(ភ្នំពេញ)៖ ក្រសួងធនធានទឹកនិងឧតុនិយម នៅថ្ងៃទទី៣១ ខែមីនា ឆ្នាំ២០២០នេះបានអំពាវនាវ ដល់ប្រជាពលរដ្ឋ មានការប្រុងប្រយ័ត្នចំពោះបាតុភូតផ្គររន្ទះនិងខ្យល់ កន្ត្រាក់ ខណៈ ចាប់ពីថ្ងៃទី២ដល់៧មេសា កម្ពុជានឹងចុះត្រជាក់ដល់២៤អង្សាសេ និងមានភ្លៀងធ្លាក់ផងដែរ។
យោងតាមការចេញផ្សាយរបស់ក្រសួងធនធានទឹកនិងឧតុនិយមនៅថ្ងៃទី៣១ ខែមីនាឆ្នាំ២០២០ នេះស្តីពីស្ថានភាពធាតុអាកាសបានឲ្យដឹងថា តាមរយៈការតាមដានស្ថានភាព អាកាសធាតុជាបន្តសង្កេតឃើញថា កម្ពុជាទទួលឥទ្ធិពលជ្រលងសម្ពាធទាបនៅលើផ្ទៃដីជាមួយនឹងខ្យល់បក់ មកពីសមុទ្រចិនខាងត្បូងនោះបានធ្វើឲ្យ បណ្ដាខេត្តនៅតំបន់វាលទំនាបកណ្ដាល មានសីតុណ្ហភាពអប្បបរមា ២៤ដល់២៧អង្សាសេ។សីតុណ្ហភាពអតិបរមាមានពី៣៤ដល់៣៧អង្សាសេ។
ក្រសួងបានឲ្យដឹងទៀតថា ចាប់ពីថ្ងៃទី២ដល់៦ខែមេសា នៅបណ្ដាលខេត្តនៅតំបន់វាលទំនាបភាគកណ្ដាល និងភាគពាយ័ព្យនឹងអាចមានភ្លៀងនៅ ក្នុងកម្រិតពេលមកយំទៅបង្គួរចំណែក បណ្ដាខេត្តដទៃទៀតនឹងអាចមានភ្លៀងតិច។
ចំណែកបណ្ដាខេត្តនៅខ្ពង់រាបឥសាន្តវិញនិងមានសីតុណ្ហភាព អប្បបរមាមានពី២៤ដល់២៦អង្សាសេ និងសីតុណ្ហភាពអតិបរមាមានពី៣២ដល់៣៤អង្សាសេ ។ ហើយចាប់ពីថ្ងៃទី២ដល់៧មេសា ផ្នែកមួយចំនួននឹងអាចមានភ្លៀងនៅក្នុងកម្រិតខ្សោយទៅមធ្យម។
ដោយឡែកបណ្ដាខេត្តនៅតំបន់មាត់សមុទ្រវិញនិងមានសីតុណ្ហភាពអប្បបរមា ២៥ដល់ ២៧ អង្សាសេ និងសីតុណ្ហភាពអតិបរមាមាន ពី៣៣ ដល់ ៣៥ អង្សាសេ។ ហើយចាប់ពីថ្ងៃទី២ ដល់ថ្ងៃទី៧ ខែមេសានៅក្នុងកម្រិតពីតិចទៅបង្គួរក្នុងនោះផ្នែកមួយចំនួននៃខេត្តកោះកុងនិងអាចមានភ្លៀងធ្លាក់នៅក្នុងកម្រិតពីមធ្យមទៅបង្គួរ។
ក្នុងនោះផងដែរ ក្រសួងធនធានទឹកនិងឧតុនិយមក៏បានអំពាវនាវដល់ប្រជាពលរដ្ឋ មានការប្រុងប្រយ័ត្នចំពោះបាតុភូតផ្គររន្ទះនិងខ្យល់ កន្ត្រាក់ដែលនឹងអាចកើតមានចាប់ពីថ្ងៃទី២ ដល់ថ្ងៃទី៦ ខែមេសាផងដែរ៕
