ផ្សាយចេញពី ខេត្តកំពង់ស្ពឺ. នៅថ្ងៃទី១១ ខែមិថុនា ឆ្នាំ២០២៣.
ខេត្តឧត្តរមានជ័យ÷ តើឯណាទៅភូមិ/ឃុំ/មានសុវត្តិភាព បើល្បែងស៊ីប្រមូលផ្ដុំគ្នាលែងស្រែកហូរកញ្ចៀវត្រហឹងអឹងកងយ៉ាងរំពងភូមិ/ឃុំ/ស្រុកហើយនោះ!! សេចក្តីរាយការណ៍ពីរពលរដ្ឋនៅក្នុងភូមិត្រពាំងប្រាសាទ ស្រុកត្រពាំងប្រាសាទ ខេត្តឧត្ដរមានជ័យ បានឲ្យសារព័ត៌យើងដឹងថា មានទីតាំងបើកសង្វៀនបញ្ជល់មាន់ បៀរ និង បាញ់អាប៉ោង ដែលធ្លាប់ត្រូវសមត្ថកិច្ចបង្ក្រាបនាពេលកន្លងមកនោះ ឥឡូវបើកដំណើរការឡើងវិញហើយ។
ប្រជាពលរដ្ឋបានលើកឡើងថា បើគ្មានការបើកដៃពីសំណាក់ អាជ្ញាធរនិងសមត្ថកិច្ចមូលដ្ឋានថ្នាក់ឃុំ/ស្រុក ទេនោះគឺគ្មានអ្នកណាអាចបើកសង្វៀនបញ្ជល់មាន់ បៀរ និង បាញ់អាប៉ោង ក្នុងចម្ការស្វាយនៅភូមិត្រពាំងប្រាសាទ បានទេ។ ជាក់ស្ដែងនាយប៉ុស្តិ៍នគរបាលរដ្ឋបាលឃុំត្រពាំងប្រាសាទ និងលោក អធិការនគរបាលស្រុកត្រពាំងប្រាសាទ ព្រមទាំងអភិបាលស្រុកត្រពាំងប្រាសាទ បណ្ដោយឲ្យល្បែងស៊ីសងខុសច្បាប់កើតឡើងពេញបន្ទុក។
ប្រភពពីពលរដ្ឋបានឲ្យដឹងទៀតថា ទីតាំងល្បែងស៊ីសងក្នុងចម្ការស្វាយនោះ គឺបើកនៅកន្លែងចាស់ដដែលចូលតាមច្រកអង់តែន០១១ ហើយក្នុងមួយថ្ងៃៗមានអ្នកចូលរួមលេងល្បែងយ៉ាងពពាក់ពពូនគ្មានញញើតអ្វីទាំងអស់។ ការបង្ក្រាបពីសំណាក់សមត្ថកិច្ចនាពេលកន្លងមកគ្រាន់តែជារឿងលេងសើចប៉ុណ្ណោះ ព្រោះឥឡូវនេះមេល្បែងស៊ីសងអាចបើកសង្វៀនបញ្ជល់មាន់ បៀរ និង បាញ់អាប៉ោង នៅកន្លែងដដែលវិញយ៉ាងសុខស្រួល។ ប្រការនេះកំពុងតែធ្វើឲ្យពលរដ្ឋព្រួយបារម្ភយ៉ាងខ្លាំងពីបញ្ហាអសន្តិសុខសង្គម ព្រោះល្បែងស៊ីសងកំពុងបង្កឲ្យកើតមានអំពើចោរកម្ម និងបទល្មើសផ្សេងៗគួរឲ្យភ័យខ្លាច ហើយមេល្បែងស៊ីសងប្រមូលលុយបានយ៉ាងច្រើន។
ជុំវិញល្បែងស៊ីសងខាងលើនេះពលរដ្ឋបានគោរពស្នើរសុំដល់លោក ឧត្ដមសេនីយ៍ទោ ហួត សុធី ស្នងការនគរបាលខេត្តឧត្ដរមានជ័យ និង លោក ប៉ែន កុសល្យ អភិបាលខេត្តឧត្ដរមានជ័យ សូមចាត់ កម្លាំងជំនាញក្រោមឱវាទឲ្យចុះមកបង្ក្រាបល្បែងស៊ីសងខុសច្បាប់ក្នុងឃុំត្រពាំងប្រាសាទផង ដើម្បីពង្រឹងសន្តិសុខសង្គម។ ដោយហេតុថាឥឡូវនេះសង្វៀនបញ្ជល់មាន់ បៀរ នឹង បាញ់អាប៉ោង ក្នុងចម្ការស្វាយ នៅភូមិត្រពាំងប្រាសាទ បើកដំណើរការឡើងវិញយ៉ាងពេញបន្ទុក ហើយមន្រ្តីអាជ្ញាធរ និងសមត្ថកិច្ចថ្នាក់ឃុំថ្នាក់ស្រុកបែរជារក្សាភាពស្ងៀមស្ងាត់។ ពលរដ្ឋបានរិះគន់ចំៗថា នាយប៉ុស្តិ៍នគរបាលរដ្ឋបាលឃុំត្រពាំងប្រាសាទ ក៏ដូចជាលោក អធិការនគរបាលស្រុកត្រពាំងប្រាសាទ និងអភិបាលស្រុកត្រពាំងប្រាសាទ ទំនងទទួលលាភសក្ការៈឬ ផលប្រយោជន៍ពីមេល្បែងស៊ីសងហើយមើលទៅ ទើបមិនមានវិធានការបង្ក្រាប។
