ខេត្តកំពង់ស្ពឺ÷ អាវុធហត្ថខេត្តកំពង់ស្ពឺឃាត់ខ្លួនជនសង្ស័យ០៣នាក់ និងដកហូតថ្នាំញៀនចំនួន០៦ កញ្ចប់ធំ នៅត្រង់ចំណុចមុខផ្ទះសំណាក់(ដើមព្រីង) ស្ថិតនៅក្នុងឃុំត្រពាំងគង ស្រុកសំរោងទង ខេត្តកំពង់ស្ពឺ និងបញ្ជូនខ្លួនទៅកាត់សាលាដំបូងខេត្តកំពង់ស្ពឺ ។
ដោយបានការអនុញ្ញាតពីលោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ និងមានការសម្របសម្រួលពីលោក ទិន សុចិត្រា ព្រះរាជអាជ្ញារងអមសាលាដំបូងខេត្តកំពង់ស្ពឺ កម្លាំងមន្ទីរស្រាវជ្រាវបង្រ្កាបបទល្មើស សហការ ជាមួយកម្លាំងមូលដ្ឋានកងរាជអាវុធហត្ថក្រុងច្បារមន ដឹកនាំ លោកវរសេនីយ៍ទោ ណុល ដារ៉ា.នៅវេលាម៉ោង១២:៤៧នាទីរសៀល ថ្ងៃទី០៦ ខែមេសា ឆ្នាំ២០២៥ បានបង្រ្កាបករណីគ្រឿងញៀន និងឃាត់ខ្លួនជនសង្ស័យចំនួន០២នាក់ ពាក់ព័ន្ធករណីរក្សាទុក ចែកចាយ និងជួញដូរ ដោយខុសច្បាប់នៅសារធាតុញៀន នៅចំនុចមុខផ្ទះសំណាក់(ដើមព្រីង) ស្ថិតនៅភូមិអូរក្រាំងអំបិល ឃុំត្រពាំងគង ស្រុកសំរោងទង ខេត្តកំពង់ស្ពឺ ។
លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ បានឲ្យដឹងថាជនសង្ស័យដែលកម្លាំងអាវុធហត្ថឃាត់ខ្លួនរួមមាន៖
១.ឈ្មោះ លីម ហុងសួរ ភេទប្រុស អាយុ១៧ឆ្នាំ មុខរបរពុំពិតប្រាកដ មានទីលំនៅបច្ចុប្បន្ន ភូមិព្រៃផ្តៅ ឃុំត្រពាំងគង ស្រុកសំរោងទង ខេត្តកំពង់ស្ពឺ។
២.ឈ្មោះ ណាត កត្ថា ភេទស្រី អាយុ២០ឆ្នាំ មុខរបរមិនពិតប្រាកដ មានទីលំនៅបច្ចុប្បន្ន ភូមិព្រៃផ្តៅ ឃុំត្រពាំងគង ស្រុកសំរោងទង ខេត្តកំពង់ស្ពឺ ។
នៅក្នុងប្រតិបត្តិការបង្ក្រាបនោះកម្លាំងអាវុធហត្ថបានចាប់យកវត្ថុតាងរួមមាន:
១-ក្រាមពណ៌សថ្លាសង្ស័យសារធាតុញៀនចំនួន ០២កញ្ចប់ធំល្មម។
២-ទូរស័ព្ទចំនួន២គ្រឿង. ៣-ម៉ូតូចំនួន១គ្រឿង. ៤-ថង់ច្រកថ្នាំនិងឧបករណ៍ប្រើប្រាស់គ្រឿងញៀនមួយចំនួន។
លោកឧត្តមសេនីយ៍ត្រី ម៉េង ស្រ៊ុន បានឲ្យដឹងទៀតថាក្រោយពីកម្លាំងអាវុធហត្ថបានសាកសួរ និងតាមការឆ្លើយបំភ្លឺ ពីជនសង្ស័យឈ្មោះ លីម ហុងសួរ -វេលាម៉ោង១៤:០០នាទីរសៀល ថ្ងៃ-ខែ-ឆ្នាំ ដដែល កម្លាំងអាវុធហត្ថបានបន្តរក ឈ្មោះ ហេង សៀងមុី ដែលជាអ្នកពីក្រោយខ្នង នឹងបានឈានទៅដល់ធ្វើការឃាត់ខ្លួនជនសង្ស័យឈ្មោះ ហេង សៀងមុី ភេទប្រុស អាយុ៣២ឆ្នាំ មុខរបរមិនពិតប្រាកដ នៅភូមិព្រៃផ្តៅ ឃុំត្រពាំងគង ស្រុកសំរោងទង ខេត្តកំពង់ស្ពឺ ។
ក្នុងនោះកម្លាំងអាវុធហត្ថបានចាប់យកវត្ថុតាងរួមមាន÷
១-ក្រាមពណ៌សថ្លាសង្ស័យសារធាតុញៀនចំនួន ០២កញ្ចប់ធំ។ ២-ទូរស័ព្ទចំនួន១គ្រឿង។ ៣-ម៉ូតូចំនួន១គ្រឿង។ ៤-ថង់ច្រកថ្នាំគ្រឿងញៀនមួយចំនួន។
លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ បានបន្ថែមទៀតថា នៅវេលាម៉ោង១៥:៥៧នាទីរសៀល ថ្ងៃ-ខែ-ឆ្នាំ ដដែល កម្លាំងជំនាញកងរាជអាវុធហត្ថ បានបន្តឆែកឆេរ ផ្ទះ ឈ្មោះ លីម ហុងសួរ ស្ថិតនៅភូមិព្រៃផ្តៅ ឃុំត្រពាំងគង ស្រុកសំរោងទង ខេត្តកំពង់ស្ពឺ និងចាប់យកវត្ថុតាងរួមមាន ក្រាមពណ៌សថ្លាសង្ស័យសារធាតុញៀនចំនួន ០២កញ្ចប់ធំ។
បច្ចុប្បន្ន ជនសង្ស័យ និងវត្ថុតាំង ត្រូវបានបញ្ជូនទៅបញ្ជាការដ្ឋានកងរាជអាវុធហត្ថខេត្តកំពង់ស្ពឺ និងបញ្ជូនបន្តទៅកាន់សាលាដំបូងខេត្តកំពង់ស្ពឺ ដើម្បីបន្តនីតិវិធី។
ជាការសំណូមពរនឹងស្នើសុំពីប្រជាពលរដ្ឋសូមឲ្យអាជ្ញាធរនិងសមត្ថកិច្ចពាក់ព័ន្ធជួយទប់ស្កាត់ក្រុមក្មេងស្ទាវនៅពេលយប់ផង ដោយពួកគាត់សង្កេតឃើញក្មេងស្ទាវទាំងនោះតែងតែធ្វើសកម្មភាពពពាក់ពពួននៅម្តុំផ្ទះសំណាក់ខាងលើនេះ ដោយក្រុមក្មេងទាំងនោះមិនដឹងធ្វើអ្វី.! សង្ស័យចែកចាយនៅសារធាតុញៀនផងក៏មិនដឹង.! ជាហេតុធ្វើឲ្យពួកគាត់ព្រួយបារម្ភ និងមានការភ័យខ្លាចពីសន្តិសុខរបស់ពួកគាត់ផងដែរ ៕
