នារសៀលថ្ងៃពុធ ១៣ រោច ខែ បុស្ស ឆ្នាំ កុរ ឯកស័ក ព.ស ២៥៦៣ ត្រូវនឹងថ្ងៃទី២៣ ខែមករា ឆ្នាំ ២០២០ មន្ទីរអប់រំយុវជន និងកីឡាបានធ្វេីពិធីបិទសន្និបាតបូកសរុបវាយតម្លៃការងារអប់រំយុវជន និងកីឡាខេត្តព្រះសីហនុ ឆ្នាំសិក្សា២០១៨-២០១៩ និងទិសដៅឆ្នាំសិក្សា២០១៩- ២០២០ យុវជននិងកីឡាខេត្តព្រះសីហនុ ក្រោមអធិបតីលោក ម៉ាង ស៊ីណេត អភិបាលរងខេត្តព្រះសីហនុ និងមន្ត្រីអប់រំក្រុង ស្រុក និងលោកគ្រូ អ្នកគ្រូ ។
លោក ម៉ាង ស៊ីណេត អភិបាលរងខេត្តព្រះសីហនុ បានធ្វើការវាយតម្លៃចំពោះការខិតខំបំពេញការងាររបស់មន្ត្រីអប់រំ ឆ្លើយតបទៅនឹងកំណែទម្រង់ស៊ីជម្រៅរបស់រាជរដ្ឋាភិបាលអាណត្តិទី៦ គឺជាព្រឹត្តិការណ៍ដ៏សំខាន់ចាំបាច់សម្រាប់វិស័យអប់រំយុវជន និងកីឡាខេត្តព្រះសីហនុ ទទួលបានបរិមាណ និងគុណភាពស្របតាមទិសដៅរបស់ក្រសួងអប់រំយុវជននិងកីឡាក៏ដូចជារាជរដ្ឋាភិបាល និងគោល ការណ៍របស់ក្រសួងអប់រំប្រកបដោយសមធម៌ និងការអប់រំសម្រាប់ទាំងអស់គ្នា ឆ្លើយតបចំពោះតម្រូវការចាំបាច់របស់ប្រទេសជាតិ រួម ចំណែកសម្រេចនូវគោលដៅអភិវឌ្ឍន៍ សហស្សវត្សរដែលរាជរដ្ឋាភិ បាលកម្ពុជា ក៏ដូចជាពិភពលោកកំពុងយកចិត្តទុកដាក់ និងប្ដេជ្ញាចិត្តអនុវត្តឲ្យបានល្អប្រសើរ ។
លោកអភិបាលរងខេត្តបន្តថា សន្និបាតរយៈពេល ២ថ្ងៃនេះ ទទួលបានបទពិសោធន៍ មតិយោបល់ និងពត៌មានជាក់លាក់ឈានទៅរកការរីកចម្រើនក្នុងការពង្រឹង ពង្រីកវិស័យអប់រំ ជាបរិបទឆ្លើយតប ទៅនឹងសំណូមពរចាំបាច់នៃការអភិ វឌ្ឍសង្គមជាតិ ក្នុងក្របខណ្ឌគោរព និងការពារសិទ្ធិមនុស្សលទ្ធិប្រជាធិបតេយ្យ និងរក្សាស្ថេរភាពសង្គម ។ ការអភិវឌ្ឍកម្មវិធីសិក្សាចាប់ពីថ្នាក់មត្តេយ្យសិក្សា រហូតមធ្យម សិក្សា ដើម្បីធានានូវគុណភាព និងប្រសិទ្ធភាពការងារតាមរយៈការពង្រឹងការងារប្រឡងគ្រប់ប្រភេទការងារបណ្តុះបណ្តាលធនធាន មនុស្ស បង្កើនសមត្ថភាពសិក្សាស្រាវជ្រាវ ការបំពាក់សម្ភារៈឧបទេសដល់ការបង្រៀន និងរៀនដល់គ្រឹះស្ថានសិក្សា ជាការលើកកម្ពស់ និងធានាបាននូវគុណភាពអប់រំពិត ៗ។ សាមគ្គីភាពផ្ទៃក្នុង ដើម្បីលើកស្ទួយវិស័យអប់រំ ក្នុងគោលបំណងសម្រេចបាន “ការអប់រំសម្រាប់ទាំងអស់ គ្នា ទាំងអស់គ្នាសម្រាប់ការអប់រំ ” ។ ឈរលើមូលដ្ឋានសរសរស្តម្ភទាំង៥ គ្រូបង្រៀន, កម្មវិធីសិក្សា, អធិការកិច្ច, រង្វាយតម្លៃសិក្សា, និងឧត្តមសិក្សា ។
លោក ម៉ាង ស៊ីណេត ក៍បានធ្វើការផ្តាំផ្ញើលោកគ្រូ អ្នកគ្រូត្រូវសាមគ្គីគ្នា យកចិត្តទុកដាក់ការងារអប់រំ ជាភារកិច្ចស្នូលរបស់យើងទាំងអស់គ្នា ធ្វើឱ្យវិស័យអប់រំនៅខេត្តព្រះសីហនុ មានការរីកចម្រើនគួរជាទីមោទនភាព ៕
