ប្រទេសឥណ្ឌានឹងអនុញ្ញាតិឲ្យបណ្ដារោងចក្រឧស្សាហកម្មនៅទីជនបទបើកឡើងវិញក្នុងសប្តាហ៍ក្រោយនេះ ជាមួយនឹងការបន្តសកម្មភាពកសិកម្ម ដើម្បីកាត់បន្ថយការលំបាករបស់ប្រជាជនរាប់លាននាក់

(អន្តរជាតិ)៖ តាមទីភ្នាក់សារព័ត៌មាន រ៉យទរ័ បានផ្សាយឲ្យដឹងថា ប្រទេសឥណ្ឌានឹងអនុញ្ញាតិឲ្យបណ្ដារោងចក្រឧស្សាហកម្មនៅទីជនបទបើកឡើងវិញក្នុងសប្តាហ៍ក្រោយនេះ ជាមួយនឹងការបន្តសកម្មភាពកសិកម្ម ដើម្បីកាត់បន្ថយការលំបាករបស់ប្រជាជនរាប់លាននាក់ ដែលរងផលប៉ះពាល់ពីការបិទប្រទេស។

កន្លងមកនេះលោកនាយករដ្ឋមន្ត្រី នេរេនដ្រា ​មូឌី បានសម្រេចបិទប្រទេស ដោយតម្រូវឲ្យប្រជាជនទាំង១៣០០លាននាក់ស្នាក់នៅតែក្នុងផ្ទះជាវិធានការមួយដើម្បីទប់ស្កាត់ការរីករាលដាលនៃជំងឺឆ្លង COVID-19។

កាលពីថ្ងៃពុធម្សិលមិញនេះលោក មូឌី បាននិយាយថាវាដូចជាមានការឈឺចាប់ណាស់សម្រាប់ប្រជាជនក្រីក្រ ដូច្នេះលោកក៏សម្រេច ឲ្យបើកឡើងវិញនូវសកម្មភាពពាណិជ្ជកម្ម និងឧស្សាហកម្មនៅតំបន់ខ្លះដែលប៉ះពាល់តិចតួចដោយសារCOVID-19។

ដោយឡែកប្រទេសប៉ាគីស្ថាន ដែលនៅជាប់ឥណ្ឌាក៏ប្រកាសថានឹងបើកប្រទេសឡើងវិញក្រោយពីបានបិទអស់រយៈពេល២សប្តាហ៍។

ពួកគេមានផែនការបើកសកម្មភាពនៃការសាងសង់នានា បន្ទាប់ពីបើកសកម្មភាពកសិកម្មដើម្បីជួយឲ្យឧស្សាហកម្មនាំចេញដូចជាសម្លៀកបំពាក់ ក៏ត្រូវបានអនុញ្ញាតឡើងវិញដែរ៕