(ចេញផ្សាយនៅថ្ងៃទី១៧ ខែកក្កដា ឆ្នាំ២០២២ ព័ត៌មានកីឡា)
ក្រុមកីឡាការិនីប៉េតង់កម្ពុជា អ៊ុក ស្រីមុំ និងកីឡាការិនី អ៊ុន ស្រីយ៉ា ដណ្តើមបានមេដាយមាសលើវិញ្ញាសា ២នាក់ទល់២នាក់ ក្រោយពីបានយកឈ្នះកីឡាការិនីប៉េតង់បារាំង នៅវគ្គផ្តាច់ព្រ័ត្រ ដោយលទ្ធផល ៧ទល់៥ នៅព្រឹក (ម៉ោងនៅកម្ពុជា) ថ្ងៃ១រោច ខែអាសាឍ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃព្រហស្បតិ៍ ទី១៤ ខែកក្កដា ឆ្នាំ២០២២នេះ នៃការប្រកួតកីឡាពិភពលោក (World Games) ឆ្នាំ២០២២ នៅសហរដ្ឋអាមេរិក។
ប្រភេទកីឡាប៉េតងកម្ពុជា ដែលចូលរួមប្រកួត ២វិញ្ញាសា គឺឈ្នះមេដាយមាសទាំង២វិញ្ញាសា ដោយមេដាយមាសទី១ ដណ្តើមបានដោយកីឡាការិនី អ៊ុក ស្រីមុំ លើវិញ្ញាសាវាយយកពិន្ទុ កាលពីម្សិលមិញ។ ប្រតិភូកីឡាប៊ូល និងប៉េតង់កម្ពុជា បានបញ្ចប់បេសកកម្ម នៃព្រឹត្តិការណ៍កីឡាពិភពលោកនេះ។
កីឡាការិនី អ៊ុក ស្រីមុំ និងកីឡាការិនី អ៊ុន ស្រីយ៉ា ដែលដណ្ដើមបានមេដាយមាស ពីក្រុមកីឡាការិនីបារាំង Nadege BAUSSIAN និងCaroline Marie BOURRIAUD ក្នុងវិញ្ញាសា ២នាក់ទល់២នាក់ នៅវគ្គផ្តាច់ព្រ័ត្រ ហើយនេះក៏ជាមេដាយមាសទី២ ដែលជាប្រវត្តិសាស្ត្រ នៃការចូលរួមជាលើកដំបូងរបស់ប្រភេទកីឡាប៉េតង់កម្ពុជា ក្នុងព្រឹត្តិការណ៍កីឡាពិភពលោក ដែលប្រារព្ធធ្វើឡើងរៀងរាល់ ៤ឆ្នាំម្តង។
លើវិញ្ញាសា២ទល់២នេះ មានប្រទេសចូលរួមចំនួន៨ ដោយចែកចេញជា២ពូល ដោយកម្ពុជាស្ថិតនៅក្នុងពូល ជាមួយកាណាដា,បារាំង, ដាណឺម៉ាក។ រីឯពូល១ទៀត រួមមាន អាល្លឺម៉ង់, បែលហ្ស៊ិក, ថៃ, និងម្ចាស់ផ្ទះ អាម៉េរិក។ សម្រាប់លទ្ធផលនៃការប្រកួតនៅជុំទី១ ទី២ និងទី៣ កម្ពុជាបានឈ្នះដាណឺម៉ាក ក្នុងលទ្ធផល ១៣ទល់៥, ជុំទី២ កម្ពុជាចាញ់បារំាង ៧ទល់៩, និងជុំទី៣ កម្ពុជាឈ្នះដាណឺម៉ាក ១៣ទល់៤។ សម្រាប់លទ្ធផលវគ្គពាក់កណ្តាលវគ្គពាក់កណ្តាលផ្តាច់ព្រ័ត្រ កម្ពុជាបានយកឈ្នះថៃ ១២ទល់១០។ នៅក្នុងការប្រកួតចុងក្រោយ វគ្គផ្តាច់ព្រ័ត្រ កម្ពុជាបានយកឈ្នះបារាំង ដោយលទ្ធផល ៧ទល់៥ ហើយដណ្តើមបានមេដាយមាសទី២ ជូនជាតិតែម្តង។ ចំពោះបារំាងដណ្តើមបានត្រឹមមេដាយប្រាក់ ក្រោយចាញ់កម្ពុជា ខណៈមេដាយសំរឹទ្ធិបានទៅថៃ ក្រោយយកឈ្នះអាល្លឺម៉ង់ ១៣ទល់០។
បើតាមការបញ្ជាក់ពីកញ្ញា គិន សំណាង អគ្គលេខាធិការរងសហព័ន្ធកីឡាប៊ូល និងប៉េតង់កម្ពុជា ដែលកំពុងដឹកនាំប្រតិភូកីឡាប៉េតង់កម្ពុជា ចូលរួមប្រកួតកីឡាពិភពលោក នៅសហរដ្ឋអាមេរិកបានឱ្យដឹងថា ដោយមានជាង១០០ប្រទេសចូលរួមនិងមាន៣៤ប្រភេទកីឡាខណៈកម្ពុជាបានបញ្ជូន១ប្រភេទកីឡាប៉េតង់កម្ពុជាចូលរួម (កីឡាការិនី២នាក់ លេង២វិញ្ញាសា) ។ នេះជាការចូលរួមជាលើកដំបូងរបស់កម្ពុជា ហើយក៏ជាលើកដំបូងរបស់ប្រភេទកីឡាប៉េតង់កម្ពុជាផងដែរ ហើយកម្ពុជាបានកសាងកំណត់ត្រាជាប្រវត្តិសាស្ត្រថ្មីមួយ នៅក្នុងការប្រកួតកីឡាពិភពលោក ដែលប្រារព្ធធ្វើឡើងរៀងរាល់ ៤ឆ្នាំម្តង។ ប្រតិភូកីឡាប៉េតង់កម្ពុជាបានបញ្ច ប់បេសកកម្មរបស់ខ្លួនហើយ នៅក្នុងព្រឹត្តិការណ៍កីឡាពិភពលោកនេះ ដោយចូលរួមប្រកួត២វិញ្ញាសា ឈ្នះមេដាយមាសទាំងពីរវិញ្ញាសា ដែលជាការកសាងកំណត់ត្រាប្រវត្តិសាស្ត្រថ្មីជូនជាតិ ពីព្រឹត្តិការណ៍កម្រិតពិភពលោកមួយនេះ ៕
