កំពង់ស្ពឺ៖ ថ្ងៃទី២២ ខែកញ្ញា ឆ្នាំ២០២៤ ឯកឧត្តម ហ៊ុន ម៉ានី ឧបនាយករដ្ឋមន្ត្រីរដ្ឋមន្ត្រីក្រសួងមុខងារសាធារណៈ ប្រធានក្រុមការងាររដ្ឋាភិបាលចុះជួយខេត្តកំពង់ស្ពឺ ឯកឧត្តម សាយ សំអាល់ ឧបនាយករដ្ឋមន្ត្រីរដ្ឋមន្ត្រីក្រសួងរៀបចំដែនដីនគរូបនីយកម្មសំណង់ និងសូរិយោដី បានអញ្ជើញជាអធិបតីភាពក្នុងពិធីអបអរសាទរម្ចាស់ក្បាលដី២៤ភូមិ ក្នុងសង្កាត់វាំងចាស់ សង្កាត់ព្រះស្រែ និងសង្កាត់វាលពង់ ក្រុងឧដុង្គម៉ែជ័យ ខេត្តកំពង់ស្ពឺ បណ្ណកម្មសិទ្ធិសរុបចំនួន ១៧,៣៣២ បណ្ណ ស្មើនឹង ១០,៥០១កម្មសិទ្ធិករ ក្នុងក្រុងឧដុង្គម៉ែជ័យ ខេត្តកំពង់ស្ពឺ ដោយមានការអញ្ជើញចូលរួមពីសំណាក់ឯកឧត្តមប្រធានក្រុមប្រឹក្សាខេត្តឯកឧត្តមអភិបាលនៃគណៈអភិបាលខេត្តកំពង់ស្ពឺ និងប្រតិភូអមដំណើរ អាជ្ញាធរដែនដីនិងប្រជាពលរដ្ឋយ៉ាងច្រើនកុះករ ពិធីនេះប្រារព្ធធ្វើនៅ សង្កាត់ វាំងចាស់ ក្រុងឧដុង្គម៉ែជ័យខេត្តកំពង់ស្ពឺ។
ឯកឧត្តម ហ៊ុន ម៉ានី ឧបនាយករដ្ឋមន្ត្រីរដ្ឋមន្ត្រីក្រសួងមុខងារសាធារណៈ ប្រធានក្រុមការងាររដ្ឋាភិបាលចុះជួយខេត្តកំពង់ស្ពឺបានថ្លែងថា÷ សូមចូលរួមអបអរសាទរជាមួយបងប្អូនប្រជាពលរដ្ឋប្រមាណជាង ១៧,៣៣២បណ្ណដែលបានមកទទួលបានកម្មសិទ្ធិដីធ្លីនាពេលនេះ ហើយសូមថ្លែងអំណរគុណចំពោះបងប្អូនប្រជាពលរដ្ឋទាំងអស់នៅក្នុងខេត្តកំពង់ស្ពឺ ដែលបានចូលរួមជាមួយរាជរដ្ឋាភិបាលក្នុងការទប់ស្កាត់រាល់បទល្មើសផ្សេងៗចេញពីខេត្តកំពង់ស្ពឺ ព្រមទាំងរក្សាបាននូវសុខសុវត្ថិភាព ជូនបងប្អូនប្រជាពលរដ្ឋគ្រប់ស្រទាប់វណ្ណៈ និងធ្វើឲ្យក្រុមការងារបច្ចេកទេសដីធ្លី មានការចុះបញ្ជីដីធ្លី តាមលក្ខណៈជាប្រព័ន្ធអនុវត្តតាមនីតិវិធីដែលបានកំណត់ ដោយច្បាប់ និងបច្ចេកវិទ្យាទំនើបមានតម្លាភាព និងការទទួលខុស ត្រូវ ដែលប្រទេសជឿនលឿនលើពិភពលោកកំពុងអនុវត្ត និងមានប្រសិទ្ធិភាពលើការគ្រប់គ្រងដីធ្លី នេះជាការសមស្របបំផុតដែលបានកំណត់នៅក្នុងគោលនយោបាយដីធ្លីរបស់រាជរដ្ឋាភិបាល ដើម្បីលើកស្ទួយដល់ការអភិវឌ្ឍន៍របស់ប្រទេសជាតិ ជាប្រយោជន៍ប្រជាពលរដ្ឋជាម្ចាស់ដីផង គឺរដ្ឋគ្រប់គ្រងដីធ្លីបានទាំងដីរដ្ឋ និងដីឯកជន ដែលធ្វើឱ្យរដ្ឋមានការងាយស្រួលក្នុងការរៀបចំដែនដីរដ្ឋបាលដីធ្លី ការបែងចែកដី និងកាត់បន្ថយទំនាស់ដីធ្លី ធានាសុវត្ថិភាពនៃការកាន់កាប់ដីធ្លីជូនប្រជាពលរដ្ឋ និងបម្រើដល់ការវិនិយោគទទួលបាននូវសិទ្ធិស្របច្បាប់ ក្លាយជាម្ចាស់ដីពិតប្រាកដ ដែលត្រូវបានការពារដោយច្បាប់ និងធានាដោយរដ្ឋ ដែលអាចធ្វើការបង្ករបង្កើនផល ឬប្រកបមុខរបរផ្សេងៗទៀតលើដីធ្លីរបស់ខ្លួនដោយគ្មានការព្រួយបារម្ភ អាចប្រើប្រាស់បណ្ណកម្មសិទ្ធិ ដើម្បីផលប្រយោជន៍ផ្សេងៗក្នុងការប្រកបមុខរបរ និងអាជីវកម្ម។
ឯកឧត្តមបានបន្តទៀតថា សូមពុកម៉ែបងប្អូនទាំងអស់ ត្រូវជឿជាក់លើប្រមុខរាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់សម្ដេចអគ្គមហាសេនាបតីតេជោ ពិសេសសម្ដេចមហាបវរអធិបតី ហ៊ុន ម៉ាណែត នាយករដ្ឋមន្ត្រីកម្ពុជា ហើយសម្ដេចតែងខិតខំយកចិត្តទុកដាក់លើសុខទុក្ខបងប្អូនប្រជាពលរដ្ឋនៅទូទាំងប្រទេស។ ព្រមទាំងបានកាត់បន្ថយជម្លោះ ពិសេសក្នុងការរំលោភបំពានទាំងផ្លូវច្បាប់ និងភាគីដែលរស់នៅជាភូមិផងរបងជាមួយ និង ព្រំដីស្រែនៅជាប់គ្នាផងដែរ៕
