(ភ្នំពេញ)៖ ទីស្ដីការគណៈរដ្ឋមន្ដ្រីនៅថ្ងៃទី១៧ខែតុលាឆ្នាំ២០១៩ ដោយយោងតាមចំណារឯកភាពរបស់សម្ដេចតេជោ ហ៊ុនសែន នាយករដ្ឋមន្ដ្រីនៃកម្ពុជាបានចេញស.ជ.ណថ្មីមួយដោយធ្វើការនិរាករណ៍ស.ជ.ណចាស់ស្ដីពីការដោះដូរទីតាំងដីអគារផ្នែករដ្ឋបាលព្រៃឈើខេត្តកំពង់ស្ពឺដែលមានផ្ទៃដីសរុបចំនួន៣,៤០៨ម៉ែត្រការ៉េ។
កាលពីថ្ងៃទី០៥ខែសីហាឆ្នាំ២០១៩ទីស្ដីការគណៈរដ្ឋមន្ដ្រីបានចេញស.ជ.ណមួយអនុញ្ញាតឲ្យក្រុមហ៊ុនភីអេនឡេនឌីវេឡុបម៉ឺនឯ.កធ្វើការដោះដូរទីតាំងដីអគារផ្នែករដ្ឋបាលព្រៃឈើកំពង់ស្ពឺដែលមានផ្ទៃដីសរុបចំនួន៣,៤០៨ម៉ែត្រការ៉េស្ថិតនៅភូមិពាណិជ្ជកម្មសង្កាត់រកាធំក្រុងច្បារមនខេត្តកំពង់ស្ពឺនិងទីតាំងដីឃ្លាំងដាក់សម្ភារខាងកើតផ្លូវស្ថិតនៅភូមិក្រាំងពលទេពឃុំរកាធំក្រុងច្បារមនខេត្តកំពង់ស្ពឺដែលមានផ្ទៃដីនៅសល់ចំនួន២,៨០១ម៉ែត្រការ៉េ។
ក្នុងស.ជ.ណថ្មីដែលបណ្ដាញព័ត៌មានFresh News ទទួលបាននៅថ្ងៃទី១៨ខែតុលាឆ្នាំ២០១៩នេះដែលចុះហត្ថលេខាដោយលោកហ៉ីងថូរ៉ាក់ស៊ីបានបញ្ជាក់ថារាជរដ្ឋាភិបាលសម្រេចនិរាករណ៍លិខិតលេខ១១១៧សជណ.កធចុះថ្ងៃទី០៥ខែសីហាឆ្នាំ២០១៩របស់ទីស្ដីការគណៈរដ្ឋមន្ដ្រី។
គួរជម្រាបថាទាំងមន្ដ្រីរដ្ឋបាលព្រៃឈើនិងមន្ដ្រីមន្ទីរកសិកម្មបានអំពាវនាវដល់ថ្នាក់ដឹកនាំនិងអង្គភាពប្រឆាំងអំពើពុករលួយបើកការស្រាវជ្រាវដើម្បីឈានទៅដល់ការចាត់វិធានការចំពោះមន្ដ្រីពាក់ព័ន្ធដែលរួមគ្នាផ្ដើមលួចលក់ឬដោះដូរទីតាំងអង្គភាពរបស់រដ្ឋនឹងនាំឲ្យមានការរិះគន់ជាបន្ដបន្ទាប់៕
អានខ្លឹមសារ
លម្អិតនៃស.ជ.ណដែលមាននៅខាងក្រោមនេះ៖
