ខេត្តកំពង់ស្ពឺ៖ ផ្លូវជាតិលេខ៤ ដែលជាផ្លូវមួយមានសក្តានុពលសម្រាប់ទាក់ទាញភ្ញៀវជាតិនិងអន្តរជាតិធ្វើដំណើរឆ្លងកាត់ទៅទេសចរណ៍នៅខេត្តព្រះសីហនុនិងខេត្តកោះកុង នឹងខេត្តនានាដែលមានតំបន់ទេសចរណ៍និងថ្នាក់ដឹកនាំធ្វើដំណើរឆ្លងកាត់ទៅកាន់ព្រលានយន្តហោះផងដែល ប៉ុន្តែភាពរញ៉េរញ៉ៃនិងការកក់ស្ទះចរាចរណ៍ ដោយផ្តើមចេញពីរអ្នកវិនិយោគ និងប្រធានផ្សារសាមគ្គី (ហៅផ្សារថ្នល់ទទឹង)យកផ្លូវធ្វើអាជីវកម្ម ចំណតផ្ញើកង់-ម៉ូតូ ខណៈអាជ្ញាធរមូលដ្ឋានបានត្រឹមតែចុះណែនាំតែមិនមានចំណាត់ការ ។
អ្នកធ្វើដំណើរ និងប្រជាពលរដ្ឋបានឲ្យដឹងថា ជារៀងរាល់យប់ថ្ងៃពួកគាត់ធ្វើដំណើរឆ្លងកាត់តាមបណ្ដោយផ្លូវជាតិលេខ៤ មកដល់ត្រង់ចំណុចផ្សារសាមគ្គី (ហៅផ្សារថ្នល់ទទឹង) ស្ថិតនៅភូមិត្រពាំងអំពិល ឃុំត្រពាំងគង ស្រុកសំរោងទង ខេត្តកំពង់ស្ពឺ បានរិះគន់ចំៗថា អាជ្ញាធរស្រុកសំរោងទង មិនគួរណាបណ្ដែតបណ្ដោយឲ្យលោកប្រធានផ្សារសាមគ្គី យកចិញ្ចើមផ្លូវសាធារណៈធ្វើជាកន្លែងអាជីវកម្មផ្ញើ កង់ ម៉ូតូ និងឱ្យអាជីវករដាក់លក់ផលិតផល និងបន្លែ ត្រី សាច់ ធ្វើឱ្យប៉ះពាល់ដល់ការធ្វើដំណើររបស់មហាជនក៏ដូចជាបងប្អូនប្រជាពលរដ្ឋដោយហេតុថា ធ្វើឱ្យចរាចរណ៍មានការកកស្ទះតាមដងផ្លូវសារធារណៈ ខណៈដែលអាជ្ញាធរមានសមត្ថកិច្ចក្នុងមូលដ្ឋានមិនអាចកែសម្រួលឲ្យមានរបៀបរៀបរយនឹងសណ្ដាប់ធ្នាប់នោះទេ។មិនថាពេលយប់ឬពេលថ្ងៃ កកស្ទះរាប់ម៉ោង ពួកគាត់ធ្វើការសំណូមពរដល់លោក មុត ភន អភិបាលស្រុកសំរោងទង និងឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ មេត្តាជួយពិនិត្យមើលផង។
បើតាមការលើកឡើងរបស់អ្នកធ្វើដំណើរ ក៏ដូចជាប្រជាពលរដ្ឋថា ការយកចិញ្ចើមផ្លូវសាធារណៈ(ផ្លូវជាតិលេខ៤) ធ្វើអាជីវកម្មលក់ដូរ និងធ្វើជាចំណតផ្ញើកង់ ម៉ូតូនេះកើតមានជាយូរណាស់មកហើយ បើទោះបីជាមានការរាយណ៍ការទៅថ្នាក់លើក៏ដោយ ក៏គ្មានវិធានការទប់ស្កាត់ឬក៏ផ្អាកសកម្មភាពមិនឱ្យលក់ដូរ និងចតម៉ូតូ រថយន្ត បានដែរ។
ប្រជាពលរដ្ឋបានបន្តទៀតថា បានជាអ្នកលក់ដូរ ខាងមុខផ្សារសាមគ្គី (ហៅផ្សារថ្នល់ទទឹង) អ្នកវិនិយោគនិងលោកប្រធានផ្សារ យកផ្លូវសាធារណៈនេះ ជួលទៅអ្នកផ្សេង យកទៅ ធ្វើជាកន្លែងផ្ញើ កង់-ម៉ូតូ និងឲ្យអាជីវករដាក់លក់ដូរយ៉ាងអាណាធិបតេយ្យ ពូកគាត់បានឲ្យដឹងទៀតថា ការទទួលផ្ញើម៉ូតូនោះគឺកំណត់ឲ្យយកម៉ូតូមួយតម្លៃ ១០០០រៀល ទោះផ្ញើ ១ម៉ោង ឬ២ម៉ោង ក៏ដោយ ពួកគាត់បានឲ្យដឹងទៀតថា បើទោះបីកន្លែងផ្ញើកង់ ម៉ូតូ បានចតហ៊ួសមកដល់ផ្លូវជាតិក៏ដោយ ក៏ក្រុមអ្នកទទួលផ្ញើរកង់ ម៉ូតូនោះ មិនខ្វល់ពីការកក់ស្ទះ ឬប៉ះពាល់ដល់អ្នកធ្វើដំណើរនោះដែរ។
