ថ្មីៗនេះ ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ ទទួលស្វាគមន៍អ្នកវិនិយោគមកពីប្រទេសចិនលោកស្រី ចាង វេនហ្សា អគ្គនាយិការក្រុមហ៊ុន ARK Electronics Group នៃសាធារណរដ្ឋប្រជាមានិតចិន ក្នុងគោលបំណងដើម្បី ពិភាក្សានិងគ្រោងមកបោះទីតាំងការិយាល័យកណ្តាលក្នុងទឹកដីខេត្តកំពង់ស្ពឺ ។ លោកស្រី ចាង វេនហ្សា អគ្គនាយិការក្រុមហ៊ុន ARK Electronics Group មានប្រសាសន៍ថា លោកស្រីមានភាពសប្បាយចិត្តរីករាយយ៉ាងខ្លាំងដែលឯកឧត្តមបណ្ឌិត អភិបាលខេត្តផ្តល់កិត្តិយស ដល់រូបលោកស្រីក្នុងគោលបំណងពិភាក្សា និងគ្រោងមកបោះទីតាំងការិយាល័យកណ្តាលរបស់ខ្លួននៅក្នុងខេត្តកំពង់ស្ពឺ សម្រាប់កិច្ចការទីផ្សារកម្ពុជា អាស៊ីអាគ្នេយ៍ និងអន្តរជាតិ។ ក្រុមហ៊ុន Huacam គ្រុប កំពុងដំណើការចុះ បញ្ជីស្របច្បាប់នៅក្នុងព្រះរាជាណាចក្រកម្ពុជា មានក្រុមហ៊ុនបុត្រសម្ព័ន្ធរបស់ខ្លួនចំនួន ៦ ហើយត្រូវ បានបង្កើតឡើងដោយសហការវិនិយោគរួមគ្នាជាមួយក្រុមហ៊ុនរបស់ប្រទេសចិន ម៉ាឡេស៊ី និងព្រះរាជាណាចក្រកម្ពុជា ក្នុងការបង្កើតជាបុត្រសម្ព័ន្ធទាំងប្រាំមួយនោះឡើង។ ហើយក្រុមហ៊ុននិងគ្រោងបើកធ្វើសួនឧស្សាហកម្ម កែច្នៃផលិតផលកសិកម្ម ជាមួយនឹងអត្តសញ្ញាណ និងយីរហារផលិផលខ្មែរ ធ្វើសួនឧស្សាហកម្មបង្គំគ្រឿងអេឡិចត្រូនិក និងផលិតឈីបពាក់កណ្តាលសម្រេច ព្រមទាំងសួនឧស្សាហកម្មដ៏ទៃទៀត ដែលបម្រើអោយតម្រូវការជាក់ស្តែងរបស់ខ្សែចង្វាក់ ផលិតកម្មរបស់ខ្លួននៅឯប្រទេសចិន ដែលមានសួនឧស្សាហកម្មសរុបប្រមាណ ១៤។ ហើយគម្រោងនេះនឹងត្រូវស្ថាបនាលើផ្ទៃដីប្រមាណ ១០០០ហិកតា ដែលត្រូវចំនាយដើមទុនវិនិយោគប្រហែលជា១.៣ពាន់លានដុល្លាអាមេរិក។ នឹងប្រើប្រាស់កម្លាំងកម្មករ កម្មការីសរុបប្រមាណ ៣០០០នាក់។ សួនឧស្សាហកម្មទាំងនេះ ដំណើការដោយប្រើប្រាស់បច្ចេកវិទ្យា AI និង Technology ឧស្សាហកម្មចុងក្រោយបំផុត (360° Service System) ហើយក៏អាចសន្និដ្ឋាន បានថាជាសួនឧស្សាហកម្មដែលនាំមកនូវរច្ចេកវិទ្យាចុងក្រោយអោយ មានវត្តមាននៅព្រះរាជាណាចក្រកម្ពុជាផងដែរ។
ឆ្លៀតក្នុងឳកាសនោះដែរ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ ចូលរួមត្រេកអរដែលក្រុមហ៊ុន ARK Electronics Group គ្រោងនឹងមកវិនិយោគក្នុងទឹកដីខេត្តកំពង់ស្ពឺ ហើយបានសន្យាក្នុងការជួយខេត្តក្នុងការរៀបចំផែនការមេអភិវឌ្ឍន៏ (Master Plan) អោយខេត្តមួយនេះមានសោភ័ណ្ឌភាពដូចទៅនឹង Shenzhen ឬក៏ Zhongguancun។ ឯកឧត្តមតែងតែកៀរគរអ្នកវិនិយោគ ឱ្យចូលមកវិនិយោគនៅទឹកដីខេត្តកំពង់ស្ពឺ ស្របពេលដែលក្រុមហ៊ុន Huacam គ្រុបស្នើសុំសិទ្ឋិសិក្សាឱកាសវិនិយោគថាមពលអគ្គិសនីដើរដោយកម្លាំងខ្យល់ និងពន្លឺព្រះអាទិត្យនៅលើទឹកដីរបស់ខ្លួន។ ឯកឧត្តមបានផ្តល់អនុសាសន៏អោយក្រុមហ៊ុនធ្វើការចុះអនុស្សារណៈជាមួយនឹងខេត្ត ដើម្បីឈានទៅទទួលបានឱកាសសិក្សាជាពិសេសលើឱកាសវិនិយោគថាមពលអគ្គិសនីដើរដោយកម្លាំងខ្យល់។ ឯកឧត្តមបានបញ្ជាក់ឱ្យដឹងផងដែរថា សម្រាប់ខេត្តកំពង់ស្ពឺបច្ចុប្បន្ន មានរោងចក្រសហគ្រាសប្រមាណជាង៤០០កន្លែង និងមានកម្មករ និយោជិតជាង ១៦ម៉ឺននាក់ធ្វើការ។ នៅក្នុងរង្វង់រោងចក្រ សហគ្រាសកាត់ដេរសម្លៀកបំពាក់ ស្បែកជើង របស់របរប្រើប្រាស់ និងរបស់ធ្វើដំណើរ សព្វថ្ងៃទាំងជាង៤០០កន្លែងនេះ គឺអ្នកវិនិយោគចិនស្រូបទាញជាងដល់ទៅ៩០%ទៅហើយលើគ្រប់វិស័យទាំងអស់នេះ ហើយមិនត្រឹមតែរោងចក្រ សហគ្រាសវាយនភ័ណ្ឌកាត់ដេរ និងផលិតស្បែកជើងនោះទេ វិស័យឧស្សាហកម្ម កសិកម្ម កសិឧស្សាហកម្មក៏មានចំណែកអ្នកវិនិយោគមកពីប្រទេសចិនផងដែរ៕
