(កំពង់ស្ពឺ)៖ លោកបណ្ឌិត ហោ គន្ធា ប្រធានអង្គការចីរភាពបរិស្ថានកម្ពុជា កាលពីព្រឹកថ្ងៃទី០២ ខែសីហា ឆ្នាំ២០២៦ បានអញ្ជើញដឹកនាំសមាជិកអង្គការចីរភាពបរិស្ថានកម្ពុជា ចូលរួមដាំកូនឈើចម្រុះចំនួន ២.៥០០ដើម ក្រោមប្រធានបទយុទ្ធនាការ «ពន្លកបៃតង».ក្រោមអធិបតីភាពឯកឧត្តម ង៉ូវ បូរីណា រដ្ឋលេខាធិការ និងជាតំណាងដ៏ខ្ពង់ខ្ពស់របស់ ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ដែលសហការរៀបចំរវាង អង្គការចីរភាពបរិស្ថានកម្ពុជា និងវត្ដអង្គក្រឡាញ់ ស្ថិតក្នុងបរិវេណវត្តអង្គក្រឡាញ់ ភូមិសាលាគ្រួស ឃុំព្រះនិពាន្វ ស្រុកគងពិសី ខេត្តកំពង់ស្ពឺ។ក្នុងពិធីដាំកូនឈើចម្រុះនោះដែរក៏មានការអញ្ជើញចូលរួមពីសំណាក់ មន្ទីរបរិស្ថានខេត្តកំពង់ស្ពឺ គណ:អភិបាលស្រុកគងពិសី ព្រះសង្ឃ មន្ត្រីរាជការ អាជ្ញាធរដែនដី ប្រជាពលរដ្ឋ លោកគ្រូ អ្នកគ្រូ និងសិស្សានុសិស្សប្រមាណចំនួន ៦៨៣ អង្គ/នាក់។
ថ្លែងក្នុងឱកាសពិធីដាំកូនឈើ ឯកឧត្តម ង៉ូវ បូរីណា បានពាំនាំនូវប្រសាសន៍ផ្តាំផ្ញើសួរសុខទុក្ខពីសំណាក់ ឯកឧត្តមបណ្ឌិតរដ្ឋមន្ត្រី និងបន្ដបានលើកឡើងថា ការដាំកូនឈើនាពេលនេះ មិនត្រឹមតែជួយបង្កើនគម្របបៃតង និងបង្កើតបានជាម្លប់ដ៏ត្រឈឹងត្រឈៃនៅក្នុងទីអារាម ហើយថែមទាំងជាការបណ្តុះស្មារតីស្រឡាញ់ និងរួមគ្នាថែរក្សាការពារបរិស្ថានធម្មជាតិ។ សកម្មភាពនេះ គឺដើរស្របតាមយុទ្ធសាស្ត្រចក្រាវិស័យបរិស្ថាន ក្នុងទិសដៅពង្រីកគម្របព្រៃឈើប្រកបដោយចីរភាព ឆ្លើយតបទៅនឹងការប្រែប្រួលអាកាសធាតុសកល។មុននឹងបញ្ចប់កម្មវិធី គណ:អធិបី ថ្នាក់ដឹកនាំ អង្គការចីរភាពបរិស្ថានកម្ពុជា និងអ្នកចូលរួមទាំងអស់ បានបន្ដដាំកូនឈើចម្រុះចំនួន ២៥០០ដើម លើផ្ទៃដីទំហំប្រមាណជា ៣ហិកតា ប្រកបដោយស្នាមញញឹមគ្រប់ៗគ្នា ៕
