ភ្នំពេញ÷ ឯកឧត្តម នេត្រ ភក្រ្តា រដ្ឋមន្ត្រីក្រសួងព័ត៌មាន គ្រោងផ្តូចផ្ដើមបើកវិទ្យាស្ថានបណ្ដុះបណ្ដាលជាជីវៈផ្នែកអ្នកសារព័ត៌មាននិងទំនាក់ទំនងសាធារណៈដើម្បីជំរុញការអភិវឌ្ឍន៍ធនធានមនុស្សក្នុងវិស័យសារព័ត៌មាន ឲ្យកាន់តែមានសមត្ថភាព ចំណេះដឹង គុណភាព និងភាពសម្បូរបែបថែមទៀត ដើម្បីឆ្លើយតបទៅនឹងតម្រូវការទីផ្សារការងារ ក្នុងបរិបទនៃសង្គមឌីជីថល។
ការថ្លែងរបស់ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ធ្វើឡើងនៅក្នុងពិធីអញ្ជើញជាអធិបតីបិទវគ្គសិក្សា និងប្រគល់វិញ្ញាបនបត្រដល់សិក្ខាកាមជាង ៣៨១នាក់ “ស្តីពីភាពជាអ្នកគ្រប់គ្រង និងដឹកនាំអង្គភាពសារព័ត៌មាន” រៀបចំដោយសមាគមន៍អភិវឌ្ឍន៍វិជ្ជាជីវៈអ្នកសារពត៌មាន ដែលគាំទ្រដោយក្រសួងពត៌មាន និងក្រសួងបរិស្ថាន ធ្វេីនៅរាជបណ្ឌិតសភាកម្ពុជា នៅរសៀលថ្ងៃទី១៧ ខែកញ្ញា ឆ្នាំ២០២៣។
ឯកឧត្តម នេត្រ ភក្ត្រា បានគូសបញ្ជាក់ថា ដើម្បីបណ្តុះបណ្តាលទៅដល់អ្នកសារព័ត៌មាន និងវិស័យទំនាក់ទំនងសាធារណៈ ស្របពេលកម្ពុជាដល់ដំណាក់កាលមួយដែលឆ្ពោះរីកចម្រើនទៅមុខ នៅឆ្នាំ២០៣០ គឺជាប្រទេសមានចំណូលមធ្យមកម្រិតខ្ពស់ និងនៅឆ្នាំ២០៥០ គឺជាប្រទេសដែលមានការអភិវឌ្ឍនោះ គឺកម្រិតនៃចំណះដឹង និងធនធានមនុស្សកម្ពុជាមានការរីកចម្រើន ដូច្នេះប្រព័ន្ធផ្សព្វផ្សាយទាំងអស់ចាំបាច់ត្រូវពង្រឹងការផលិតព័ត៌មានប្រកបដោយគុណភាព ដើម្បីបម្រើឱ្យអ្នកអានរបស់ខ្លួនក្នុងការចូលរួមពង្រឹងគុណភាពធនធានមនុស្សរបស់កម្ពុជា តាមរយៈការផ្តល់ព័ត៌មានពិត រហ័ស និងមានគុណភាព។
លោកបានបន្ថែមថា បើអ្នកសារព័ត៌មានមិនពង្រឹងនោះ គឺគុណភាពទាំងអស់នោះវានឹងបាត់បង់ទៅដោយខ្លួនឯង ដោយសារពលរដ្ឋមានចំណោះដឹងច្រើន ដូច្នេះគាត់នឹងមិនយកវេលារបស់ពួកគាត់ទៅអានអត្ថបទដែលគ្មានន័យខ្លឹមសារនោះទេ ឬក៏ព័ត៌មានដែលមិនមានខ្លឹមសារផ្តល់ជាចំណេះដឹងដល់ពួកគាត់។ ម្យ៉ាងវិញទៀត អត្ថបទខ្លឹមសារព័ត៌មាននោះ វាត្រូវតែឆ្លើយតបទៅនឹងប្រទេសអភិវឌ្ឍន៍ និងមានភាពរីកចម្រើនរបស់ប្រទេសយើង។ ជាមួយគ្នានេះ ការពង្រឹងលើសមត្ថភាពរបស់អ្នកសារព័ត៌មានតាមរយៈការបើកវគ្គបណ្តុះបណ្តាលរបស់សមាគមអភិវឌ្ឍន៍វិជ្ជាជីវៈអ្នកសារព័ត៌មាន ការបំប៉នសមត្ថភាពបន្ថែមដល់អ្នកសារព័ត៌មាន ដើម្បីមានមូលដ្ឋានរឹងមាំក្នុងការផលិតនិងសរសេរអត្ថបទព័ត៌មានដែលមានគុណភាព។
