ខេត្តព្រះសីហនុ៖ បើយោងតាមសេចក្តីរាយការណ៍ពីប្រជាសហគមន៍នេសាទ ជ្រលង និងប្រជាសហគមន៍នេសាទ បឹងរាំង បានឲ្យអ្នកសារព័ត៌មានយើងដឹងថា ក្លិនស្អុយសាយភាយចេញពីទឹកព្រែកកំពង់ស្មាច់ធ្វើឲ្យប៉ះពាល់ដល់សុខភាពដល់ពូកគាត់ពិសេសកុមារពិបាកក្នុងការដកដង្ហើមព្រោះរោងចក្រកែច្នៃស្បែកគោមួយកន្លែងដែលមានស្លាកយីហោ.គូប៊ុន.(ខេមបូឌា)បាយអូថេកណឡង ឯ.ក. បានបង្ហូរទឹកកខ្វក់ដែលមានក្លិនស្អុយចូលទឹកព្រែកកំពង់ស្មាច់ដោយមិនញញឹមច្បាប់ និងបង្កឲ្យមានផលប៉ះពាល់បរិស្ថានយ៉ាងខ្លាំង ដែលស្ថិតនៅភូមិ តាអោងធំ ឃុំសាមគ្គី ស្រុកព្រៃនប់ ខេត្តព្រះសីហនុ ។
តាមការឱ្យដឹងពីប្រជាសហគមន៍នេសាទបានបន្តទៀតថាការបង្ហូរទឹកកខ្វក់ដែលមានក្លិនស្អុយហូរតាមលូចេញពីរោងចក្រខាងលេី ជាករណីបណ្តាលឱ្យមាន ទឹកខ្មៅ ខ្លិនស្អុយ ធ្វើឲ្យប៉ះពាល់ដល់ជីវៈចម្រុះដែលរស់នៅក្នុងទឹកមានដូចជា ត្រី អង្គារ បង្កង ខ្យង ក្តាម បានងាប់ និងធ្វើឲ្យពូកគាត់ពិបាកក្នុងការនេសាទ ព្រោះទឹកព្រែកនោះមានការរមាស់និងមានក្លិនស្អុយ ព្រោះរោងចក្រពុំមានការថែទាំត្រឹមត្រូវតាមគោលការណ៍បច្ចេកទេសដែលក្រសួងបរិស្ថានដាក់ចេញនោះឡើយ។
លោកបានរៀបរាប់បន្តទៀតថា កាលពីមុនប្រជាពលរដ្ឋចេញទៅព្រៃមើល គោ ក្របី មិនពិបាកខ្វះទឹកប្រើប្រាស់នោះទេពួកគាត់អាចដងទឹកព្រែកនោះមកប្រើប្រាស់ឬហូបបាន តែបច្ចុប្បន្ននេះបើពួកគាត់ចេញមកព្រៃមិនស្ពៃទឹកទៅតាមទេគឺមិនមានទឹកសម្រាប់ប្រើប្រាស់ដូចមុននោះឡើយ ព្រោះទឹកតាមបណ្ដោយព្រែកកំពង់ស្មាច់នោះមានកន្លែងខ្លះមានពណ៌ក្រហមព្រឿងៗ នឹងមានកន្លែងខ្លះទៀតមានពណ៌ខ្មៅនិងក្លិនស្អុយផងដែរ។
ជាក់ស្តែងនៅថ្ងៃទី២៧ ខែធ្នូ ឆ្នាំ២០២៤ រោងចក្រកែច្នៃស្បែកគោដែលមានស្លាកយីហោ.គូប៊ុន.(ខេមបូឌា)បាយអូថេកណឡង ឯ.ក. បានបង្ហូរទឹកកខ្វក់ ចេញពីរោងចក្រ ចូលមកទឹកព្រែកកំពង់ស្មាច់ ដែលមានទឹកពណ៌ខ្មៅ នឹងមានខ្លិនស្អុយ ដែលអាចធ្វើឲ្យប៉ះពាល់ដល់ជីវៈចម្រុះ ត្រី អង្គារ បង្កង ខ្យង ក្តាម និងត្រីចិញ្ចឹមពូកគាត់បានងាប់អណ្ដែតទឹកជាច្រើនផងដែរ។
