កំពង់ស្ពឺ៖ នារសៀលថ្ងៃអង្គារ ទី១០ ខែកញ្ញា ឆ្នាំ២០២៤ ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ ទទួលស្វាគមន៍អ្នកវិនិយោគមកពីប្រទេសកូរ៉េខាងត្បូង ។
អ្នកវិនិយោគជនជាតិកូរ៉េមកពីក្រុមហ៊ុន យូរ៉ាហានេស (រោងចក្រកូរ៉េ ផលិតខ្សែបង្គំភ្លើងរថយន្ត) ប្រទេសកូរ៉េខាងត្បូង ចូលជួបសម្តែងការគួរសមឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ ក្នុងគោលបំណងដើម្បី ពិភាក្សាការងារមួយចំនួន និងការវិនិយោគផលិតរោងចក្រកូរ៉េ ផលផលិតខ្សែបង្គំភ្លើងរថយន្ត) ក្នុងក្រុងច្បារមន ខេត្តកំពង់ស្ពឺ។
សូមរំលឹកថា ក្រុមហ៊ុន យូរ៉ាហានេស(ខេមបូឌា)របស់ប្រទេសកូរ៉េខាងត្បូងបាន សម្ពោធដាក់ឱ្យប្រើប្រាស់ក្រោមអធិបតីភាព ឯកឧត្តមឧបនាយករដ្ឋមន្រ្តី ហ៊ុន ម៉ានី នៅថ្ងៃទី២៦ ខែមេសា ឆ្នាំ២០២៣ក្នុងភូមិទួលធ្នង់ សង្កាត់រការធំ ក្រុងច្បារមន ខេត្តកំពង់ស្ពឺ ។
បញ្ជាក់ថា រោងចក្រខ្សែបង្គុំអេឡិចត្រនិចរថយន្តយូរ៉ាហានេស(ខេមបូឌា)បានកើតឡើងរយៈពេលជាង៥០ឆ្នាំមកហើយ បច្ចុប្បន្នក្រុមហ៊ុននេះកំពុងបន្តពង្រីកវិសាលភាពរបស់ខ្លួនទៅតាមប្រទេសមួយចំនួនពិសេសប្រទេសកម្ពុជាដែលមានខេត្តកំពង់ស្ពឺជាខេត្តគោលដៅហើយបានដាក់ទុនវិនិយោគប្រមាណជាង១៥លានដុល្លាសហរដ្ឋអាមេរិក។ ទន្ទឹមនិងការបើកទ្វាររោងចក្រខ្សែបង្គំនេះ ក្រុមហ៊ុនបានស្រូបទាញកម្លាំងពលកម្ម១២០០នាក់ក្នុងនោះមាន៧នាក់ជាជនបរទេស។
អ្នកតំណាងក្រុមហ៊ុនថា បរិយាកាសជោគជ័យ ក្រុមហ៊ុនយូរ៉ាហានេស(ខេមបូឌា)និងបន្តពង្រីកសាខារបស់ខ្លួនបន្ថែមទៀតដើម្បីបង្កើតការងារឱ្យកាន់តែសំបូរបែបសម្រាប់បងប្អូនប្រជាពលរដ្ឋអ្នកខេត្តកំពង់ស្ពឺ និងបង្កើនប្រាក់ខែឱ្យកាន់តែខ្ពស់ផងដែរ។
ជាមួយគ្នានោះឯកឧត្តមបណ្ឌិត បានរំលឹកឡើងវិញពីការវិវត្តន៍នៃកំណើនរោងចក្រសហគ្រាសនៅក្នុងប្រទេសកម្ពុជាដែលនៅក្នុងឆ្នាំ១៩៩៣ មានត្រឹមតែ៥១ សហគ្រាសប៉ុណ្ណោះតែបើគិតមកដល់ត្រឹម ខែកញ្ញា ឆ្នាំ២០២៤ ប្រទេសកម្ពុជាមានរោងចក្រសហគ្រាសប្រមាណ១៩៩៧ រោងចក្រសហគ្រាស ហើយបង្កើតការងារដល់បងប្អូនប្រជាពលរដ្ឋខ្មែបានជាង១លាននាក់។ ដែលនេះបានឆ្លុះបញ្ចាំងពីតម្លៃនៃសុខសន្តិភាព និងស្ថេរភាពនយោបាយក្រោមការដឹកនាំដ៏ត្រឹមត្រូវរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មិនតែប៉ុណ្ណោះក៏បង្ហាញពីទំនាក់ទំនងល្អនៃប្រទេសកម្ពុជា-កូរ៉េផងដែរ។
ស្របតាមគោលនយោបាយការទូតសេដ្ឋកិច្ច និងទាក់ម៉ូយដែលបានដាក់ចេញកម្ពុជាស្វាគមន៍គ្រប់គម្រោងវិនិយោគ ដែលមានផលប្រយោជន៍ដល់ពលរដ្ឋ ដែលជាសក្ដានុពលរបស់កម្ពុជា រួមនិងខេត្តកំពង់ស្ពឺ ដែលបើកឱកាសកាសជូនគ្រប់បណ្ដាវិនិយោគិនទាំងការវិនិយោគដោយផ្ទាល់ពីបរទេស និងក្នុងស្រុកផងដែរ៕
