ខេត្តកំពង់ស្ពឺ៖ ថ្ងៃទី១៤ ខែតុលា ឆ្នាំ២០២៦-ឯកឧត្តម យឹម សុខុម ប្រធានក្រុមប្រឹក្សាខេត្ត និង ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ អញ្ជើញជាអធិបតីក្នុងពិធី គោរពព្រះវិញ្ញាណក្ខន្ធ ព្រះករុណាព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ» គម្រប់ខួប ១៤ឆ្នាំ ដែលបានយាងទិវង្គត ពិធីក៏មានការអញ្ជើញចូលរួមពីសំណាក់ ឯកឧត្តម លោកជំទាវ លោកអភិបាលរងខេត្ត លោក លោកស្រី ប្រធានមន្ទីរ-អង្គភាពជុំវិញខេត្ត កងកម្លាំងទាំង៣ ព្រមទាំងមន្ត្រីរាជការយ៉ាងច្រើនកុះករ។
នៅក្នុងឱកាសដ៏ក្រៀមក្រំ និងប្រកបដោយក្តីកតញ្ញូតាធម៌នេះ ថ្នាក់ដឹកនាំ មន្ត្រីរាជការ និងកងកម្លាំងប្រដាប់អាវុធទាំងអស់នៃខេត្តកំពង់ស្ពឺ បានរួមគ្នានមសិការរំលឹកដល់ព្រះមហាករុណាទិគុណដ៏ធំធេង រកអ្វីប្រៀបផ្ទឹមពុំបាន របស់ «ព្រះបរមរតនកោដ្ឋ» ដែលព្រះអង្គបានលះបង់ និងបូជាព្រះកាយពល ព្រះបញ្ញាញាណពេញមួយព្រះជន្មាយុ ដើម្បីបុព្វហេតុជាតិមាតុភូមិ ពិសេសក្នុងការទាមទារឯករាជ្យជាតិជូនកម្ពុជាពីអាណានិគមនិយមបារាំង នាថ្ងៃទី៩ ខែវិច្ឆិកា ឆ្នាំ១៩៥៣ ការការពារបូរណភាពទឹកដី និងការបង្រួបបង្រួមឯកភាពជាតិខ្មែរ។
ទន្ទឹមនឹងនេះ ថ្នាក់ដឹកនាំ មន្ត្រីរាជការ បានធ្វើពិធីស្ងៀមស្ងាត់ ១នាទី ដើម្បីបួងសួងដល់ដួងព្រះវិញ្ញាណក្ខន្ធ ព្រះករុណា ព្រះបាទសម្តេចព្រះ នរោត្តម សីហនុ «ព្រះបរមរតនកោដ្ឋ» សូមបានយាងទៅសោយសុខក្នុងព្រះបរមសុគតិភព កុំបីឃ្លៀងឃ្លាតឡើយ ហើយបានប្តេជ្ញាចិត្តដើរតាមដានព្រះចរណយុគល ក្នុងការថែរក្សាសន្តិភាព អភិវឌ្ឍន៍ប្រទេសជាតិ និងការពារបូរណភាពទឹកដីឱ្យបានគង់វង្សតរៀងទៅ៕
រដ្ឋបាលខេត្តកំពង់ស្ពឺ រៀបចំពិធីគោរពព្រះវិញ្ញាណក្ខន្ធ ព្រះករុណា ព្រះបាទសម្តេចព្រះ នរោត្តម សីហនុ «ព្រះបរមរតនកោដ្ឋ» គម្រប់ខួប ១៤ឆ្នាំ
