ខេត្តកំពង់ស្ពឺ៖ អភិបាលខេត្តកំពង់ស្ពឺ គ្រោងដាំដើមត្នោតរាប់ម៉ឺនដើមនៅអមស្ទឹងព្រែកត្នោត និងអមផ្លូវទៅកាន់រមណីយដ្ឋាននានា ដើម្បីបង្កើនសោភ័ណភាព និងឱ្យសមជាខេត្តដែលសម្បូរដើមត្នោតច្រើនជាងគេនៅកម្ពុជា។
លោក ជាម ចន្ទ័សោភ័ណ អភិបាលខេត្តកំពង់ស្ពឺ ក្នុងពិធីដាំដើមឈើចម្រុះជិត៤ពាន់ដើមលើផ្ទៃដីបម្រុងរបស់ស្រុក ថ្ងៃទិវា៩កក្កដា ដែលប្រព្រឹត្តឡើងនៅក្នុងស្រុកសាមគ្គីមុនីជ័យ ថ្ងៃទី២៥ ខែកក្កដា ឆ្នាំ២០២៤។ លោកបានលើកឡើងថា ខេត្តកំពង់ស្ពឺ ជាខេត្តដែលសម្បូរដើមត្នោតច្រើនជាងគេ ឡូហ្គោតំណាងខេត្តក៏មានរូបដើមត្នោត និងមានស្ទឹងព្រែកត្នោត ស្ថិតនៅកណ្តាលទីរួមខេត្ត។ ដើម្បីលើកកម្ពស់សោភណ័ភាពខេត្ត ក៏ដូចស្ទឹងព្រែកត្នោត ត្រូវដាំដើមត្នោតឱ្យបានច្រើនដើមនៅអមដងស្ទឹងនេះ។
លោកអភិបាលខេត្តបានបន្ថែមថា ការដាំដើមត្នោតឡើងវិញនេះ មិនមែនធ្វើនៅតែមាត់ស្ទឹងព្រែកត្នោតប៉ុណ្ណោះនេះទេ ត្រូវដាំឱ្យបានរាប់ម៉ឺន រាប់សែនដើមនៅអមតាមបណ្តាផ្លូវសំខាន់ៗពិសេសផ្លូវទៅកាន់រមណីយដ្ឋានធម្មជាតិនានា ប្រយោជន៍ស្តារឡើងវិញនូវដើមត្នោត និងលើកកម្ពស់សោភ័ណភាពនៃដើមត្នោតសត្តសញ្ញាណនៃជាតិខ្មែរផងដែរ។ ទន្ទឹមនោះ អាជ្ញាធរក្រុងស្រុក ឃុំសង្កាត់ ក៏ត្រូវបំផុសឱ្យប្រជាពលរដ្ឋនៅតាមមូលដ្ឋានចូលរួមដាំឱ្យបានម្នាក់យ៉ាងតិចមួយដើម និងដាំដើមឈើលម្អរផ្សេងៗទៀត ដើម្បីលើកកម្ពស់សោភ័ណភាពបៃតង។
សូមបញ្ជាក់ថា ខេត្តកំពង់ស្ពឺជាខេត្តសម្បូរទៅដោយរមណីយដ្ឋានធម្មជាតិ ដែលអាចទាក់ទាញភ្ញៀវទេសចរណ៍ជាតិ អន្តរជាតិក្នុងមួយសប្តាហ៍ជិត៤ម៉ឺននាក់មកលេងកម្សាន្ត។ នៅថ្ងៃអនាគតភ្ញៀវទេសចរណ៍នឹងមានការកើនឡើងទ្វេរដង គ្រាដែលធម្មជាតិនៃដើមត្នោតនិងដើមឈើលម្អរផ្សេងៗទៀតចម្រើនវ័យ បញ្ចេញនូវសម្រស់ផ្កាភ្ញី និងម្លប់ត្រឈៃគួរជាទីទាក់ទាញ។ ពេលនោះទេសចរណ៍ និងពោលសរសើរពីសម្រស់នៃខេត្តកំពង់ស្ពឺ ហើយប្រជាពលរដ្ឋ នឹងមានជីវភាពប្រសើរឡើង៕
