(ខេត្តកំពង់ស្ពឺ) ព្រះវិហារថ្មី គំនូរ ព្រះពុទ្ធបដិមា ដងទង់ និងហេដ្ឋា រចនាសម្ព័ន្ធនានា ស្ថិតនៅភូមិដំណាក់ពង្រ ឃុំព្រះវិហារ ស្រុកគងពិសី ខេត្តកំពង់ស្ពឺ ត្រូវបានសម្ពោធដាក់ឱ្យប្រើប្រាស់ជាផ្លូវការ ក្រោមវត្តមានលោកបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ និងលោកជំទាវ ម៉េងវ៉ាន់ ដានីន តំណាងដ៏ខ្ពង់ខ្ពស់ឯកឧត្តមហ៊ុនម៉ានីឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមការងាររាជរដ្ឋាភិបាល ចុះជួយខេត្តកំពង់ស្ពឺ និងឯកឧត្តម យឹម សុខុម ប្រធានក្រុមប្រឹក្សាខេត្តរួមនិងប្រធានមន្ទីរអង្គភាពជុំវិញខេត្ត ឧបាសក ឧបាសិកា សមាជិក សមាជិកាប្រមាណ ៤៥០ នាក់។
នៅក្នុងឱកាសនោះ លោកបណ្ឌិត ជាម ច័ន្ទសោភ័ណ បានផ្តាំផ្ញើសាកសួរសុខទុក្ខដោយក្តីនឹករលឹកពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន សម្ដេចមហាបវរធិបតីនាយករដ្ឋមន្ត្រីនៃព្រះរាជាណាចក្រកម្ពុជា ឯកឧត្តម ហ៊ុន ម៉ានី ឯកឧត្តមអភិសន្តិបណ្ឌិត ស សុខា ផ្ញើជូនថ្នាក់ដឹកនាំ មន្ត្រីរាជការ បងប្អូនប្រជាពលរដ្ឋ លោកគ្រូ អ្នកគ្រូ សិស្សានុសិស្សដែលមានវត្តមានក្នុងកម្មវិធីនេះ ក៏ដូចជាបងប្អូនប្រជាពលរដ្ឋទូទាំងខេត្តកំពង់ស្ពឺ។
លោកបណ្ឌិត បានថ្លែងទៀតថា រាជរដ្ឋាភិបាលដែលដឹកនាំដោយសម្ដេចមហាបវរធិបតីនាយករដ្ឋមន្ត្រី បានយកចិត្តទុកដាក់លើគ្រប់វិស័យ ដូចនៅក្នុងថ្ងៃនេះព្រះវិហារថ្មីសមិទ្ធផលផ្សេងៗ អស់តម្លៃ ៩៩៧,៤៧៥$ (កៅសិបប្រាំបួនម៉ឺនប្រាំពីរពាន់បួនរយចិតសិបប្រាំដុល្លារគត់) ក្នុងនោះខេត្តកំង់ស្ពឺ គិតត្រឹមចុងខែមីនា ឆ្នាំ២០២៥នេះខេត្តកំពង់ស្ពឺ មានរោងចក្រ សហគ្រាស គ្រឹះស្ថាន ដែលបានចុះ ✓ បញ្ជីមានសរុប ១,៣៩២ កន្លែង មានកម្មករ និយោជិត សរុប ២៣៦,៨៩១ នាក់ ស្រី ១៥១,៩៤៥ នាក់ មាន សហគ្រាសធុនធ្ងន់សរុបមានចំនួន ៤៨២ កន្លែង មានកម្មករនិយោជិតសរុប ២២៧,៨៩៥ នាក់ ស្រី ១៤៨,៧១៧ នាក់ ក្នុងនោះមានរោងចក្រសហគ្រាសគ្រឹះស្ថាន បើកថ្មីក្នុងខែមីនា ឆ្នាំ២០២៥ មានចំនួន ១២ កន្លែង មានកម្មករ សរុប ៦,៨៦១ នាក់ ស្រី ៣,៤៦៦ នាក់ នេះដោយសារប្រទេសជាតិយើងមានសុខសន្តិភាព ធ្វើឱ្យវិស័យពុទ្ធចក្រ និងអាណាចក្រដើរទន្ទឹមគ្នា ដោយផ្នែកពុទ្ធចក្របានដើរតួនាទីជួយសង្គមលើការអប់រំពីអំពើល្អ អំពើមនុស្សធម៌ ចំពោះផ្នែកអាណាចក្រដែលមានការរីកចម្រើនក៏បានជួយដល់ការរីកចម្រើននៃព្រះពុទ្ធសាសនាដែរ។
លោកបណ្ឌិត បានថ្លែងប្រាប់ប្រជាពលរដ្ឋត្រូវចូលរួមការពារសុខសន្តិភាពដែលមានសព្វថ្ងៃ ឱ្យនៅគង់វង្សយូរងង្វែង ដើម្បីឱ្យប្រទេសយើងកាន់តែមានការអភិវឌ្ឍរីកចម្រើន តទៅទៀត។ ត្រូវចូលរួមគាំទ្រយុទ្ធសាស្ត្របញ្ចាចកោណរបស់រាជរដ្ឋាភិបាល ពិសេសលើការអនុវត្តគោលនយោបាយ ភូមិ ឃុំ មានសុវត្ថិភា។
លោកបណ្ឌិតបន្តថា អាជ្ញាធរ និងសមត្ថកិច្ចរបស់យើង ត្រូវតែបន្តបង្កើនការយកចិត្តទុកដាក់ឲ្យបាន កាន់តែសកម្មថែមទៀត ក្នុងការបង្ការ ទប់ស្កាត់ និងបង្ក្រាបបទល្មើសគ្រប់ប្រភេទទាំងបទល្មើស គ្រឿងញៀន ចរាចរណ៍ ល្បែងស៊ីសងខុសច្បាប់ ក្មេងទំនើង និងបទល្មើសលួច ឆក់ ប្លន់ នៅ មូលដ្ឋាន ដើម្បីធានាសុខសុវត្ថិភាពជូនប្រជាពលរដ្ឋឲ្យបានល្អប្រសើរគ្រប់ពេលវេលា និង គ្រប់កាលៈទេសៈ ជាពិសេសនៅក្នុងឱកាសបុណ្យចូលឆ្នាំថ្មី ប្រពៃណីជាតិ ខាងមុខនេះ។
