ថ្មីៗនេះ មានអង្គការមួយឈ្មោះ «អង្គការថែរក្សាបរិស្ថាន និងកសិកម្ម» ដែលបានធ្វើសកម្មភាពផ្តល់ប័ណ្ណសរសើរមេត្រីភាពដល់រូបវន្តបុគ្គល និងនីតិបុគ្គលផ្សេងៗ ដែលផ្ទុយនឹងច្បាប់ ដែលមានចែងក្នុងក្រមបរិស្ថាន និងធនធានធម្មជាតិ ត្រង់ ជំពូកទី ៥ «ការយល់ដឹងអំពីបរិស្ថាន និងមេត្រីបរិស្ថាន» ផែ្នកទី ២ អំពីមេត្រីបរិស្ថាន ក្នុងមាត្រា ៧៤៨ ដែលចែងថា «សមត្ថកិច្ចផ្តល់ការទទួលស្គាល់ និងលើកទឹកចិត្ត» ការទទួលស្គាល់ និងការលើកទឹកចិត្តដល់បុគ្គល ដែលបានចូលរួមប្រតិបត្តិសកម្មភាពមេត្រីបរិស្ថាន និងប្រើប្រាស់បច្ចេកវិទ្យាទ្រទ្រង់បរិស្ថាន ត្រូវកំណត់ដោយលិខិតបទដ្ឋានគតិយុត្ត ដែលរៀបចំដោយ ក្រសួងទទួលបន្ទុកវិស័យបរិស្ថាន និងធនធានធម្មជាតិ» ។
ដូច្នេះសកម្មភាពទាំងឡាយរបស់សមាគម ឬ អង្គការផ្សេងដែលប្រព្រឹត្តវាយតម្លៃ និងផ្តល់ប័ណ្ណសរសើរ ផ្សេងពីសមត្ថកិច្ចរបស់ក្រសួងបរិស្ថាន គឺជាសកម្មភាពខុសច្បាប់ ផ្ទុយនឹងក្រមបរិស្ថានទាំងស្រុង ។
ក្រសួងបរិស្ថាន មានអគ្គនាយកដ្ឋានចំណេះដឹង និងព័ត៌មានបរិស្ថាន គឺជាសេនាធិការមានសមត្ថកិច្ចដែលកំពុងដំណើរការប្រតិបត្តិវាយតម្លៃគុណវឌ្ឍដល់រូបវន្តបុគ្គល និងនីតិបុគ្គល និងជាអ្នកផ្តល់ប័ណ្ណសរសើរមេត្រីបរិស្ថាន យ៉ាងត្រឹមត្រូវ ។
ក្នុងសេចក្តីជូនដំណឹងរបស់ក្រសួងបរិស្ថាន លេខ ២១៨៥/សជណ ០៣២៥ ប.ស្ថ/អចព ចុះថ្ងៃ ១៨ ខែមីនា ឆ្នាំ ២០២៥ ឲ្យអង្គការមួយនេះ ឬប្រធានអង្គការ បញ្ឈប់ជាបន្ទាន់នូវសកម្មភាពផ្តល់ប័ណ្ណសរសើរមេត្រីបរិស្ថានដល់រូបវន្តបុគ្គល ឬនីតិបុគ្គលទាំងឡាយណាដែលប្រាសចាកនឹងច្បាប់ ដែលនាំឲ្យមានការភ័ន្តច្រឡំដល់សាធារណជនអំពីការផ្តល់ប័ណ្ណសរសើរមេត្រីបរិស្ថាន ដែលមាន«ស្តង់ដារពីរ» ចាប់ពីថ្ងៃជូនដំណឹងតទៅ ៕
