គណបញ្ជាការឯកភាពស្រុកសំរោងទងដឹកនាំមន្ត្រីក្រោមឱវាទចុះសួរសុខទុក្ខមន្ត្រីនគរបាលប៉ុស្តិ មានជំងឺប្រចាំកាយ

ខេត្តកំពង់ស្ពឺ៖ ដោយយោងតាមប្រសាសន៍ដឹកនាំរបស់ឯកឧត្ដម នាយឧត្ដមសេនីយ៍អគ្គស្នងការនគរបាលជាតិ និងក្រោម ការចង្អុលបង្ហាញរបស់លោកឧត្ដមសេនីយ៍ទោ សម សាមួនស្នងការនគរបាលខេត្តកំពង់ស្ពឺ នៅព្រឹក ថ្ងៃទី០៧ ខែកញ្ញា ឆ្នាំ២០២៣នេះ លោក មុត ភន អភិបាលស្រុកសំរោងទង ប្រធានគណបញ្ជាការឯកភាពស្រុកសំរោងទង បានដឹកនាំក្រុមការងាររដ្ឋបាលស្រុក កម្លាំងនគរបាល នៃអធិការដ្ឋាននគរបាលស្រុកសំរោងទង និងរដ្ឋបាលបាលឃុំទំព័រមាស ទៅសួរសុខទុក្ខលោកអនុសេនីយ៍ឯក អ៊ូ សារិន នាយរងប៉ុស្ដិ៍នគរបាលរដ្ឋបាលទំព័រមាស នៅគេហដ្ឋានស្ថិតភូមិពង្រ ឃុំតាំងក្រូច ស្រុកសំរោងទង ដែលមានជំងឺប្រចាំកាយដូចជា ឈឺសន្លាក់ អាស៊ីត ពកដៃ-ជើង និងកាត់ជើងស្ដាំម្ខាង កាលពីថ្ងៃទី១២ ខែសីហា ឆ្នាំ២០២៣ នៅមន្ទីពេទ្យកាលម៉ែត។

នៅក្នុងដំណើរចុះទៅសួរសុខទុក្ខនោះ លោកប្រធានគណបញ្ជាការឯកភាពស្រុក បាននាំយកថវិកានិងគ្រឿងឧបភោគ បរិភោគដូចជា ៖

-រដ្ឋបាលស្រុកសំរោងទង ថវិកាចំនួន១.០០០.០០០៛(មួយលានរៀល) អង្ករ៥០គីឡូ មី១កេស ទឹកត្រី១យួរ ប្រេងឆា១ដប ត្រីខ១យួរ សាប៊ូ២ដុំ និងម៉ាស់២ប្រអស់។
-អធិការដ្ឋាននគរបាលស្រុកសំរោងទង ថវិកា២.០០០.០០០៛(ពីរលានរៀល)។
-រដ្ឋបាលឃុំទំព័រមាស ថវិកា២០០.០០០៛(ពីរសែនរៀល)។

សរុបថវិកា៣.២០០.០០០៛(បីលានពីរសែនរៀល) អង្ករ៥០គីឡូ មី១កេស ទឹកត្រី១យួរ ប្រេងឆា១ដប ត្រីខ១យួរ សាប៊ូ២ដុំ និងម៉ាស់២ប្រអប់ផងដែរ៕