កិច្ចប្រជុំផ្សព្វផ្សាយស្ដីពីការត្រៀមរៀបចំការបោះឆ្នោតជ្រើសរើសថ្នាក់ដឹកនាំសមាគមស្វាយកំពង់ស្ពឺ

កំពង់ស្ពឺ÷ កម្ពុជាគ្រោងនឹងនាំអង្ករចេញទៅទីផ្សារអន្តរជាតិប្រមាណជាង ៣០ លានតោនក្នុងឆ្នាំ ២០៣០ ខាងមុខនេះ ជាមួយគ្នានោះក៏មានសមាគមអំបោះសូត្រ -សមាគមស្វាយចន្ទី -សមាគមស្រូវ អង្ករ  កម្ពុជា -សមាគមស្វាយកែវរមៀត និងសមាគមផ្សេងៗជាច្រើនទៀតដែលបាននឹងកំពុងរៀបចំធ្វើផែនការ ឱ្យសមាគមក្នុងការដាំដុះ និងនាំផលិតផលសម្រេចទៅរកទីផ្សារអន្តរជាតិ មានប្រសាសន៍ដូច្នេះនៅពេលដែលឯកឧត្តម វ៉ា រុតសាន រដ្ឋលេខាធិការក្រសួងពាណិជ្ជកម្មតំណាងលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម អញ្ជើញចូលរួមជាអធិបតីក្នុងកិច្ចប្រជុំផ្សព្វផ្សាយស្ដីពីការត្រៀមរៀបចំការបោះឆ្នោតជ្រើសរើសថ្នាក់ដឹកនាំសមាគមស្វាយកំពង់ស្ពឺ ពិធីនេះប្រារព្ធធ្វើនៅសាលប្រជុំរបស់មន្ទីរពាណិជ្ជកម្មខេត្តកំពង់ស្ពឺថ្ងៃទី ២៥ ខែកញ្ញា ឆ្នាំ ២០២៤ ដោយមានសមាសភាពចូលរួមប្រមាណជាង ១០០ នាក់ ដែលជាមន្ត្រីជំនាញផលិតកម្មស្វាយ អ្នកលក់ធាតុចូល ផ្គត់ផ្គង់ ថែទាំ ទីផ្សារ ជំនាញចរចាទីផ្សារ ទាំងសាធារណៈ និងវិស័យឯកជន។

