ខេត្តកំពង់ស្ពឺ៖ អ្នកធ្វើដំណើរឆ្លងកាត់តាមផ្លូវប្រឡាយមេមួយកន្លែងនៅក្នុងឃុំត្រពាំងគង ស្រុកសំរោងទង ខេត្តកំពង់ស្ពឺ បានលើកឡើងថាសំរាមគឺជាប្រភពមេរោគ ដែលធ្វើឱ្យប៉ះពាល់ដល់សុខភាពប្រជាពលរដ្ឋ បញ្ហានេះអាជ្ញាធរមូលដ្ឋាន និងជំនាញពាក់ព័ន្ធហាក់បីដូចជាគ្មានការទប់ស្កាត់ទាល់តែសោះ ខណៈមនុស្ស ខ្វះការគិតមួយចំនួនបានយកសំរាមមកចាក់ស្ទុបរលួយ ធ្វើឱ្យជះក្លិនស្អុយប៉ះពាល់ដល់សុខភាពប្រជាពលរដ្ឋ និងអ្នកធ្វើដំណើរឆ្លងកាត់តាមផ្លូវនោះ ។
ប្រជាពលរដ្ឋលើកឡើងថា គំនរសំរាមនៅក្បែរប្រឡាយមេនេះ រាប់ខែ ឆ្នាំកន្លងទៅហើយដែលធ្វើឱ្យជះក្លិនស្អុយ ធ្វើឱ្យ ប៉ះពាល់ដល់អ្នកធ្វើដំណើរឆ្លងកាត់តាមផ្លូវនោះប្រជាពលរដ្ឋទីតាំងដែលគេយកសំរាមទៅបោះចោលនោះស្ថិតនៅភូមិបាក់ចិញ្ជៀន ឃុំត្រពាំងគង ស្រុកសំរោងទង ខេត្តកំពង់ស្ពឺ នៅជាប់ប្រឡាយទឹកមេ ។
ប្រជាពលរដ្ឋបានបន្តថា កន្លែងចាក់សំរាមស្ទុបនោះ មានសភាពកខ្វក់ជះក្លិនស្អុយ កើតមានរាប់ខែ រាប់ឆ្នាំមកហើយ អាជ្ញាធរភូមិ ឃុំ ស្រុក ខេត្ត និងមន្ទីរពាក់ព័ន្ធហាក់បីដូចជាមិនអើពើទាល់តែសោះ។
គួររំលឹកផងដែរថាកាលពីពេលថ្មីៗនេះក្រសួងបរិស្ថានបានចេញសេចក្តីណែនាំលេខ ៣២/០១២៥ ប.ស្ថ ចុះថ្ងៃទី៣ ខែមករា ឆ្នាំ២០២៥ របស់ ឯកឧត្តមរដ្ឋក្រសួងបរិស្ថាន ស្តីពីការអនុវត្តយុទ្ធនាការសម្អាតផ្លូវជាតិ (ផ្លូវជាតិគ្មាន សំរាមប្លាស្ទិក) ក្នុងការអនុវត្តប្រមូល សម្អាត ជាប្រចាំ ដោយសមត្ថកិច្ចជំនាញពាក់ព័ន្ធ និងរដ្ឋបាលក្រុង ស្រុក បានបំផុសចលនាទៅដល់ភូមិ ឃុំ សង្កាត់ រោចក្រ សហគ្រាស វត្តអារ៉ាម សាលារៀន និងសាធារណជន រួមនិងក្រុមហ៊ុនសេវាប្រមូល ក្នុងដែនសមត្ថកិច្ច ឱ្យចូលរួមប្រមូល សម្អាត នៅតាមដងផ្លូវ សាធារណៈ ទីប្រជុំជន ជាប្រចាំ។ ទន្ទឹមនេះ មន្ទីរបរិស្ថាន រដ្ឋបាលក្រុង ស្រុក បានសហការគ្នាក្នុងការផ្សព្វផ្សាយជាសាធារណៈ ដល់ប្រជាពលរដ្ឋឱ្យចូលរួម កុំដុតប្លាស្ទិក កុំចោលប្ទាស្ទិកក្នុងទឹក កុំកប់ប្ទាស្ទិកក្នុងដី និងប្រើប្រាស់សេវាប្រមូល និងដឹកជញ្ជូនសំរាមយកទៅដាក់នៅទីលានទាំងអស់គ្នា និងរៀបចំផែនការដាំកូនឈើនៅតាមដងផ្លូវសំខាន់ឱ្យក្លាយទៅជាផ្លូវបរិស្ថាន។ ជាពិសេសបានដាក់ធុងសំរាម និងលើកផ្លាកសញ្ញាអប់រំផ្សព្វផ្សាយបរិស្ថាននៅតាមទីប្រជុំជន និងតាមដងផ្លូវសាធារណៈសំខាន់ៗមួយចំនួនផងដែរ ។
តែទោះជាយ៉ាងនេះក្តីប្រជាពលរដ្ឋនិងអ្នកធ្វើដំណើរឆ្លងកាត់ទីនោះបានធ្វើការសំណូមពរដល់អាជ្ញាធរ និងជំនាញពាក់ព័ន្ធមេត្តាជួយទប់ស្កាត់ និងបោសសំអាត ទីតាំងចាក់សំរាមនៅក្នុងភូមិបាក់ចិញ្ជៀន ឃុំត្រពាំងគង ស្រុកសំរោងទង ខេត្តកំពង់ស្ពឺផងទាន ៕
