ខេត្តព្រះសីហនុ ៖ ក្នុងកិច្ចប្រជុំបូកសរុបការងារប្រចាំខែកុម្ភៈឆ្នាំ២០២០ ទិសដៅការងារបន្ត និងសម្រួលភារកិច្ច តែងតាំងមុខតំណែងនគរបាលចំនួន ១៨នាក់ និងបំពាក់ឋានន្តរសក្តិ ចំនួន១៤៨នាក់ ជូនមន្រ្តីនគរបាលជាតិ នៃស្នងការដ្ឋាននគរបាលខេត្តព្រះសីហនុ ដែលមានថ្នាក់អនុសេនីយ៍ឯក ថ្នាក់អនុសេនីយ៍ទោ ថ្នាក់អនុសេនីយ៍ត្រី និងព្រិន្ទបាលឯកផងដែរ នៅស្នងការដ្ឋាននគរបាលខេត្តព្រះសីហនុ កាលពីព្រឹកថ្ងៃទី២៩ ខែកុម្ភៈ ឆ្នាំ២០២០នេះ លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ បានមានប្រសាន៍យ៉ាងមុតមាំថា កងកម្លាំងនគរបាលក្រោមឱវាទទាំងអស់ មិនត្រូវយកតួនាទី ឋានន្តរសក្តិរបស់ខ្លួនយកទៅគៀបសង្កត់ប្រជាពលរដ្ឋក្នុងប្រការណាមួយជាដាច់ខាត ជាពិសេសមន្រ្តីនគរបាលដែលទើបតែងតាំងមុខតំណែងបំពាក់ឋានន្តរសក្តិនាពេលនេះតែម្តង ហើយក្នុងនាមជាកងកម្លាំងនគរបាល ត្រូវតែបំរើការពារសន្តិសុខសុវត្ថិភាពជូនប្រជាពលរដ្ឋ២៤ម៉ោងលើ២៤ម៉ោង ។
មិនតែប៉ុណ្ណោះ លោកឧត្តមសេនីយ៍ស្នងការ បានសង្កត់ធ្ងន់អំពីបញ្ហា រថយន្តធុនធំ និងរថយន្តក្រឡុកស៊ីម៉ង់ត៍មួយចំនួន ដែលបំពាក់ភ្លើងហ្វា ពីមុខ ចំហៀង និងពីក្រោយរថយន្តដែលខុសបច្ចេកទេស ធ្វើឲ្យប៉ះពាល់យ៉ាងខ្លាំងដល់អ្នកធ្វើចរាចរណ៍តាមដងផ្លូវ ព្រោះចាំងភ្នែកអ្នកបើកបរអាចបង្កគ្រោះថ្នាក់ ដូច្នេះលោកស្នងការ បានដាក់បទបញ្ជារអោយស្នងការរងទទួលផែនការងារសណ្តាប់ធ្នាប់ត្រូវរឹតបន្តឹង និងចុះអនុវត្តច្បាប់អោយបានម៉ឺងម៉ាត់បំផុត ពិសេសត្រូវរៀបចំសណ្តាប់ធ្នាប់ការនៃការចតរថយន្ត ម៉ូតូ កង់បី ឬកង់បីឥណ្ឌាផ្សេងៗទៀតផងដែរ ៕
