ខេត្តបន្ទាយមានជ័យ៖ ដីអូរដែលនៅជាប់ប៉ុស្តិ៍ វរ៩១១ ព្រំប្រទល់កម្ពុជា-ថៃ ត្រូវបានអ្នកមានលុយមានអំណាចម្នាក់ កំពុងចាក់ដីលុបនឹងបុកគ្រឹះសាងសង់សំណង់រឹងមាំ យកធ្វើជាកម្មសិទ្ធសង្ស័យគ្មានច្បាប់ទម្លាប់ អាជ្ញាធរ និងជំនាញពាក់ព័ន្ធហាក់គ្មានឆន្ទៈ និងគ្មានវិធានការដើម្បីទប់ស្កាត់សោះឡើយ បើបណ្តែតបណ្តោយតទៅទៀតច្បាស់ជាដីអូរទាំងនោះក្លាយជាដីឯកជនជាក់ជាមិនខានឡើយ។
កន្លងមកសម្តេចប្រមុខថ្នាក់ដឹកនាំធ្លាប់មានប្រសាសន៍ថា ព្រែក អូរ បឹង ស្ទឹង ទន្លេរ សមុទ្រ ជាសម្បត្តិធនធានធម្មជាតិរបស់រដ្ឋមិនអាចមានបុគ្គលណាម្នាក់កាន់កាប់សាងសង់ ឬអាស្រ័យផលបានឡើយ។
ប៉ុន្តែបច្ចុប្បន្នគេបានសង្កេតឃើញ មានករណីចាក់ដីលុបអូរនឹងបុកគ្រឹះសាងសង់សំណង់រឹងធ្វើជាកម្មសិទ្ធិផ្ទាល់ខ្លួនពីមហិច្ចតាអ្នកមានលុយមានអំណាច ក្បែរប៉ុស្តិ៍ការពារព្រំដែនគោក វរៈ៩១១ សង្ស័យគ្មានច្បាប់អនុញ្ញាត បានធ្វើឲ្យមហាជនចាប់អារម្មណ៍ ទៅលើស្ថាប័នពាក់ព័ន្ធ ដែលមិនមានការទប់ស្កាត់ទាល់តែសោះ។
ជាក់ស្តែងកាលពីថ្ងៃទី២១ ខែមករា ឆ្នាំ២០២៤ អង្គភាពសារព័ត៌មានយើងបានទទួលប្រភពព័ត៌មានពីប្រជាពលរដ្ឋក៏ដូចជាមន្ត្រី មិនបានលាភសក្ការៈដូចគេ បានផ្ដល់ព័ត៌មានមកអង្គភាពយើងក្រោយពីទទួលបានព័ត៌មានមួយនេះអង្គភាពសារព័ត៌មានយើងបានចុះទៅដល់ចំណុចដីអូរដែលនៅជាប់ព្រុំប្រទល់កម្ពុជា-ថៃ ស្ថិតនៅភូមិក្បាលស្ពាន១ សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យ កំពុងរងនូវការចាក់ដីលុបអូរ នឹងបុកគ្រឹះសាងសង់សំណង់រឹងមាំពីមហិច្ចតាបុគ្គលអ្នកមានលុយនិងមានឥទ្ធិពលដែលគេសង្ស័យថាមានការឃុបឃិតគ្នា ប្រសិនបើអាជ្ញាមូលដ្ឋាន ជំនាញស្ថាប័នពាក់ព័ន្ធនានា មិនមានវិធានការទប់ស្កាត់ទេច្បាស់ជាដីអូរ ដែលជាសម្បត្តិរបស់រដ្ឋនឹងក្លាយទៅជាដីឯកជនជាក់ជាមិនខានឡើយ។
ជុំវិញការចាក់ដីលុបអូរជាប់ព្រំដែននេះដែលលោក វ៉ាជឹន ណារេត ចៅសង្កាត់អូរជ្រៅ បានឲ្យដឹងថា ការចាក់ដីនៅជាប់មាត់អូរមានច្បាប់មកពីណា ចាំលោកឲ្យកម្លាំងចុះទៅមើល។
ដោយឡែកលោក គាត ហុល អភិបាលក្រុងប៉ោយប៉ែត បានឲ្យដឹងតាមប្រព័ន្ធតេឡេក្រាមថា ចាំលោកឲ្យមន្ត្រីជំនាញរបស់លោកផ្នែកសំណង់ចុះទៅពិនិត្យមើល ក្រោយពីលោកឆ្លើយរួចក៏ប្លុកតេឡេក្រាមអ្នកសារព័ត៌មានចោល។
ចំណែកលោក ងោម៉េង ជ្រួន អភិបាលរងខេត្តបន្ទាយមានជ័យអ្នកសារព័ត៌មានយើងបានទំនាក់ទំនងផ្ញើសារសួរតាមប្រព័ន្ធតេឡេក្រាម លោកចូលមើលតែមិនបានឆ្លើយតប។
ប្រជាពលរដ្ឋ សង្ឃឹមយ៉ាងម៉ុតមាំថា ក្រោយពីសារព័ត៌មានផ្សព្វផ្សាយហើយ អស់លោកអាជ្ញាធរនិងជំនាញពាក់ព័ន្ធ និងមានឆន្ទៈទប់ស្កាត់ការចាក់ដីរំលោភយកដីអូរព្រំដែនកម្ពុជា-ថៃនេះផងដែរ៕