ទាំងនេះជាការលើកឡើងរបស់អ្នកធ្វើដំណើរ និងប្រជាពលរដ្ឋតែប៉ុណ្ណោះ ដោយឡែកអង្គភាពសារព័ត៌មានយើងមិនទាន់បានសុំការបកស្រាយបំភ្លឺពីលោកប្រធានផ្សារសាមគ្គី (ហៅផ្សារថ្នល់ទទឹង) ខាងលើនេះបានទេ ពាក់ព័ន្ធនឹងអាជីវករយកចិញ្ចើមផ្លូវសាធារណៈធ្វើអាជីវកម្មដាក់លក់និងសាងបន្លែផ្លែឈើ និងធ្វើជាចំណតផ្ញើរកង់ ម៉ូតូ បង្ករឲ្យមានការកក់ស្ទះ រហូតមកដល់ថ្ងៃចេញផ្សាយនេះ ដោយមិនមានលេខទូរស័ព្ទទាក់ទងនោះទេ។
ដោយឡែកលោក ហែម ហ៊ន មេឃុំត្រពាំងគង បានបង្ហើបប្រាប់អ្នកសារព័ត៌មានយើងដឹងថា បញ្ហាភាពរញ៉េរញ៉ៃនៅមុខផ្សារសាមគ្គី (ហៅផ្សារថ្នល់ទទឹង) លោកទទួលស្គាល់រឿងក្រុមអាជីវករដាក់តាំងលក់ដូរហួសមកលើផ្លូវជាតិលេខ៤ រឿងនេះកើតមានយូរហើយតែលោកមិនមានតួនាទីរៀបចំសណ្ដាប់ធ្នាប់ លោកថាបញ្ហានេះគាត់មិនដឹងទេ រឿងផ្សារសាមគ្គី ហៅផ្សារថ្នល់តទឹងនេះគាត់ឈឺក្បាលណាស់។
សូមបញ្ជាក់ផងដែរថាកាលពីថ្ងៃទី២០ ខែមករា ឆ្នាំ២០២៥ អង្គភាពសារព័ត៌មានយើងបានផ្សប់ផ្សាយរឿងផ្សារសាមគ្គី(ហៅផ្សារថ្នល់ទទឹង)និងធ្វើការសំណូមពរទៅដល់លោកអភិបាលស្រុកសំរោងទង ក្រោយពីធ្វើការផ្សព្វផ្សាយរួចមកនៅថ្ងៃទី ២១ ខែមករា ឆ្នាំ២០២៥ គេបានឃើញ ក្រុមការងារនៃរដ្ឋបាលស្រុកសំរោងទង ដែលដឹកនាំដោយលោក ឈិន មុនី អភិបាលរង នៃគណៈអភិបាលស្រុកសំរោងទងអញ្ជើញចុះពិនិត្យ និងរៀបចំសណ្តាប់ធ្នាប់របៀបរៀបរយផ្លូវជាតិលេខ៤ នៅចំណុចផ្សារសាមគ្គី ភូមិត្រពាំងអំពិល ឃុំត្រពាំងគង និងផ្លូវជាតិលេខ ៤១ ចំណុចផ្សារអង្គមេត្រី ភូមិអង្គមេត្រី ឃុំរលាំងគ្រេីល ស្រុកសំរោងទង ខេត្តកំពង់ស្ពឺ បានមួយដង្ហើមចង្រិតដែរ ។
ប៉ុន្តែការរៀបចំសណ្ដាប់ធ្នាប់ខាងលើនោះប្រៀបដូចជាវែចចកកណ្ដាលបឹងអញ្ចឹង ជាក់ស្ដែងនៅថ្ងៃទី២៦ ខែមករា ឆ្នាំ២០២៥ម្សិលនេះ ក្រុមអាជីវករបានមកដាក់តាំងលក់ផលិតផលនិងបន្លែត្រីសាច់ពាសពេញចំណីផ្លូវជាតិលេខ៤ តាំងពីចំណុចផ្សារត្រពាំងអំពិល រហូតទៅដល់មុខហាងលក់ទំនិញគ្រប់មុខ ២៥០០ (ហៅហាង២៥០០) ក្នុងនោះមានចំណតផ្ញើកង់-ម៉ូតូ ចំនួនពីរកន្លែង បានទទួលបញ្ញើផ្ញើកង់.ម៉ូតូ នឹងចតហួសមកលើផ្លូវជាតិលេខ៤ ជាហេតុធ្វើឲ្យចរាចរណ៍កកស្ទះពិបាកធ្វើដំណើរខ្លាំងណាស់ ចំណុចត្រង់នេះ សបញ្ជាក់ឲ្យឃើញថា អាជ្ញាធរមូលដ្ឋានបានត្រឹមតែចុះណែនាំតែមិនមានចំណាត់ការ វាមិនខុសអីពីបទចម្រៀងមួយបទគេច្រៀងថា ក្របីស៊ីស្រូវបងមិនសូវរៀនដេញ ក្របីដើរចេញបងដេញអាស្រីមើល។
តែទោះជាយ៉ាងនេះក្តីប្រជាពលរដ្ឋ និងអ្នកធ្វើដំណើរឆ្លងកាត់ផ្សារសាមគ្គីនេះ ធ្វើការសំណូមពរដល់លោក មុត ភន អភិបាលស្រុកសំរោងទង និងជាពិសេស ឯកឧត្តមបណ្ឌិ ជាម ច័ន្ទសោភ័ណ អភិបាលខេត្តកំពង់ស្ពឺ មេត្តាជួយពិនិត្យមើលទង្វើររបស់លោកប្រធានផ្សារសាមគ្គី (ហៅផ្សារថ្នល់ទទឹង) ផងទាន បើបណ្តែតបណ្តោយតទៅទៀតច្បាស់ជាកកស្ទះចរាចរណ៍រាល់ថ្ងៃជាក់ជាមិនខានឡើយ ៕