ឯកឧត្តមបានបន្តផងដែរថា ក្នុងពេលអនាគតដ៏ខ្លីខាងមុខនេះ សហគមន៍ត្រូវចូលរួមបង្កើតឲ្យមានសហព័ន្ធស្វាយកែវរមៀត ដូច្នេះការបង្កើតឲ្យមានគោលនយោបាយនិងទស្សនៈដូច្នេះធ្វើឡើងដើម្បីអ្វី? ការគិតប្រមើលមើល តើយើងចង់បានអ្វី? គឺចង់ឱ្យពិភពលោកទទួលស្គាល់កម្ពុជា ជាអ្នកនាំចេញស្វាយកែវរមៀតឈានមុខគេ។ ចង់ឱ្យប្រជាកសិករ ទទួលបានប្រាក់ចំណូល ឲ្យសមស្របទៅនឹងការខិតខំប្រឹងប្រែង តាមការវិនិយោគរបស់ពួកគាត់ ប្រកបដោយសីលធម៌។ ចង់ឱ្យបងប្អូនទាំងអ្នកដាំ បានទទួលផលចំណេញ អ្នកប្រមូលទិញ និងអ្នកកែច្នៃ នាំចេញបានផលចំណេញដូចគ្នា។ កម្ពុជាមានម្រេច មានស្វាយកែវរមៀត ជាមុខទំនិញកំពុងប្រកួតប្រជែងនៅទីផ្សារអន្តរជាតិ ដូច្នេះកសិករត្រូវពង្រីកផ្ទៃដី បង្កើនទិន្នផលឲ្យបានខ្ពស់ ឬធ្វើយ៉ាងណាដើម្បីតម្រូវការតាមទីផ្សារ ពីស្វាយស្រស់ទៅស្វាយស្ងួត ដើម្បីបានតម្លៃខ្ពស់។ ការនាំចេញត្រូវសិក្សាលម្អិតតាមទីផ្សារនីមួយៗ អង្គរកម្ពុជាបានវាយលុកបានយ៉ាងខ្លាំងខ្លា នូវទីផ្សារអន្តរជាតិ ហើយស្វាយកែវមៀតក៏ធ្វើដូច្នោះដែរ គឺទាំងសោភ័ណភាពការវេចខ្ចប់ ព្រមទាំងដាក់ឈ្មោះប្រទេសរបស់ខ្លួនឲ្យបានច្បាស់លាស់ជៀសវាងផលិតផលកម្ពុជា ហើយក្រោយពេលវេចខ្ចប់គេដាក់និមិត្តសញ្ញាទៅជាប្រទេសផ្សេងទៅវិញ។ លើកកម្ពស់ជីវភាពសន្តិសុខប្រាក់ចំណូលរបស់ប្រជាកសិករ គឺការអភិវឌ្ឍន៍ប្រទេសជាតិ។ បច្ចុប្បន្ននេះក្រសួងពាណិជ្ជកម្ម បានយកចិត្តទុកដាក់ខ្លាំង ទៅលើកសិកម្មទំនើប សហគមន៍ទំនើប ឬក៏សហព័ន្ធទំនើប។ សមាគម គឺជាអង្គការមួយតំណាងឲ្យបងប្អូន ជាសមាជិក ហើយមិនរកប្រាក់ចំណេញទេ ប៉ុន្តែសមាជិករកស៊ី គឺគិតពីការរកស៊ីចំណេញ និងខាត មិនខុសពីសភាពពាណិជ្ជកម្ម និងសមាជិកសភា។ សមាជិកសមាគម នៅតាមបណ្ដាខេត្ត ត្រូវបោះឆ្នោតជ្រើសរើសសហព័ន្ធ ដើម្បីចូលរួមកិច្ចប្រជុំជាមួយប្រមុខដឹកនាំ ក្នុងការចង់ដឹងពីផលលំបាកក្នុងវិស័យស្វាយកែវរមៀត ដើម្បីឲ្យរាជរដ្ឋាភិបាលជួយដោះស្រាយ ដូច្នេះការចូលរួមរបស់បងប្អូន គឺជាកិច្ចការមួយដ៏សំខាន់ ដើម្បីពាំនាំនូវទុក្ខលំបាកទាំងអស់នោះទៅដល់ប្រមុខរាជរដ្ឋាភិបាល។ ដូច្នេះវិស័យឯកជនជាវិស័យមួយដែលមិនអាចខ្វះបានក្នុងការចូលរួមអភិវឌ្ឍន៍សមាគមដាំដុះ ទាំងការនាំចេញ និងតម្លៃផងដែរ។

គួបបញ្ជាក់ផងដែរថា÷ កិច្ចប្រជុំផ្សព្វផ្សាយស្តីពី ការត្រៀមរៀបចំការបោះឆ្នោតជ្រើសរើសថ្នាក់ដឹកនាំសមាគមន៍ស្វាយកំពង់ស្ពឺ ឯកឧត្តម វ៉ា រុតសាន រដ្ឋលេខាធិការក្រសួងពាណិជ្ជកម្ម តំណាងដ៏ខ្ពង់ខ្ពស់លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម ឯកឧត្តម ជាវ វិជ្ជាក់ អភិបាលរង ខេត្ត តំណាងឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ អញ្ជើញជាអធិបតីភាពក្នុងកិច្ចប្រជុំផ្សព្វផ្សាយស្តីពី ការត្រៀមរៀបចំការបោះឆ្នោតជ្រើសរើសថ្នាក់ដឹកនាំសមាគមន៍ស្វាយកែវរមៀតកំពង់ស្ពឺ ។ សមាសភាពអញ្ជើញចូលរួមមាន ឯកឧត្តមប្រធានសភាពាណិជ្ជខេត្ត លោកប្រធាន អនុប្រធានមន្ទីរកសិកម្ម និងមន្ទីរឧស្សាហកម្មខេត្ត ព្រមទាំងអជ្ញាធរក្រុង ស្រុក ឈ្មួញ ម្ចាស់ចំការ អ្នកលក់ធាតុចូល និងធនាគារអភិវឌ្ឍន៍ជនបទ និងកសិកម្ម ចូលរួមផងដែរ កិច្ចប្រជុំនេះធ្វើនៅសាលប្រជុំ ឱរ៉ាល់ មន្ទីរពាណិជ្ជកម្មខេត្តកំពង់ស្ពឺ៕