ព្រះវិហារ៖ ប្រជាពលរដ្ឋនៅភូមិរំដេង ស្នើសុំឱ្យឯកឧត្តម គីម រិទ្ធី អភិបាលខេត្តព្រះវិហារ ជួយ រកដំណោះស្រាយជាមួយក្រុមហ៊ុន ឌែលខម ខេមបូឌា (Delcom Cambodia) ពាក់ព័ន្ធការហាមឃាត់មិនឱ្យប្រជាពលរដ្ឋរុករកជីករ៉ែមាស ស្ថិតនៅភូមិរំដេង តំបន់ភ្នំលុង ឃុំរមទម ស្រុករវៀង ខេត្តព្រះវិហារ ជាលក្ខណៈគ្រួសារលើដីកម្មសិទ្ធរបស់ខ្លួន ។
ការបិទពួកគាត់មិនឱ្យជីករុករករ៉ែមាសជាលក្ខណៈគ្រួសានៅលើដីកម្មសិទ្ធរបស់ពួកគាត់ ប្រជាពលរដ្ឋ បានលើកឡើងថា ក្រុមហ៊ុន ឌែលខម និងកម្លាំងអាជ្ញាធរ បានប្រើគ្រឿងចក្រកាយលុបរណ្ដៅ និងបានហាមឃាត់មិនឱ្យពួកគាត់ជីករុករករ៉ែមាសនៅលើដីកម្មសិទ្ធរបស់ពួកគាត់ ខណៈពួកគាត់ជីករ៉ែមាសលក់យកលុយ ដើម្បីផ្គត់ផ្គង់ជីវភាពក្រុមគ្រួសារពួកគាត់ ពីព្រោះប្រជាជននៅភូមិរំដេងស្ទើរ ១០០ភាគរយ រស់ពឹងផ្អែកលើកការជីកយករ៉ែមាស បានកម្រៃតិចតួចចិញ្ចឹមជីវិតបើក្រុមហ៊ុន និងអាជ្ញាធរបិទមិនឱ្យពួកគាត់រកតើពួកគាត់រស់បានដោយរបៀបណា។
ប្រជាពលរដ្ឋនៅភូមិរំដេង បានលើកឡើងចោទជាសំណួរថា មូលហេតុអ្វី បានជាក្រុមហ៊ុន ឌែលខម ខេមបូឌាក កំពុងប្រកបអាជីវកម្មជីករុករករ៉ែមាស នៅចំណុចនេះដែរ បានប្រើប្រាស់រំសេវបំផ្ទុះថ្ម គ្រឿងចក្រ និងធ្វើអាងគីមី មិនដែលឃើញអាជ្ញាធរស្រុករវៀង-ខេត្ត និងមន្ទីរជំនាញចុះត្រួតពិនិត្យលក្ខណៈបច្ចេកទេសឱ្យបានត្រឹមត្រូវតាមច្បាប់បែរជាមកឃុបឃិតកៀតសង្កត់បិទសិទ្ធពួកគាត់មិនឱ្យធ្វើការរុករករ៉ែមាស លក់យកលុយផ្គត់ផ្គង់ជីវភាពគ្រួសារ ខណៈពួកគាត់ធ្វើនៅលើដីកម្មសិទ្ធរបស់ពួកគាត់ ។
គួរម្លឹកផងដែរថា នៅព្រឹកថ្ងៃទី២ ខែមេសា ឆ្នាំ២០២៤ កម្លាំងចម្រុះដឹកនាំដោយ លោក ស្រេង វុទ្ឋា ព្រះរាជអាជ្ញារងអមសាលាដំបូងខេត្តព្រះវិហារ បានចុះពិនិត្យមើលទីតាំងជីករុករករ៉ែមាសខុសច្បាប់ ចំនួន៤កន្លែងនៅស្រុករវៀង ខេត្តព្រះវិហារ ឈានទៅដល់ការបង្ក្រាប និងកម្ទេចចោល ព្រមរឹបអូសបានសម្ភារៈមួយចំនួនដឹកយកមករក្សាទុក។
សម្រាប់លោក ស៊ុន ចន្ទ័រក្សា ប្រធានមន្ទីររ៉ែ និងថាមពលខេត្តព្រះវិហារ បានលើកឡើងប្រាប់ព័ត៌មានក្នុងស្រុកថា កន្លងមក មន្ទីរជំនាញសហការជាមួយអាជ្ញាធរស្រុករវៀង តែងតែចុះផ្សព្វផ្សាយហាមប្រាមប្រជាពលរដ្ឋ កុំឱ្យនាំគ្នាជីករ៉ែមាសដែលមានរណ្តៅជ្រៅៗ អាចបង្កឱ្យមានគ្រោះថ្នាក់ដល់អាយុជីវិត។ ប្រសិនជាជីកយករ៉ែមាសត្រឹមរណ្តៅរាក់ ឬបាញ់ឈីត អាជ្ញាធរនឹងមន្ទីរជំនាញមិនហាមឃាត់ទេ ពីព្រោះជាឆ្នាំងបាយរបស់ពលរដ្ឋ។ ចំណែកតំណាងក្រុមហ៊ុន ឌែលខម យើងមិនអាចសុំការបកស្រាយបានទេ ដោយសាគ្មានប្រភពទំនាក់ទំនង។
គួរម្លឹកផងដែរ កន្លងមកសកម្មភាពជីកកកាយរុករក និងបូមយករ៉ែមាស កើតមានពេញបន្ទុករបស់នៅស្រុករវៀង និងឈ្មួញជាច្រើននាក់ ពួកគេជីកកកាយរុករក ធ្វើអាជីវកម្មរ៉ែមាសរាប់រយរណ្ដៅដោយខុសច្បាប់ ក្នុងតំបន់ភ្នំលុង ភូមិរំដេង ឃុំរមទម ដោយសង្ស័យថា មានការឃុបឃិតគ្នាជាលក្ខណៈប្រព័ន្ធជាមួយអាជ្ញាធរខេត្ត និងមន្ដ្រីជំនាញ ទើបអាចដំណើរការបានរលូនយ៉ាងដូច្នេះ៕
