ខេត្តកំពង់ស្ពឺ៖ ជនរងគ្រោះនៅក្នុងអំពើហិង្សាដោយចេនា(យកដំបងវាយបណ្តាលឱ្យរងរបួសដេ១០ថ្នេរ) បានដង្ហើយរកយុត្តិធម៌ ខណៈដែលដាក់ពាក្យបណ្តឹងទៅប៉ុស្តិនគរបាលរដ្ឋបាលឃុំតាំងសំរោង បញ្ជូនទៅដល់អធិការដ្ឋាននគរបាលស្រុកភ្នំស្រួច ហើយចុងក្រោយបានដាក់ពាក្យបណ្តឹងទៅមូលដ្ឋានកងរាជអាវុធហត្ថស្រុកភ្នំស្រួច ក៏នៅតែមិនអាចចាប់ជនដៃដល់យកមកផ្តន្ទាទោសតាមផ្លូវច្បាប់ ដោយទុកឱ្យជនដៃដល់ដើរហើរមានសេរីភាពនៅឡើយ។
ជនរងគ្រោះក្នុងអំពើហិង្សាដោយចេនា មានឈ្មោះ ហ៊ុន ចន្ធូ ភេទប្រុស អាយុ៣៦ឆ្នាំ មុខរបរកម្មករដើរស៊ីឈ្នួលគេ រស់នៅក្នុងភូមិថ្មី ឃុំតាំងសំរោង ស្រុកភ្នំស្រួច ខេត្តកំពង់ស្ពឺ បានប្រាប់ឱ្យក្រុមអ្នកសារព័ត៌មានដឹងថា÷ រឿងរ៉ាវរបស់លោកដែលជនដៃដល់ ឈ្មោះ ស៊ុន យកដំបងវាយសន្ធាប់មកលើរូបខ្លួននោះរហូតមកដល់ពេលនេះជិត១ខែកន្លងទៅហើយមិនទាន់ទទួលបានភាពយុត្តិធម៌នោះទេ។ បើទោះបីជារូបគេបានដាក់ពាក្យបណ្តឹងទៅនគរបាល និងកងរាជអាវុធហត្ថស្រុកភ្នំស្រួច បញ្ជូនសំណុំរឿងដល់ខេត្តហើយក្តី ជនដៃដល់ឈ្មោះ ស៊ុន នៅដើរលេងសប្បាយ មានសេរីភាពនៅឡើយ។
ជនរងគ្រោះ ឈ្មោះ ហ៊ុន ចន្ធូ បានបន្តទៀតថា លោកបានដាក់ពាក្យបណ្តឹងទៅនគរបាលប៉ុស្តិឃុំតាំងសំរោងនៅថ្ងៃទី២៤ ខែមេសា ឆ្នាំ២០២៤ គេបញ្ជូនទៅអធិការដ្ឋាននគរបាលស្រុកក៏មិនមានចំណាត់ការទៀត ដោយនគរបាលនិយាយថាទាល់តែតុលាការចេញដីការទើបអាចចាប់ខ្លួនជនដៃដល់ ប៉ុន្តែការទន្ទឹងរង់ចាំពីមួយថ្ងៃទៅមួយថ្ងៃ មិនឃើញដីការតុលាការខេត្តកំពង់ស្ពឺចេញមកឱ្យនគរបាលស្រុកចាប់ខ្លួនជនដៃដល់ឈ្មោះ ស៊ុន សោះ។ ទើបនៅរសៀលថ្ងៃទី៦ ខែឧសភា ឆ្នាំ២០២៤ រូបគេ(ជនរងគ្រោះ)បានសម្រេចចិត្តដាក់ពាក្យបណ្តឹងនៅមូលដ្ឋានកងរាជអាវុធហត្ថស្រុកភ្នំស្រួច ដើម្បីទាមទារឱ្យសមត្ថកិច្ចកងរាជអាវុធហត្ថជួយរកយុត្តិធម៌ និងចាប់ខ្លួនជនដៃដល់ដាក់ទោសទណ្ឌតាមផ្លូវច្បាប់។ ប៉ុន្តែអ្វីៗលើសពីការរំពឹងទុករបស់រូបគេ ដោយមន្ត្រីកងរាជអាវុធហត្ថខេត្តកំពង់ស្ពឺបានទូរស័ព្ទមករូបគាត់ថា ករណីនេះជាអ្នករស់នៅក្នុងភូមិ ឃុំជាមួយគ្នាសម្របសម្រួលគ្នាទៅ ត្រឹមថ្លៃព្យាបាល សម្រាកពេទ្យបញ្ចប់រឿងទៅ។ ជនរងគ្រោះក៏តបវិញថា រឿងសម្របសម្រួលយ៉ាងម៉េចបើជនដៃដល់យកដំបងមកវាយលើរូបគាត់ជាចេនា តែម្តង គាត់មិនដឹងខ្លួនផង មិនបានតបតទៅវិញទៀត។ គាត់មិនព្រមឡើយ ជនរងគ្រោះជឿថា នៅក្នុងប្រទេសកម្ពុជានេះ អស់លោកថ្នាក់លើដែលជាអ្នកចេះច្បាប់ ប្រកាន់ខ្ជាប់នូវភាពយុត្តិធម៌ មានអគ្គស្នងការនគរបាលជាតិ កងរាជអាវុធហត្ថលើផ្ទៃប្រទេស និងក្រសួងយុត្តិធម៌ដែលមាន ឯកឧត្តម កើត រិទ្ធ និងជួយរកយុត្តិធម៌ដល់រូបគាត់បាន។ បើសមត្ថកិច្ចនៅក្នុងស្រុកភ្នំស្រួច និងក្នុងខេត្តកំពង់ស្ពឺ មិនអាចរកយុត្តិធម៌ឱ្យគាត់បាននោះ។
ជនរងគ្រោះបានបន្ថែមថា បច្ចុប្បន្នសុខភាពរបស់លោកមិនទាន់ធូរស្បើយនោះទេ ឧស្សាហ៍ឈឺក្បាល កន្លែងស្នាមរបួសដែលដេរចំនួន១០ថ្នេរនោះ ណាមួយរូបគាត់ជាកសិករ មិនមានលុយកាក់សម្រាប់ទិញថ្នាំលេបបន្តថែមទៀតផង។លោកលើកម្រាមដៃ១០សំណូមពរដល់អស់លោកដែលស្រលាញ់ភាពយុត្តិធម៌និងអាចជួយរកយុត្តិធម៌ដល់រូបលោកក្នុងពេលឆាប់ៗខាងមុខនេះជាក់ជាមិនខានឡើយ។
សូមរំលឹកផងដែរថា កាលពីវេលាម៉ោង១១ព្រឹក ថ្ងៃទី២៤ ខែមេសា ២០២៤ កន្លងទៅមានករណីហិង្សាមួយបានកើតឡើង ដោយជនដៃដល់មានឈ្មោះ ស៊ុន អាយុជិត៤០ឆ្នាំរស់នៅក្នុងភូមិថ្មី ឃុំតាំងសំរោង ស្រុកភ្នំស្រួច ខេត្តកំពង់ស្ពឺ បានយកដំបងវាយទៅលើជនរងគ្រោះបែកក្បាលហូរឈាមជោគជាំ ដែលមានឈ្មោះ ហ៊ុន ចន្ធូ ភេទប្រុស អាយុ៣៦ឆ្នាំ ដែលសម្រាកពីការងាររើសគល់ក្នុងភូមិថ្មី ឃុំតាំងសំរោង ស្រុកភ្នំស្រួចខេត្តកំពង់ស្ពឺ។ ក្រោយកើតហេតុក្រុមគ្រួសារជនរងគ្រោះបានដឹកជនរងគ្រោះទៅសម្រាកព្យាបាលនៅមន្ទីរពេទ្យបង្អែកស្រុកភ្នំស្រួចចំនួន០៥ថ្ងៃ ហើយបានដាក់ពាក្យបណ្តឹងរហូតមកដល់ពេលនេះមិនទាន់ទទួលបានយុត្តិធម៌នៅឡើយទេ៕
