះរុករក និងតាមដានសកម្មភាពបន្លាស់ទីរបស់ហ្វូងដំរីព្រៃយ៉ាងយកចិត្តទុកដាក់។
លោកប៉ែន ជឹង អភិបាលស្រុកគូលែន បានឲ្យដឹងថា ប្រតិបត្តិការនេះកម្លាំងចម្រុះបានសហការគ្នាចុះល្បាតចាប់ពីចំណុចស្ពានតាកឹង រហូតដល់ចំណុចក្រសាំងជ្រុំ លទ្ធផលក្រុមការងារបានប្រទះឃើញហ្វូងដំរីព្រៃចំនួន ៦ក្បាល (មានកូនតូចចំនួន ១ក្បាល) នៅត្រង់ចំណុចក្រសាំងជ្រុំ ស្ថិតក្នុងភូមិគូលែនជើង ឃុំគូលែនជើង ស្រុកគូលែន ខេត្តព្រះវិហារ។
ចំណែកលោកឃិន រស្មី អភិបាលស្រុកត្បែងមានជ័យ បានឲ្យដឹងដែរថា ក្រុមការងារបានចូលរួមរៀបចំធ្វើស្លាកបម្រាមដើម្បីការពារសុខសុវត្ថិភាពជូនបងប្អូនប្រជាកសិករ នៅក្នុងភូមិសាស្ត្រស្រុកត្បែងមានជ័យ ដើម្បីរៀបចំដំឡើងដាក់តាមតំបន់ដំរីឆ្លងកាត់ ឬធ្វើជម្រកនៅកន្លងមក។ក្នុងនោះដែរ លោកក៏បានដឹកជញ្ជូនសម្ភារៈដូចជាប្រេងម៉ាស៊ីន ម្ទេស បុក ព្រមទាំងស្លាកសញ្ញាបម្រាម យកទៅដាក់ពង្រាយនៅតាមតំបន់ដំរីឆ្លងកាត់។
ស្រដៀងគ្នានោះដែរ លោកចិន ខន្តី អភិបាលស្រុកជាំក្សាន្ត ក៏បានឲ្យដឹងដែរថា លោកបានចាត់ឲ្យក្រុមការងាររដ្ឋបាលឃុំយាង សហការជាមួយបរិស្ថាន ចុះតាមដាន និងអប់រំដល់ពលរដ្ឋ បានបុកម្ទេស ខ្ទឹម ដាក់នៅមុខរោង ព្រោះដំរីខ្លាចរបស់ទាំងនោះ។
ជាការឆ្លើយតបនឹងស្ថានភាពនេះ ក្រុមការងារបានចុះផ្សព្វផ្សាយ និងណែនាំដល់ប្រជានេសាទ ព្រមទាំងប្រជាពលរដ្ឋដែលធ្វើស្រែចម្ការក្នុងតំបន់ដែលដំរីរស់នៅ ឱ្យបង្កើនការប្រុងប្រយ័ត្នខ្ពស់ និងចាកចេញពីទីតាំងដែលមានហានិភ័យជាបន្ទាន់ ដើម្បីធានាសុវត្ថិភាពអាយុជីវិត។
យោងតាមការបញ្ជាក់ពីអាជ្ញាធរមូលដ្ឋាន ហ្វូងដំរីទាំង ៦ក្បាលនេះ គឺជាក្រុមដំរីតែមួយ ដែលធ្លាប់បានចូលមករកស៊ីក្នុងស្រុកត្បែងមានជ័យកាលពីខែមុន។ បច្ចុប្បន្ន ក្រុមការងារបានដាក់បណ្តាញតាមដានយ៉ាងយកចិត្តទុកដាក់ជាប្រចាំ។ គិតត្រឹមម៉ោង ៦ល្ងាច ថ្ងៃខែឆ្នាំដដែល ហ្វូងដំរីនេះបានធ្វើដំណើរមកដល់តំបន់ ពាមអារាជ ដោយមានទិសដៅចាកចេញពីទីតាំងក្រសាំងជ្រុំ តាមដងស្ទឹងឆ្ពោះមកប្របស្ទឹងសែន និងបន្តដំណើរចុះក្រោមទៅទិសខាងកើតថែមទៀត៕
