ខេត្តកំពង់ស្ពឺ៖ រឿងរ៉ាវចាក់ដីធ្វើរោងចក្រនៅទំនប់អូរក្រាំងអំបិល រហូតមកដល់ពេលនេះ ប្រជាពលរដ្ឋនៅមិនទាន់បានទទួលលុយថ្លៃដីនៅឡើយទេ ដែលលុយទាំងនោះត្រូវបានដឹងថាថៅកែចិនបានទម្លាក់មកឲ្យលោកអុី លាងអេង ដើម្បីចាត់ចែងទូទាត់ជាមួយប្រជាពលរដ្ឋ តែលោក អុី លាងអេង ឱបលុយនោះទុកមិនព្រមទម្លាក់មកឲ្យអ្នកទទួលការតាមកុងត្រាកិច្ចសន្យាឡើយ។
បើយោងតាមប្រភពបានបង្ហើបឲ្យដឹងថាមូលហេតុដែលលោក អុី លាងអេង មិនព្រមទម្លាក់លុយដែលទទួលពីថៅកែចិនដោយសារតែលោក អីុ លាងអេង ហៅឲ្យក្រុមឡានចាក់ដីមួយក្រុមផ្សេងទៀតដែលមិនបានធ្វើកុងត្រាជាមួយតំណាងរោងចក្រ ព្រោះតែខ្លួនចង់បានភាគលាភក្នុងការចាក់ដីនោះ។
ម្យ៉ាងទៀតអ្វីដែលប្រភពបែកធ្លាយបានបន្តទៀតថា លោក អុី លាងអេងបានដកលុយប្រើប្រាស់ខុសខ្ទង់ចំណាយក្នុងការចាក់ដីសាងសង់រោងចក្រឱ្យថៅកែចិន។ មូលហេតុដែលលោកអ៊ីលាងអេងធ្វើបែបនេះដោយអាងថាខ្លួនគឺជាមន្ត្រីយោធាបម្រើការនៅក្រសួងការពារជាតិនិងមានខ្នងបង្អែកជាមេបញ្ជាការកងរាជអាវុធហត្ថស្រុកសំរោងទងជាពិសេសគឺលោកផ្កាយ៣ណូន រ៉ន តែម្ដង។ដោយអាងខ្នងបង្អែកទាំងនេះហើយទើបលោក អុី លាងអេង ហ៊ានហៅក្រុមឡានដីដែលជីកក្នុងរណ្ដៅទំនប់អូរក្រាំងអំបិលលើសច្បាប់កំណត់យកទៅចាក់លើទីតាំងគ្រោងសាងសង់រោងចក្រ។ ការធ្វើបែបនេះគឺដោយសារលោក អុី លាងអេង ចង់ឲ្យថៅកែចិនមើលឃើញថាខ្លួនធ្វើការងារបានល្អ។ស្របពេលដែលក្រុមឡានដែលកំពុងចាក់ដីសព្វថ្ងៃ។ពុំមានធ្វើកុងត្រាជាក់លាក់ណាមួយជាមួយតំណាងរោងចក្រឡើយ។
ប្រភពបន្តថាជាក់ស្ដែងកាលពីពេលកន្លងទៅ ជើងក្រោមដែលជាអ្នកប្រតិបត្តិអនុវត្តផ្ទាល់ជាអ្នកទទួលធ្វើកុងត្រាចាក់ដីសាងសង់រោងចក្របានបិទផ្លូវមិនឲ្យក្រុមឡានដីទាំងនោះរត់ដឹកដីចាក់ស្រាប់តែលោក វិនឡេងហួងមេបញ្ជាការកងរាជអាវុធហត្ថុស្រុកសំរោងទងចេញមុខអន្តរាគមន៍ស្របពេលជាមួយលោកផ្កាយ៣ណូន រ៉នទៀតផង។ក្រោយមកដោយមានការសម្របសម្រួលគ្នា ទើបអ្នកប្រតិបត្តិខាងក្រោមយល់ព្រមឲ្យឡានដឹកដីរត់សារជាថ្មី។
ករណីលោក អុី លាងអេង មន្ត្រីយោធាបម្រើការនៅក្រសួងការពារជាតិប្រើប្រាស់តួនាទីរបស់ខ្លួន យកពេលវេលាម៉ោងធ្វើការរបស់រដ្ឋ ដែលបើកប្រាក់ខែពីក្រសួងការពារជាតិមករកស៊ីខាងក្រៅបែបនេះ តើថ្នាក់ដឹកនាំក្រសួងការពារជាតិបានជ្រាបដែរឬទេ? ហើយចំពោះលោកមេបញ្ជាការកងរាជអាវុធហត្ថស្រុកសំរោងទងវិញតើលោកម៉េង ស៊្រុនមេបញ្ជាការកងរាជអាវុធហត្ថខេត្តកំពង់ស្ពឺ មានដឹងទេថាកូនចៅរបស់លោកយកតួនាទី ជាមេបញ្ជាការមូលដ្ឋានកងរាជអាវុធហត្ថស្រុកទៅកាងក្រុមចាក់ដីខុសច្បាប់ទាំងនេះដែរឬយ៉ាងណា?។
ពាក់ព័ន្ធការលើកឡើងខាងលើនេះដែរអ្នកយកព័ត៌មានយើងពុំអាចសុំការពន្យល់ពីលោកអុី លាងអេង និងលោក វិន ឡេងហួង ព្រមទាំងលោកណូន រ៉ន បានឡើយដោយមិនមានលេខទូរស័ព្ទសម្រាប់ទំនាក់ទំនង។
អង្គភាពអ្នកសារព័ត៌មានយើងគ្រាន់តែជាកញ្ចក់ឆ្លុះបញ្ជាំង ពីបញ្ហាសង្គម និងជាអ្នកនាំដំណឹង ឬនាំសារ រាយការណ៍ជួនដល់ប្រមុខថ្នាក់ដឹកនាំ អោយបានជ្រាប! រិះគន់ក្នុងន័យស្ថាបនា ពុំមានចេតនាណាមួយមួលបង្កាច់ ឬជាន់ពន្លិច ដែលអង្គភាពសារព័ត៌មានយើងខ្ញុំរងចាំទទួលការបកស្រាយ ពីស្ថាប័នពាក់ព័ន្ធ គ្រប់លំដាប់ថ្នាក់ ប្រសិនបើមានប្រតិកម្មណាមួយនោះ ដោយយោងច្បាប់ស្ដីពីរបបសារព័ត៌មាន៕
