ភ្នំពេញ÷ដើម្បីឱ្យការអនុវត្តន៍ច្បាប់ចរាចរណ៍ផ្លូវគោកថ្មី នៅថ្ងៃទី ១ ខែឧសភា ខាងមុខនេះមានប្រសិទ្ធភាពនោះ កងកម្លាំងនគរបាលជាតិប្រមាណជិត ៤ ០០០ នាក់នឹងត្រូវដាក់ពង្រាយជិត ៦០០ ទីតាំង ដោយប្រើប្រាស់មធ្យោបាយ ចំនួន ៣៦៤ គ្រឿង ក្នុងនោះរថយន្ត ៦៦ គ្រឿង និង ម៉ូតូ ២៩៨ គ្រឿង ដើម្បីរង់ចាំឃាត់យានយន្តបើកបរល្មើសច្បាប់ ។
ការដាក់កំហិត និង ការរឹតបន្តឹងច្បាប់ចរាចរណ៍នាពេលនេះ គឺ រដ្ឋាភិបាលមានគោលបំណងតែមួយគត់ ដើម្បីការពារ អាយុជីវិត និង សុវត្តិភាព ជូនប្រជាពលរដ្ឋធ្វើដំណើរនៅលើដងផ្លូវ ដូច្នេះសូមបងប្អូនប្រជាពលរដ្ឋមេត្តាអនុវត្តន៍ច្បាប់ចរាចរណ៍ថ្មីគោកថ្មីនេះ ទាំងអស់គ្នា ។
ដើម្បីអនុវត្តន៍ច្បាប់ចរាចរណ៍ផ្លូវគោកថ្មី ឱ្យមានប្រសិទ្ធភាព ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានចេញសេចក្ដីជូនដំណឹងមួយ កាលពីថ្ងៃទី ២៨ ខែមេសា ឆ្នាំ ២០២០ ផ្ញើជូនសាធារណជនពីការចាប់ផ្តើមអនុវត្តន៍ច្បាប់ចរាចរណ៍ថ្មីនេះ ។
តាមសេចក្ដីជូនដំណឹង ស្តីពីការរឹតបន្តឹង ការអនុវត្តច្បាប់ចរាចរណ៍ផ្លូវគោកថ្មីនេះនឹងអនុវត្តន៍ ចាប់ពីថ្ងៃទី ១ ខែឧសភា ឆ្នាំ២០២០នេះតទៅ ។
ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន បានធ្វើការអំពាវនាវ ឱ្យបងប្អូនប្រជាពលរដ្ឋទាំងអស់ មេត្តាគោរពច្បាប់ទាំងអស់គ្នាដើម្បីការពារអាយុជីវិត ទ្រព្យសម្បត្តិរបស់ខ្លួន និង អ្នកដទៃ ។
ជាមួយគ្នានោះ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន បានសង្កត់ធ្ងន់ថា កម្លាំងនគរបាលចរាចរណ៍ផ្លូវគោក នៅទូទាំងប្រទេសនឹងអនុវត្តច្បាប់ចរាចរណ៍ផ្លូវគោក ប្រកបដោយស្មារតីទទួលខុសត្រូវ តម្លាភាព ស្មើភាព គ្មានការលើកលែង និង មានសីលធម៌ វិជ្ជាជីវៈ ព្រមទាំងឥរិយាបថថ្លៃថ្នូរ ទន់ភ្លន់ និង ម៉ឺងម៉ាត់ ៕
