នគរបាលស្រុកសំរោងទងឃាត់ខ្លួនក្រុមជនសង្ស័យចំនួន០៤នាក់ ពាក់ព័ន្ធការប្រើប្រាស់គ្រឿងញៀនដោយខុសច្បាប់..

ខេត្តកំពង់ស្ពឺ៖ ក្រុមជនសង្ស័យចំនួន០៤នាក់ត្រូវបានកម្លាំងនគរបាលស្រុកសំរោងទងធ្វើការបង្ក្រាបនិងឃាត់ខ្លួន ខណៈដែលពួកគេកំពុងតែប្រមូលម្តុំគ្នាប្រើប្រាស់គ្រឿងញៀន និងសកសំបកខ្សែភ្លើង។

លោកវរសេនីយ៍ឯក ឃុត សុផល អធិការនគរបាលស្រុកសំរោងទង បានឲ្យដឹងថានៅថ្ងៃទី៧ ខែវិច្ឆិកា​ ឆ្នាំ២០២៤ លោកបានទទួលសេចក្តីរាយការណ៍ពីប្រជាពលរដ្ឋថា មានមនុស្សកំពុងសងំប្រើប្រាស់គ្រឿងញៀន និងសកសំបកខ្សែភ្លើង នៅចំណុចក្នុងផ្ទះរបស់ឈ្មោះ ឌិន ចន្តា ហៅវណ្ណដា ភេទប្រុស អាយុ២៩ឆ្នាំ រស់នៅភូមិព្រីង ឃុំរលាំងចក ស្រុកសំរោងទង ខេត្តកំពង់ស្ពឺ។

លោក ឃុត សុផល បានបន្ថែមទៀតថា ដោយមានការសម្របសម្រួលពីលោក ឈៀវ គីមហាក់ ព្រៈរាជអាជ្ញារង នឹងមានការចង្អុលដឹកនាំពីលោកឧត្ដមសេនីយ៍ទោ ឃឹម សុកខៃ ស្នងការខេត្តកំពង់ស្ពឺ ក្រោមការបញ្ជាពីលោកវីរៈសេនីយ៍ឯក ឃុត សុផល កម្លាំងផ្នែកព្រហ្មទណ្ឌស្រុក សហការជាមួយកម្លាំងប៉ុស្តិនគរបាលរលាំងចក  បានចុះទៅដល់ទីតាំងខាងលើ និង បានហៅមនុស្សចំនួន៤នាក់÷
១/ឈ្មោះ ឌិន ចន្តា ហៅវណ្ណដា ភេទប្រុស អាយុ២៩ឆ្នាំ(ម្ចាស់ផ្ទះ)
២/ឈ្មោះ មាស ចិន ភេទប្រុស អាយុ២៩ឆ្នាំ
៣/ឈ្មោះ ណាវ ម៉េងលី ភេទប្រុស ២០ឆ្នាំ ទាំង ៣នាក់ រស់នៅភូមិព្រីង ឃុំរលាំងចក ស/ទ (ស្ពឺ) ។
៤/ឈ្មោះប៊ុត រដ្ឋា ហៅស្កុបពីរ ភេទប្រុស អាយុ៣២ឆ្នាំនៅភូមិកំណប់ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។

លោកវរសេនីយ៍ឯក ឃុត សុផល បានឲ្យដឹងទៀតថា ក្នុងនោះកម្លាំងរបស់លោកបានដកហូតវត្ថុតាងរួមមាន: សម្ភារៈសម្រាប់ប្រើប្រាស់គ្រឿងញៀន ខ្សែភ្លើងមួយចំនួន និងម៉ូទ័រកាត់ដែក១គ្រឿង និងម៉ូតូ១គ្រឿងម៉ាកប៊ិត(BeAT)ក្រហមស ពាក់ផ្លាកលេខកំពង់ស្ពឺ1Q-8096។ បន្ទាប់ពីសាកសួរ ឈ្មោះ ឌិន ចន្តា ហៅវណ្ណដា និងឈ្មោះប៊ុត រដ្ឋា ហៅស្កុបពីរ បានឆ្លើយសារភាពថា ចំពោះខ្សែភ្លើងនឹងម៉ូទ័រខាងលើខ្លួនបានលួចនៅចំណុចរោងចក្រផលិតកាបូប ស្ថិតនៅភូមិថ្មី ឃុំរលាំចក ស្រុកសំរោងទង ខេត្តកំពង់ស្ពឺ ជាមួយឈ្មោះ យឹម ស ភេទប្រុស អាយុ៣២ឆ្នាំ រស់នៅភូមិត្រពាំងថ្ម ឃុំរលាំងចក ស្រុកសំរោងទង ខេត្តកំពង់ស្ពឺ (គេចខ្លួន)។

បច្ចុប្បន្នក្រុមជនសង្ស័យខាងលើ ជំនាញកំពុងធ្វើការសាកសួរនិងកសាងសំណុំរឿងចាត់តាមនិតិវិធី៕