ថ្លែងនៅក្នុងឱកាសនោះ ឯកឧត្តម នេត្រ ភក្ត្រា បានសម្តែងនូវការកោតសរសើរ និងវាយតម្លៃខ្ពស់ចំពោះសមាគមន៍អភិវឌ្ឍន៍វិជ្ជាជីវៈអ្នកសារពត៌មាន ដែលបានរៀបចំវគ្គបណ្តុះបណ្តាលស្តីពី “ភាពជាអ្នកគ្រប់ គ្រង និងដឹកនាំអង្គភាពសារព័ត៌មាន” ដោយឥតគិតថ្លៃ ជូនដល់សិក្ខាកាមដែលអញ្ជើញមកពីតាមបណ្តារាជធានី ខេត្ត ។
ឯកឧត្តម នេត្រ ភក្រ្តា បានមានប្រសាសន៍លើកឡើងបន្ថែមទៀតថា បើយើងនិយាយពីភាពអ្នកដឹកនាំអង្គភាពសារព័ត៌មានគឺសំដៅទៅលើការបាន និពន្ធ និពន្ធរង ការីនិពន្ធ ដែលគ្រប់គ្រងទៅលើអ្នកសារព័ត៌មាន ចំណុចនេះគឺមានសារៈសំខាន់សំខាន់ត្រង់ថា សារព័ត៌មានដែលយើងទទួលបានអាជ្ញាប័ណ្ណពីក្រសួងព័ត៌មាន ដំណើរការដោយអាចរស់បាន តើយើងត្រូវធ្វើម៉េចឱ្យឈ្មោះប្រព័ន្ធផ្សព្វផ្សាយរបស់យើងនឹងរស់នៅបានយូរ នោះគឺសំដៅទៅលើភាពជាអ្នកដឹកនាំនៅក្នុងសារព័ត៌មាន ជាមួយគ្នានោះឯកឧត្តមថ្លែងថា ក្រុមសីលធម៌ក៏ជាចំណុចសំខាន់ដែរ ពីព្រោះបើសិនសារព័ត៌មានយើងមិនមានក្រុមសីលធម៌ការផ្សព្វផ្សាយដែលប្រាសចាកពីការពិតនិងមិនគោរពក្រុមសីលធម៌ ក៏មិនទទួលបាននូវជំនឿទុកចិត្តពីប្រិយមិត្តអ្នកអានរបស់ខ្លួនដែរ។
ឯកឧត្តម នេត្រ ភក្ត្រា ក៏បានផ្តាំផ្ញើដល់សិក្ខាកាមទាំងអស់ ត្រូវយកចំណេះដឹង ដែលទទួលបានពីការចែករំលែករបស់វាគ្មិន ក្នុងវគ្គសិក្សានេះ ទៅអភិវឌ្ឍខ្លួន អភិវឌ្ឍអង្គភាពខ្លួន និងចូលរួមពង្រឹងគុណភាពនិងការផ្សព្វផ្សាយនៅកម្ពុជា ។ ជាងនេះទៅទៀត ឯកឧត្តម នេត្រ ភក្ត្រា ក៏ស្នើឲ្យអ្នកសារព័ត៌មានទាំងអស់ គោរពវិជ្ជាជីវៈរបស់ខ្លួន គោរពសិទ្ធិបុគ្គលឯកជន គោរពច្បាប់រដ្ឋ ពិសេសច្បាប់ស្តីពីរបបសារព័ត៌មាន។
វគ្គសិក្សាស្តីពី “ ភាពជាអ្នកគ្រប់ គ្រង និងដឹកនាំអង្គភាពសារព័ត៌មាន” នេះដែរគឺមានរយៈពេល ២ថ្ងៃពេញ ក្នុង វគ្គបណ្ដុះបណ្តល លោកបណ្ឌិត ហោ គន្ធា ប្រធានសមាគមអភិវឌ្ឍន៏វិជ្ជាជីវៈអ្នកសារព័ត៌មាន បានមានប្រសាសន៍ឡើងថា នេះជាលើកទី៣ ហើយវគ្គបណ្ដុះបណ្ដាល របស់សមាគម(CJDS) តែងតែបានគិតគូរ ដល់បងប្អូនអ្នកសារព័ត៌មាន នូវក្រមសីលធម៌វិជ្ជាជីវៈរបស់ខ្លួន៕
