ខេត្តកំពង់ស្ពឺ÷ ក្រោយពីមានបណ្ដាញសារព័ត៌មាននិងអ្នកលេងនៅតាមបណ្ដាញសង្គមបានចុះផ្សាយ និងធ្វើការបង្ហោះ ថាមានទីតាំងលួចលាក់បង្កប់លេងល្បែងអនឡាញប្រភេទ កាសស៊ីណូ ដែលទីតាំងខាងលើនេះកន្លងមកត្រូវបានកម្លាំងកងរាជអាវុធហត្ថខេត្តកំពង់ស្ពឺចុះបង្ក្រាប ឥឡូវចាប់បើកដំណើរការជាធម្មតា និងសំបូរទៅដោយជនជាតិចិន និងខ្មែរចេញ.ចូលលេងផងនោះ ដែលស្ថិតនៅតាមបណ្ដោយផ្លូវជាតិលេខ០៤ នៅត្រង់ចំណុចភូមិព្រែកគុយ ឃុំត្រពាំងគង ស្រុកសំរោងទង ខេត្តកំពង់ស្ពឺ។
ក្រោយពីទទួលបានព័ត៌មាននៅថ្ងៃទី១៨ ខែឧសភា ឆ្នាំ២០២៥ ទីតាំងខាងលើនេះត្រូវបានបិទហើយ ហើយករណីខាងលើនេះសមត្ថកិច្ចសូមសំណូមពរដល់បងប្អូនអ្នកសារព័ត៌មាន និងអ្នកលេងនៅតាមបណ្ដាញសង្គមទាំងអស់ សូមកុំចែករំលែករូបភាពចាស់បន្តទៀតអីកុំឱ្យមានការភាន់ច្រឡំ ។
សូមបញ្ជាក់ថាកន្លងមកកម្លាំងសមត្ថកិច្ចយើងបានអនុវត្តទៅតាមបទបញ្ជារបស់ឯកឧត្តមបណ្ឌិត ជាម ច័ន្ទសុភ័ណ្ឌ អភិបាលនៃគណៈអភិបាលខេត្តកំពង់ស្ពឺ និងលោកឧត្តមសេនីយ៍ទោ ឃឹម សុខៃ ស្នងការនគរបាលខេត្តកំពង់ស្ពឺ និងគោរពតាមសារាចរណែនាំរបស់ក្រសួងមហាផ្ទៃ ស្តីពី ការបញ្ឈប់សកម្មភាពផ្សព្វផ្សាយល្បែងស៊ីសងខុសច្បាប់ ហើយកម្លាំងសមត្ថកិច្ចយើងបានបន្តពិនិត្យតាមដាននូវរាល់សកម្មភាព ទីតាំងបើកល្បែងស៊ីសងគ្រប់ប្រភេទដើម្បីចូលរួមទប់ស្កាត់ការលេងល្បែងស៊ីសង ខុសច្បាប់ដែលជាផ្នែកមួយនៃការអនុវត្តគោលនយោបាយ “ភូមិ-ឃុំ-សង្កាត់មានសុវត្ថិភាព” របស់ រាជរដ្ឋាភិបាលផងដែរ ៕
