(ភ្នំពេញ)៖ មានសេចក្តីរាយការណ៍ពីប្រជា ពលរដ្ឋថា ទីតាំងហ្គេមបាញ់ត្រីចំនួនបីទីតាំងកំពុងបើកលេងទាំងយប់ទាំងថ្ងៃយ៉ាងអាណាធិបតេយ្យជាយូរឆ្នាំណាស់មកហើយ ពុំដែលឃើញមានអាជ្ញាធរមូលដ្ឋាន ឬ មន្ត្រីជំនាញណាចុះបង្ក្រាបនោះទេ ។
ទីតាំងហ្គេមបាញ់ត្រីទាំងនោះស្ថិតតាមបណ្ដោយផ្លូវលេខ 51 ទល់មុខផ្សាសូរិយ៉ាម៉ល២កន្លែងង និងមួយទីតាំងទៀតនៅផ្លូវលេខ 184 ជិតសាលាព្រះសុីសុវត្ថិ ដែលទីតាំងហ្គេមបាញ់ត្រីខុសច្បាប់ទាំង៣ទីតាំងនេះគឺនៅក្នុងមូលដ្ឋានសង្កាត់ផ្សារថ្មី៣ ខណ្ឌដូនពេញរាជធានីភ្នំពេញ។
គួរបញ្ជាក់ថា ល្បែងស៊ីសងខុសច្បាប់ ត្រូវបានរាជរដ្ឋាភិបាលកម្ពុជា កំណត់ជាចំណុច ដែលត្រូវប្រយុទ្ធប្រឆាំង និងបង្ក្រាបឲ្យខានតែបាននៅក្នុងគោលនយោបាយភូមិ-ឃុំ មានសុវត្ថិភាព ដែលបានដាក់ចេញដោយក្រសួងមហាផ្ទៃ ដើម្បីឲ្យអាជ្ញាធរមូលដ្ឋានពាក់ព័ន្ធ អនុវត្តឲ្យមានប្រសិទ្ធភាពតាមខណ្ឌរបស់ខ្លួន។
យោងតាមមាត្រាប្រាំនៃច្បាប់ស្តីពី ការបង្ក្រាបល្បែងស៊ីសង បានចែងថា អ្នកបើកកន្លែងលេងល្បែងស៊ីសង អ្នកកាន់កាប់ល្បែងស៊ី សង អ្នកចាត់ចែង និងភ្នាក់ងារស៊ីសង ត្រូវប្រឈមការផ្តន្ទាទោសដាក់ពន្ធនាគារពី មួយឆ្នាំទៅប្រាំឆ្នាំ។
មហាជនទូទៅ និង ប្រជាពលរដ្ឋនៅក្បែរទីតាំងហ្គេមបាញ់ត្រីខាងលើរងចាំមើលចំណាត់ការរបស់លោក សុខ ពេញវុធ អភិបាលខណ្ឌដូនពេញ និងលោកវរសេនី យ៍ឯក ទៀង ចាន់សារ អធិការនគរបាលខណ្ឌដូនពេញ តេីនឹងមានវិធានការច្បាប់ចំពោះបនល្បែងស៊ីសង ហ្គេមត្រីមួយនេះបែបណា?
ពលរដ្ឋសង្ឃឹមថា អាជ្ញាធរមូលដ្ឋាន នឹងមិនបណ្តែតបណ្តោយឲ្យទីតាំងល្បែងស៊ីសងនេះ បង្កភាពអសន្តិសុខដល់ប្រជាជនក្នុងរាជធានីភ្នំពេញបន្តទៀតនោះទេ ពីព្រោះកាលណាកើតល្បែងស៊ីសងនៅទីណាទីនោះតែងតែមានចោរកម្មដូចជា ចោរលួច ចោរឆក់ ចោរប្លន់ បងតូច បងធំ នឹងអំពើហឹង្សានៅក្នុងគ្រួសារជាដើម៕