ករណីខាងលើនេះប្រជាសហគមន៍នេសាទ បានសំណូមពរ ដល់អាជ្ញាធរភូមិ ឃុំ ជួយមានវិធានការទប់ស្កាត់ការបំពុលទឹកព្រែកកំស្មាច់ និងជួយការណ៍ទៅដល់ថ្នាក់លើដើម្បីទប់ស្កាត់ និងរកពិធីដោះស្រាយពីរទុកលំបាករបស់ពួកគាត់ផង។
ជុំវិញការលើកឡើងរបស់ប្រជាសហគមន៍នេសាទខាងលើនេះអ្នកសារព័ត៌មានយើងមិនអាចសុំការបកស្រាយបំភ្លឺពីខាងតំណាងរោងចក្របានទេ ដោយមិនមានលេខទូរសព្ទទំនាក់ទំនងរហូតមកដល់ថ្ងៃចេញផ្សាយនេះ អ្នកសារព័ត៌មានយើងនិងចេញផ្សារព័ត៌មានលេខបន្ទាប់ទៀតប្រសិនបើមានប្រភពព័ត៌មានបន្ថែមពីតំណាងខាងរោងចក្រ ។
សូមរំលឹកផងដែរថាកាលពីថ្ងៃទី១៨ ខែធ្នូ ឆ្នាំ២០២៤ ក្រុមការងាររបស់ក្រសួងបរិស្ថាន បានសហការ ជាមួយមន្រ្តីនៃរដ្ឋបាលស្រុកព្រៃនប់ ខេត្តព្រះសីហនុ បានចុះត្រួតពិនិត្យករណីបំពុលទឹកព្រែកកំពង់ស្មាច់ ស្តិតក្នុងភូមិសាស្រ្ត ស្រុកព្រៃនប់ ខេត្តព្រះសីហនុ ដែលមានប្រភពចេញពីការបញ្ចេញសំណល់រាវ របស់រោងចក្រកែច្នៃស្បែកគោ ដែលមានស្លាកយីហោ.គូប៊ុន.(ខេមបូឌា)បាយអូថេកណឡង ឯ.ក. ស្ថិតនៅភូមិ តាអោងធំ ឃុំសាមគ្គី ស្រុកព្រៃនប់ ខេត្តព្រះសីហនុ។ កន្លងមកមានករណីរាយការណ៍ថា ប្រភពទឹកក្នុងតំបន់ខាងលើ អាចជាករណីបណ្តាលឱ្យមានត្រីងាប់ ខ្លះៗផងដែរ។
ក្រុមការងារពិនិត្យឃើញថា រោងចក្រខាងលើបានកំពុងដំណើរការកែច្នៃស្បែកគោ ដើម្បីផលិតចេញជាផលិតផលជេឡាទីន(Gelatin)។ រោងចក្រមានអាងប្រព្រឹត្តិកម្មសំណល់រាវ ប៉ុន្តែពុំមានការថែទាំ និងស្តារសម្អាតត្រឹមត្រូវ តាមគោលការណ៍បច្ចេកទេសឡើយ។ ជាមួយគ្នានេះដែរ នៅតាមដងអូរព្រែកផ្អាវ ដែល ស្ថិតនៅផ្នែកខាងត្បូង ទីតាំងក្រុមហ៊ុន ដែលលាតសន្ធឹងពីកើតទៅលិច ស្ថិតនៅចំណុចជាប់នឹងរបងដី នៃទីតាំងក្រុមហ៊ុន ឃើញមានទឹកពណ៌ខ្មៅដែលអាចជា ជាប្រភេទទឹកសំណល់បង្ហូរចេញពីក្រុមហ៊ុន នាពេលកន្លងមកតាមរយៈប្រឡាយចំហរ។ ក្រុមការងារ ក៏បានរកឃើញមានបំពង់ទុយោបង្កប់ (ទំហំមុខកាត់៤០សម) ប្រវែងប្រមាណ ២គីឡូម៉ែត្រពីទីតាំងក្រុមហ៊ុន សម្រាប់បង្ហូរសំណល់រាវចេញទៅព្រែកកំពង់ស្មាច់ ដែលស្ថិតនៅភូមិជ្រលង ឃុំទឹកល្អក់ ស្រុកព្រៃនប់ផងដែរ។
