ខេត្តកំពង់ចាម៖ ទីតាំងល្បែងមាន់ជល់អនឡាញមួយកន្លែងដែលគេស្គាល់ច្បាស់របស់ចែ ភួង បើកដំណើរការលេងភ្នាល់ដាក់លុយចាញ់ឈ្នះរាប់រយពាន់ដុល្លារ ប៉ុន្តែអាជ្ញាធរនិងសមត្ថកិច្ចជំនាញ ហាក់បីដូចជាគ្មានវិធានបង្ក្រាបទាល់តែសោះ។
តាមប្រភពព័ត៌មានបានបង្ហើបឱ្យដឹងថា ល្បែងមាន់ជល់អនឡាញនេះស្ថិតនៅតាមបណ្តោយផ្លូវក្រាលកៅស៊ូ ក្នុងភូមិព្រៃទទឹង ឃុំឬស្សីស្រុក ស្រុកស្រីសន្ធរ ខេត្តកំពង់ចាម ម្ចាស់មានឈ្មោះ ចែ ភួង អាយុជាង៣០ឆ្នាំ ប្តីឈ្មោះ វុធ អាយុ ជាង៤០ឆ្នាំ។ ហើយការល្បែងមាន់ជល់អនឡាញនេះចាប់លេងពីម៉ោង៨ព្រឹករហូតដល់ម៉ោង៦ល្ងាច។ ហើយពេលយប់ចាប់ពីម៉ោង៧ រហូតដល់ម៉ោង១២រំលងអាធ្រាត្រ ដែលមានអ្នកញៀនល្បែងចូលលេងយ៉ាងច្រើន ភ្នាល់លុយចាញ់រាប់រយពាន់ដុល្លារក៏មានទាំងលុយរៀល ក្នុងមួយគូរៗ ចាប់ពី១០ម៉ឺនរៀល រហូតដល់១លានរៀលថែមទៀតផង។
ប្រភពព័ត៌មានបានបន្តថា ម្ចាស់ទីតាំងល្បែងមាន់ជល់អនឡាញធ្លាប់បានបោះពាក្យសម្តីថា រូបគេមិនខ្លាចក្នុងការបើកលេងល្បែងមាន់ជល់អនឡាញនេះទេ ដោយសារតែមានខ្នងបង្អែកនៅពីក្រោយធំៗណាស់។ អ្វីដែលប្រជាពលរដ្ឋរស់នៅក្បែរទីតាំងល្បែងមាន់ជល់អនឡាញមានក្តីកង្វល់ និងមានការព្រួយបារម្ភនោះ គឺខ្លាចមានកើតអំពើលួច ឆក់ ប្លន់ អំពើហិង្សាក្នុងគ្រួសារ និងអំពើផ្សេង ដោយសារតែលេងចាញ់ល្បែងនោះ។
ប្រជាពលរដ្ឋសង្ឃឹមថា អាជ្ញាធរនិងសមត្ថកិច្ចជំនាញនិងមានវិធានការទប់ស្កាត់ និងចុះបង្ក្រាបទីតាំងល្បែងមាន់ជល់អនឡាញ របស់ ចែ ភួង ដែលកំពុងតែបើកដំណើរការលេងទាំងថ្ងៃទាំងយប់ខាងលើនេះ។
ម្យ៉ាងវិញទៀតប្រជាពលរដ្ឋ ធ្វើការសំណូមពរដល់លោកមេបញ្ជាការកងរាជអាវុធហត្ថខេត្ត លោកស្នងការនគរបាលខេត្ត និង ឯកឧត្តម អ៊ុន ចាន់ដា អភិបាលខេត្តកំពង់ចាមមេត្តាជួយចាត់មន្ត្រីជំនាញចុះបង្ក្រាប និងបិទទីតាំងល្បែងមាន់ជល់អនឡាញរបស់ ចែ ភួង នេះផងទាន៕
