កំពង់ស្ពឺ៖ ព្រឹកថ្ងៃទី ១០ ខែកញ្ញា ឆ្នាំ២០២៤ ពិធីសំណេះសំណាលជាមួយមន្ត្រីរាជការនៃសាលាស្រុកឱរ៉ាល់ ក្រោមអធិបតីភាពឯកឧត្តម យឹម សុខុម ប្រធានក្រុមប្រឹក្សាខេត្ត ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ ព្រមទាំងមានការអញ្ជើញចូលរួម ពីលោក លោកស្រីតំណាងមន្ទីរអង្គភាពជុំវិញខេត្ត និងមន្ត្រីរាជការនៃរដ្ឋបាលស្រុក ជាច្រើនទៀត ពិធីនេះដែរប្រារព្ធធ្វើនៅសាលប្រជុំសាលាស្រុកឱរ៉ាល់ ខេត្តកំពង់ស្ពឺ។
ក្នុងឱកាសនោះដែរ ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ បានកោតសរសើរ និងវាយតម្លៃខ្ពស់ ចំពោះថ្នាក់ដឹកនាំនៃរដ្ឋបាលស្រុកឱរ៉ាល់ ក្នុងការងារបម្រើសេវាសាធារណៈជូនដល់បងប្អូនប្រជាពលរដ្ឋរយៈពេលកន្លងមក បានយ៉ាងល្អប្រសើរ។ ក្នុងឱកាសសំណេះសំណាលនោះដែរឯកឧត្ដម ក៏បានស្នើរសុំឲ្យរដ្ឋបាលស្រុក ត្រូវតែពង្រឹងរចនាសម្ព័ន្ធឲ្យបានល្អបន្ថែមទៀត នៅពេលដែលមានបញ្ហាកើតឡើងងាយស្រួលក្នុងការគ្រប់គ្រង ដូចជាអត្រានុកូលដ្ឋាន បញ្ហាពាក់ព័ន្ធទៅនឹងការដោះដូរដីធ្លី ទិញ លក់ និងសេវាផ្សេងៗទៀត។ រដ្ឋបាលស្រុកត្រូវមានគណនេយ្យភាព ព្រោះវាមានសារៈសំខាន់ក្នុងការគ្រប់គ្រងរដ្ឋបាល ផ្តល់សេវាជូនប្រជាពលរដ្ឋ ក៏ដូចជាការផ្តល់សេវាសាធារណៈផ្សេងៗឲ្យបានល្អប្រសើរក្នុងដែនសមត្ថកិច្ចរបស់ខ្លួន។
ឯកឧត្តមអភិបាលខេត្ត បានសំណូមពរដល់រដ្ឋបាលស្រុក ត្រូវធ្វើការវិភាគទៅលើមុខងាររបស់មន្ត្រីស្រុកទាំងអស់ក្នុងការងារ និងតួនាទីរបស់ខ្លួន ហើយក៏ជាបទពិសោធន៍ក្នុងការធ្វើផែនការដោយខ្លួនឯង ជាពិសេសមន្ត្រីគ្រប់រូបទាំងអស់នោះ ត្រូវដឹងអំពីគោលនយោបាយចតុកោណដំណាក់កាលទីមួយរបស់រាជរដ្ឋាភិបាល ដោយមានប្រមុខរាជរដ្ឋាភិបាល ដែលមានសម្ដេចបវរអធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។
ចុងបញ្ចប់នៃពិធីសំណេះសំណាលនោះដែរ ឯកឧត្តម បណ្ឌិត បានសង្កត់ធ្ងន់ លើការពង្រឹងសុវត្ថិភាពសន្តិសុខសណ្ដាប់ធ្នាប់ ជូនប្រជាពលរដ្ឋ ភូមិឃុំមានសុវត្ថិភាព ដូចជាការប្រើប្រាស់គ្រឿងញៀន ល្បែងស៊ីសងគ្រប់ប្រភេទ ពិនិត្យជាតិស្រវឹងក្នុងពេលបើកបរ កុំឱ្យមានល្បែងជល់មាន់ និងក្មេងទំនើង ។ ហើយរដ្ឋបាលស្រុក ត្រូវយកចិត្តទុកដាក់ ចំពោះបញ្ហាទាំងអស់នេះនៅតាមឃុំ និងកំណត់អត្តសញ្ញាណអោយបានច្បាស់លាស់ និងរាយការណ៍ មកគណ:បញ្ជាការឯកភាពស្រុក និងខេត្ត ដើម្បីចាត់ការតាមនិតិវិធីច្បាប់ ជាពិសេសក្នុងស្រុកឱរ៉ាល់នេះ ត្រូវបង្កើតអោយមានភូមិសរ បន្តបង្រ្កាប នៅរាល់សកម្មភាពទាំងឡាយណាដែលប្រាសចាកពីច្បាប់ និងបង្កអសន្តិសុខនៅតាមមូលដ្ឋាន អាជ្ញាធរមានសមត្ថកិច្ចទាំងអស់ត្រូវអនុវត្តន៍ទៅតាមនិតិវិធីច្បាប់ផងដែរ៕