សូមបញ្ចាក់ថា ការបំពុលទឹកដោយធ្វើឱ្យប៉ះពាល់ដល់បរិស្ថាន ជីវៈចម្រុះ និងសុខភាពសាធារណៈដែលបានល្មើសទៅនឹងមាត្រា២៨៧នៃក្រមបរិស្ថាននិងធនធានធម្មជាតិ និងល្មើសទៅនឹងមាត្រា ៤ មាត្រា៦ និងមាត្រា៩ថ្មីនៃអនុក្រឹត្យស្តីពីការត្រួតពិនិត្យការបំពុលទឹក។ជាវិធានការចំពោះមុខ ក្រុមការងារបានណែនាំដល់ក្រុមហ៊ុនត្រូវអនុវត្តនូវវិធានការជាបន្ទាន់មួយចំនួនដើម្បីទប់ស្កាត់ការបំពុលទឹកសាធារណ ដោយការបង្ហូរទឹកកខ្វក់ចេញដោយគ្មានការត្រួតពិនិត្យនិងស្របតាមបទដ្ឋានបច្ចេកទេសត្រឹមត្រូវ។
ជាមួយគ្នានេះក្រុមការងារបានណែនាំឱ្យម្ចាស់ក្រុមហ៊ុន ត្រូវបញ្ឍប់ការបង្ហូរសំណល់រាវពីខ្សែចង្វាក់ផលិតកម្មពីទីតាំងក្រុមហ៊ុនចូលព្រែកអូរផ្អាវជាបន្ទាន់ ដោយត្រូវធ្វើការបិទភ្ជិតប្រឡាយបង្ហូរសំណល់រាវចូលព្រែកផ្អាវទាំងអស់និង ពីទីតាំងក្រុមហ៊ុន ឆ្ពោះទៅដល់ព្រែកកំពង់ស្មាច់ផងដែរ។ លើសពីនេះ ក្រុមហ៊ុន ត្រូវធ្វើការកែសម្រួលអាងប្រព្រឹត្តិកម្មសំណល់រាវ និងដំណើរការឱ្យបានត្រឹមត្រូវតាមលក្ខណៈបច្ចេកទេស និងធានាគុណភាពសំណល់រាវ ដោយអនុលោមតាមស្តង់ដាបញ្ចេញ និងត្រូវធ្វើការបំពាក់ឧបករណ៍តាមដានស្វ័យត្រួតពិនិត្យ លើការបញ្ចេញសំណល់រាវ ស្របតាមច្បាប់និងបទដ្ឋានគតិយុត្ត។លើសពីនេះក្រុមហ៊ុនត្រូវធ្វើការស្តារទឹកសំណល់ និងភក់នៅតាមដងអូរព្រែកផ្អាវ ដែលរងការបំពុល ចាប់ពីចំណុចទីតាំងក្រុមហ៊ុន រហូតដល់ព្រែកកំពង់ស្មាច់ ដើម្បីស្តារបរិស្ថានឱ្យបានស្អាតឡើងវិញ។
ជាមួយគ្នានេះ ក្រុមការងារកំពុងបន្តចុះជួបប្រជាពលរដ្ឋ ដើម្បីសិក្សាវាយតម្លៃពីផលប៉ះពាល់ផ្ទាល់ ពីការបំពុលបរិស្ថាន ដោយរោងចក្រខាងលើបន្ថែមទៀត៕
