ភ្នំពេញ៖ នៅថ្ងៃទី១៧-១៩ និងថ្ងៃទី២៧-២៩ មករានេះ រដ្ឋបាលខេត្តកំពង់ស្ពឺ រួមទាំងមន្ត្រី ព្រះសង្ឃ យុវជន នឹងឡើងភ្នំឱរ៉ាល់ដែលខ្ពស់ជាងគេនៅកម្ពុជា។ លោក វ៉ី សំណាង បញ្ជាក់ប្រាប់សារព័ត៌មានថ្មីៗ តាមទូរសព្ទថា ការឡើងភ្នំឱរ៉ាល់នេះ ដើម្បីសិក្សាពីសក្ដានុពលទេសចរណ៍ និងសិក្សាពីការធ្វើកាំជណ្ដើរឡើងភ្នំឱរ៉ាល់ ថាតើមានផលប៉ះពាល់បរិស្ថានឬយ៉ាងណា?
ភ្នំឱរ៉ាល់ មានកម្ពស់១៨១៣ម៉ែត្រ ដែលខ្ពស់ជាងគេនៅកម្ពុជា។ សក្ដានុពលនៅភ្នំឱរ៉ាល់ បានទាក់ចិត្តភ្ញៀវទេសចរជាតិ និងអន្តរជាតិជាច្រើន ធ្វើដំណើរកម្សាន្តនៅទីនោះ។ លោក វ៉ី សំណាង អភិបាលខេត្តកំពង់ស្ពឺ បានបង្ហាញក្ដីសប្បាយរីករាយ នៅពេលភ្ញៀវទេសចរជ្រើសរើសភ្នំឱរ៉ាល់ ជាដំណើរកម្សាន្តបែបផ្សងព្រេង។
បើតាមលោក វ៉ី សំណាង រដ្ឋបាលខេត្តកំពង់ស្ពឺ បានរៀបចំដំណើរផ្សងព្រេងឆ្ពោះទៅភ្នំឱរ៉ាល់នៅថ្ងៃទី១៧-១៩ និងថ្ងៃទី២៧-២៩ មករា ឆ្នាំ២០២០ នេះ ក្នុងគោលដៅសិក្សាពីសក្ដានុពលនៃវិស័យទេសចរណ៍នៅតំបន់ជួរភ្នំឱរ៉ាល់។ ដើម្បីសម្រួលដល់ការធ្វើដំណើរដល់ការឡើងភ្នំ រដ្ឋបាលខេត្តកំពង់ស្ពឺ មានគម្រោងធ្វើកាំជណ្ដើរឡើង ដោយបច្ចុប្បន្នផ្លូវឡើងភ្នំមានការលំបាកដោយត្រូវវែកព្រៃ, តោងថ្មឡើងភ្នំ។
លោក វ៉ី សំណាង លើកឡើងបែបនេះ៖«ខ្ញុំចង់សិក្សាពីសក្ដានុពលវិស័យទេសចរណ៍ ដោយអាជ្ញាធរយើង ត្រូវកៀងគរអ្នកវិនិយោគ ឬសប្បុរសជនដែលមានលទ្ធភាពជួយធ្វើផ្លូវ និងកាំជណ្ដើរ ធ្វើឲ្យមានភាពងាយស្រួលដល់ទេសចរ។ ហើយយើងត្រូវសិក្សាពីសក្ដានុពលទេសចរណ៍សិន និងសិក្សាពីផលប៉ះពាល់នៃបរិស្ថានដែរ ក្រែងលោធ្វើទៅត្រូវកាប់ព្រៃឈើ អញ្ចឹងចប់ហើយ មាននរណាមកលេងទៀត»។
លោក ឈឺន ឆីម អ្នកនាំភ្ញៀវទេសចរឡើងភ្នំឱរ៉ាល់ ប្រាប់សារព័ត៌មានថ្មីៗថា កំណើនភ្ញៀវទេសចរមានការកើនឡើង ដោយឆ្នាំ២០១៨ មានចំនួន ៣៥០០នាក់ និងឆ្នាំ២០១៩ មានចំនួន ៤៥១៥នាក់ ដែលធ្វើឲ្យប្រជាពលរដ្ឋរស់នៅក្បែរជើងភ្នំឪរ៉ាល់ អាចរកចំណូលផ្គង់ផ្គង់ជីវភាពគ្រួសារបានសមរម្យ តាមរយៈការនាំភ្ញៀវឡើងភ្នំ។
បើតាមលោក ឆីម តាមរយៈចំនួនភ្ញៀវទេសចរកើនឡើងនេះ ក៏ធ្វើឲ្យអ្នកនាំភ្ញៀវមានកំណើនផងដែរ ពិសេសពួកគេបញ្ឈប់ការកាប់ព្រៃឈើនៅទីនោះ។ ជាមួយគ្នានេះ លោក ឈឺន ឆីម ក៏បានបេ្តជ្ញាចិត្ត យកចិត្តទុកដាក់ខ្ពស់បំផុតសម្រាប់ភ្ញៀវទេសចរផងដែរ។
សូមបញ្ជាក់ថា ភ្នំឱរ៉ាល់ ស្ថិតនៅស្រុកឱរ៉ាល់ ខេត្តកំពង់ស្ពឺ ដែលមានចម្ងាយប្រមាណ៦០គីឡូម៉ែត្រ ពីទីរួមខេត្តកំពង់ស្ពឺ។ ដើម្បីទៅដល់ភ្នំឱរ៉ាល់ ភ្ញៀវទេសចរត្រូវធ្វើដំណើរតាមគោយន្តពីភូមិស្រែកិន៣ ទៅដល់ជើងភ្នំប្រមាណ ១២គីឡូម៉ែត្រ និងធ្វើដំណើរថ្មើរជើងឡើងពីរដំណាក់ទើបដល់កំពូលភ្នំ៕
