ខេត្តកំពង់ស្ពឺ៖ រដ្ឋបាលខេត្តកំពង់ស្ពឺ បានប្រកាសជូនដំណឹងជាសាធារណៈ នៅរសៀលថ្ងៃទី២០ ខែកក្កដា ឆ្នាំ២០២៣នេះ ស្តីពីការផ្អាកជាបណ្តោះអាសន្នចំពោះប្រជាពលរដ្ឋ និងសាធារណៈជនទាំងអស់ ដែលមានបំណងចង់ឡើងកម្សាន្តនៅលើភ្នំខ្នងផ្សារ នៃឧទ្យានជាតិជួរភ្នំក្រវាញកណ្ដាល ស្ថិតក្នុងភូមិតាំងបំពង់ ឃុំតាសាល ស្រុកឱរ៉ាល់ ខេត្តកំពង់ស្ពឺ។
រដ្ឋបាលខេត្តកំពង់ស្ពឺ បានបញ្ជាក់ថា ចាប់ពីថ្ងៃទី២១ ខែកក្កដា រហូតដល់ថ្ងៃទី២៣ ខែកក្កដា ឆ្នាំ២០២៣ មន្ទីរបរិស្ថានខេត្តកំពង់ស្ពឺ និងសហគមន៍តំបន់ការពារធម្មជាតិ ត្រូវផ្អាកការនាំភ្ញៀវឡើងកម្សាន្តនៅលើភ្នំខ្នងផ្សារ និងមិនអនុញ្ញាតឱ្យប្រជាពលរដ្ឋ និងសាធារណៈជនទាំងអស់ ឡើងទៅលេងកម្សាន្តឡើយ។ ការផ្អាកបណ្តោះអាសន្ននេះ ដោយសារតែនៅថ្ងៃទី២៣ ខែកក្កដា ឆ្នាំ២០២៣ គឺជាថ្ងៃបោះឆ្នោតជ្រើសតាំងតំណាងរាស្ត្រអាណត្តិទី៧ ដែលតម្រូវឱ្យប្រជាពលរដ្ឋ និងសាធារណៈជន ត្រូវទៅបោះឆ្នោតបញ្ចេញឆន្ទៈដើម្បីជ្រើសរើសថ្នាក់ដឹកនាំប្រទេស។
ទន្ទឹមនឹងការជូនដំណឹងនេះដែរ រដ្ឋបាលខេត្តក៏បានព្រមានចាត់វិធានការច្បាប់ចំពោះប្រជាពលរដ្ឋ និងសាធារណៈជនទាំងអស់ដែលមិនព្រមអនុវត្តតាមសេចក្តីប្រកាសជូនដំណឹងនេះ៕
