ភ្នំពេញ៖ នារសៀលថ្ងៃទី៩ ខែកញ្ញា ឆ្នាំ២០២៦នេះ លោកបណ្ឌិត ហោ គន្ធា ប្រធានសមាគមអភិវឌ្ឍន៍វិជ្ជាជីវៈអ្នកសារព័ត៌មានកម្ពុជា បានអញ្ជើញជាអធិបតីក្នុងពិធីជួបសំណេះសំណាល និងពិភាក្សាអំពី «បញ្ហាប្រឈមក្នុងវិស័យព័ត៌មាន»។ ពិធីនេះបានរៀបចំឡើងនៅសាលប្រជុំ ភោជនីយដ្ឋានបាយ័ន កាល់ម៉ែត រាជធានីភ្នំពេញ ដោយមានការចូលរួមពីអនុប្រធានសមាគមអភិវឌ្ឍន៍វិជ្ជាជីវៈអ្នកសារព័ត៌មានកម្ពុជា និងចាងហ្វាងការផ្សាយ ព្រមទាំងអ្នកសារព័ត៌មានសរុបចំនួន ១២៥នាក់ មកពី ៥០អង្គភាពសារព័ត៌មាន។
ថ្លែងក្នុងឱកាសនោះ លោកបណ្ឌិត ហោ គន្ធា បានសម្តែងការកោតសរសើរយ៉ាងខ្លាំងចំពោះអ្នកសារព័ត៌មានទាំងអស់ ដែលតែងតែប្រកាន់ខ្ជាប់នូវក្រមសីលធម៌វិជ្ជាជីវៈក្នុងការបំពេញភារកិច្ច និងបានចូលរួមផ្សព្វផ្សាយព័ត៌មានពិតជូនប្រជាពលរដ្ឋ ដើម្បីរក្សាបាននូវសណ្ដាប់ធ្នាប់ព័ត៌មាន និងភាពអព្យាក្រឹត។ លោកបណ្ឌិតបានសង្កត់ធ្ងន់ថា៖ «ការមិនយកក្រមសីលធម៌វិជ្ជាជីវៈមកអនុវត្ត គឺផ្ទុយពីច្បាប់ និងបង្កឱ្យបាត់បង់ទំនុកចិត្តពីអ្នកអាន ឬអ្នកទទួលព័ត៌មាន»។
លោកបណ្ឌិតបានបន្ថែមទៀតថា ស្ថាប័ន អង្គភាពសារព័ត៌មាន និងអ្នករាយការណ៍ព័ត៌មាន គឺដើរតួនាទីយ៉ាងសំខាន់ក្នុងការធ្វើឱ្យសង្គមមានស្ថេរភាព និងការអភិវឌ្ឍ រមែងអាស្រ័យលើការរាយការណ៍ព័ត៌មានដែលប្រកបដោយការពិត និងតម្លាភាព។
ទន្ទឹមនឹងនេះលោកប្រធាន ក៏បានរំលឹក និងដាស់តឿនដល់បងប្អូនអ្នកសារព័ត៌មានយើងទាំងអស់គ្នា ត្រូវធ្វើការដោយ «សុចរិតភាព ក្រមសីលធម៌ និងការទទួលខុសត្រូវ» ដោយត្រូវផ្សាយតែព័ត៌មានណាដែលពិតប្រាកដ ច្បាស់លាស់ និងមានប្រយោជន៍ដល់សង្គមជាតិទាំងមូល។
ជាទីបញ្ចប់នៃពិធីសំណេះសំណាល សមាគមអភិវឌ្ឍន៍វិជ្ជាជីវៈអ្នកសារព័ត៌មានកម្ពុជា ក៏បានប្រគល់លិខិតសរសើរជូនដល់អ្នកសារព័ត៌មានឆ្នើម ដែលសមាគមបានវាយតម្លៃថាបានអនុវត្តសកម្មភាពល្អ ក្នុងអាជីពព័ត៌មានប្រកបដោយក្រមសីលធម៌ និងវិជ្ជាជីវៈខ្ពស់ផងដែរ។
ស្មារតីនៃជំនួបថ្ងៃនេះ គឺរួមគ្នាដើម្បីគុណភាព វិជ្ជាជីវៈ និងភាពរីកចម្រើននៃសារព័ត៌មានកម្ពុជា! ????????
#វិស័យសារព័ត៌មានកម្ពុជា #សមាគមអភិវឌ្ឍន៍វិជ្ជាជីវៈអ្នកសារព័ត៌មានកម្ពុជា #ក្រសួងព័ត៌មាន #ក្រមសីលធម៌វិជ្ជាជីវៈ #និងធម្មនុញ្ញវិជ្ជាជីវៈសារព័ត៌មាន
