ខេត្តកំពង់ចាម៖ បច្ចុប្បន្ននេះគេសង្កេតឃើញបទល្មើសនេសាទនៅក្នុងខេត្តកំពង់ចាមមានភាពស្ងប់ស្ងាត់បានតែមួយរយៈពេលខ្លីតែប៉ុណ្ណោះខណៈដែលសម្តេចតេជោ ហ៊ុន សែន អតីតនាយករដ្ឋមន្រ្តីនៃកម្ពុជាមានប្រសាសន៍នៅថ្ងៃទី២៨ ខែវិច្ឆិកា ឆ្នាំ២០២១កន្លង។ ហើយសម្តេចបានចេញបទបញ្ជាយ៉ាងម៉ឺងម៉ាត់មួយ ឱ្យក្រសួងស្ថាប័នពាក់ព័ន្ធ និងអភិបាលខេត្តដែលជាប់បឹងទន្លេសាប ត្រូវធ្វើការទប់ស្កាត់និងឈានដល់ការបង្ក្រាបបទល្មើសនេសាទ។ ប៉ុន្តែមានមេឈ្មួញបទល្មើសនេសាទនៅក្នុងខេត្តកំពង់ចាមម្នាក់ ដែលគេស្គាល់ឈ្មោះ ថៅកែម៉ុក នៅតែគរឃ្លើនប្រឆាំងនិងបទបញ្ជារបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ដោយគេដាក់ការសង្ស័យថា មានមន្ត្រីជំនាញជលផលម្នាក់ជាអ្នកបិទបាំងនឹងកាងនៅពីក្រោយក្នុងការដឹកជញ្ជូនកូនត្រីល្អិតដែលជាបទល្មើសនេសាទនេះផងដែរ។
បើតាមប្រភពពីប្រជាពលរដ្ឋបានបង្ហើបឱ្យ ដឹងថាមានឈ្មួញម្នាក់ឈ្មោះ ថៅកែ ម៉ុក ពិតជាមានឥទ្ធិពលក្នុងការដឹកជញ្ជូនកូនត្រីល្អិតទៅលក់ ដោយឆ្លងកាត់ពីខេត្តមួយទៅខេត្តមួយ បណ្ដាលឱ្យជីវចម្រុះ ជាមច្ឆាជាតិ គ្រប់ប្រភេទត្រូវបានបាត់បង់ រលាយហិនហោច ខ្ទេចខ្ទីអស់ដោយសារពួកឈ្មួញទុច្ចរិតបានលួចឃុបឃិតគ្នាជាមួយនិងមន្ត្រីជំនាញខិលខូចមួយចំនួន ដែលសុីប្រាក់ខែរបស់ប្រជារាស្រ្តហើយថែមទាំងបំផ្លាញជីវចម្រុះជាមច្ឆាជាតិរបស់រដ្ឋទៀតផង។
ប្រជាពលរដ្ឋដដែលបានឲ្យដឹងទៀតថា ថៅកែ ម៉ុក បានធ្វើសកម្មភាពដឹកជញ្ជូនកូនត្រីល្អិតតាមរថយន្តដែលឆ្លងពីខេត្តមួយចូលទៅខេត្តមួយ យកទៅលក់ឲ្យអ្នកចិញ្ចឹមត្រីជាច្រើនស្រុក នៅក្នុងខេត្តចំនួនពីរ គឺខេត្តត្បូងឃ្មុំនិង ខេត្តកំពង់ចាម។ ហើយការដឹកជញ្ជូនបទល្មើសនេសាទនេះទៀតសោធ គឺគ្មានខ្លាចញញើតច្បាប់បន្តិចទាល់តែសោះ! ខណ:ដែលរដូវនេះជារដូវបិទនេសាទទៅហើយ ប៉ុន្តែថៅកែ ម៉ុក នៅតែដឹកជញ្ជូនបានដោយរលូន។ ប្រជាពលរដ្ឋ ចោទជាសំនួរថា តើមានអ្វីនៅពីក្រោយរបស់ថៅកែ ម៉ុក ទើបបានជាជំនាញពាក់ព័ន្ធមិនហ៊ានធ្វើការ បង្ក្រាប បទល្មើសបំផ្លាញធនធានធម្មជាតិ និងបំផ្លាញមច្ឆាជាតិពីសំណាក់ថៅកែ ម៉ុក ម្នាក់នេះ។
ដោយមើលឃើញពីការដឹកជញ្ជូនបទល្មើសនេសាទរបស់ថៅកែ ម៉ុកនេះគ្មានអាជ្ញាធរ សមត្ថកិច្ច ជំនាញណាហ៊ានបង្ក្រាបនោះ ប្រជាពលរដ្ឋដាក់ការសង្ស័យថា ប្រហែលជាត្រូវដងត្រូវផ្លែជាមួយលោក អ៊ុក ណារិន នាយខណ្ឌរដ្ឋបាលជលផលខេត្តកំពង់ចាមហើយមើលទៅទើបមិនហ៊ានបង្ក្រាបសោះនោះ?។
គួររំលឹកផងដែរថា ថៅកែ ម៉ុក ធ្វើការដឹកជញ្ជូនកូនត្រីល្អិតយកទៅលក់ជារៀងរាល់ថ្ងៃតាមរូបភាពនេះជាក់ស្ដែងនៅចំណុចឃុំកៀនជ្រៃ ស្រុកកំពង់សៀម ខេត្តកំពង់ចាម ។
ដូច្នេះដើម្បីរក្សា ប្រសិទ្ធភាព បទបញ្ជារបស់ប្រមុខដឹកនាំ ជុំវិញនឹងបញ្ហា បទល្មើសនេសាទដែលកើតមានយ៉ាងពេញបន្ទុកខាងលើនេះ មហាជនសូមសំណូមពរដល់លោកអភិបាល នៃគណៈអភិបាលខេត្តកំចាម មេត្តាបង្កើតគណៈកម្មការចម្រុះឯករាជដើម្បីចុះបង្រ្កាបនិងទប់ស្កាត់ឱ្យបានទាន់ពេលវេលាផងទាន។
អង្គភាពសារព័ត៌មានយើងរងចាំធ្វើការបកស្រាយ បំភ្លឺពីសារមុីខ្លួនពាក់ព័ន្ធគ្រប់ពេលវេលា នៅរៀងរាល់ម៉ោងធ្វើការជុំវិញបញ្ហាចុះផ្សាយខាងលើនេះ អោយមានសុក្រឹត្យ-និងយុត្តិធម៌តែប៉ុណ្ណោះ ៕
