ខេត្តកំពង់ស្ពឺ៖ ប្រហែលមានខ្សែអ្នកធំហើយទើបរោងម៉ាស៊ីន ខ្នាតយក្សមួយកន្លែងដោយប្រើប្រភេទម៉ាស៊ីនរ៉ៃ និងម៉ាស៊ីនថាសជាច្រើនគ្រឿង បានធ្វើសកម្មភាពអាជ្រៀកឈើយ៉ាងគគ្រឹកគគ្រេង ជារៀងរាល់ថ្ងៃ តែសមត្ថកិច្ច និងមន្ត្រីជំនាញរដ្ឋបាលព្រៃឈើហាក់មើលរំលង ។
សេចក្តីរាយការណ៍បានឲ្យអង្គភាពសារព័ត៌មាន ស៊ីអិនធី ហតញូយ៍ ដឹងថាមានរោងសិប្បកម្មអាច្រៀកឈើខ្នាតយក្សមួយកន្លែងដោយប្រើប្រភេទម៉ាស៊ីនរ៉ៃ និងម៉ាស៊ីនថាសជាច្រើនគ្រឿង គេស្គាល់ម្ចាស់ឈ្មោះ ថៅកែ ម៉ៅ ជាមេឈ្មួញដុះស្លែយូរហើង កំពុងធ្វើសកម្មភាពអាជ្រៀគឈើជាយូរខែឆ្នាំមកហើយនៅក្នុងលំនៅដ្ឋានរបស់ខ្លួនដែលហ៊ុមព័ទ្ធទៅដោយរបងថ្មជុំវិញ ស្ថិតនៅក្នុងភូមិព្រៃខ្លា ឃុំពោធិ៍អង្គ្រង ស្រុកបសេដ្ឋ ខេត្តកំពង់ស្ពឺ ប៉ុន្តែសមត្ថកិច្ច និងមន្ត្រីជំនាញរដ្ឋបាលព្រៃឈើ មិនចុះបង្ក្រាប ប្រជាពលរដ្ឋថា ឱ្យសមត្ថកិច្ច និងមន្ត្រីជំនាញរដ្ឋបាលព្រៃឈើបង្ក្រាបមិចកើត បើសមត្ថកិច្ច និងមន្ត្រីជំនាញរដ្ឋបាលព្រៃឈើនោះ ជាប់ត្រគៀកងាកមិនរួច សង្ស័យមេឈ្មួញឈ្មោះថៅកែ ម៉ៅ ឲ្យលេបថ្នាំប៉ារ៉ាសេដតាម៉ុលជ្រុលទើបធ្វើឲ្យងងី ងងើស្រវាំងភ្នែក មើលមិនឃើញ ត្រចៀកថ្លង់ស្ដាប់មិនឮអ្វីទាំងអស់ ។
ជាក់ស្តែងនៅថ្ងៃទី២៦ ខែឧសភា ឆ្នាំ២០២៥ ក្រុមអ្នកសារព័ត៌មាន ស៊ីអិនធី ហតញូយ៍ បានចុះទៅផ្តិតយករូបភាពពីសកម្មភាពអាជ្រៀកឈើរបស់ថៅកែ ម៉ៅ ឃើញមានឈើដុលជាច្រើនកំណាត់ ដែលថៅកែឈ្មោះ ម៉ៅ បានដាក់ពង្រាយជាច្រើនកន្លែងនៅក្នុងដីលំនៅឋានរបស់ខ្លួន នឹងធ្វើសកម្មភាពអាចជ្រៀកឈើទាំងថ្ងៃដោយប្រើប្រភេទម៉ាស៊ីនរ៉ៃ និងម៉ាស៊ីនថាសជាច្រើនគ្រឿងលាន់ឮរំពង មិនឃើញសមត្ថកិច្ច និងមន្ត្រីរដ្ឋបាលព្រៃឈើបង្ក្រាបសោះ ។
ប្រជាពលរដ្ឋម្នាក់សុំលក្ខខណ្ឌមិនបញ្ចេញឈ្មោះបានបង្ហើបឲ្យអ្នកសារព័ត៌មានយើងដឹងថា រោងសិប្បកម្មអាជ្រាបឈើខាងលើនេះសង្ស័យមិនមានច្បាប់អនុញ្ញាតនោះទេ.! ដែលកំពង់ធ្វើសកម្មភាពអាជ្រៀកឈើទាំងថ្ងៃទាំងយប់មិនតែប៉ុណ្ណោះពេលធ្វើសកម្មភាពអាឈើម្ដងៗ សំឡេងម៉ាស៊ីនលាន់ឮខ្លាំងរំលងពីផ្ទះមួយទៅផ្ទះមួយ រំខានពួកគាត់រកពេលសម្រាកពេលថ្ងៃមិនបាន ម្យ៉ាងទៀតពេលយប់មានរថយន្ត ឬរ៉ឺម៉ក មកទម្លាក់ឈើ នឹងលើកឈើឡើងម្ដងៗ ឮសំឡេងក្តូងក្តាំងរកពេលដេកពួនមិនបាន ពួកគាត់ឆ្ងល់ថា តើហេតុអ្វីបានជាថៅកែឈ្មោះ ម៉ៅ អាចដាក់រោងម៉ាស៊ីន ប្រើប្រភេទម៉ាស៊ីនរ៉ៃ និងម៉ាស៊ីនថាស់ជាច្រើនគ្រឿង នៅកណ្ដាលភូមិ នឹងធ្វើសកម្មភាពអាជ្រៀកឈើដោយមិនគិតពីផលប៉ះពាល់របស់ពួកគាត់អញ្ជឹង សង្ស័យថៅកែឈ្មោះ ម៉ៅ បានសែនព្រេនដល់អ្នកតាម្ចាស់ទឹកម្ចាស់ដី ឬមន្ត្រីជំនាញរដ្ឋបាលព្រៃឈើ និងជំនាញពាក់ព័ន្ធទាំងអស់ បានសើមមាត់សើមករ អស់ហើយទេដឹង? ទើបសកម្មភាពអាចឈើនេះទៅដោយរលូនមិនមានការបង្ក្រាប ។
គួររំលឹកផងដែរកាលពីកន្លងទៅនៅថ្ងៃទី២០ ខែកុម្ភៈ ឆ្នាំ២០២៥ អង្គភាពសារព័ត៌មាន ស៊ីអិនធី ហតញូយ៍ លោក បានរាយការណ៍ជូនលោក យឹម ណន ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ស្ពឺ ពាក់ព័ន្ធនឹងរោងសិប្បកម្មអាច្រៀកឈើខ្នាតយក្សប្រើប្រភេទម៉ាស៊ីនរ៉ៃ របស់ថៅកែ ម៉ៅ នៅក្នុងភូមិព្រៃខ្លា ឃុំពោធិ៍អង្គ្រង និងរោងម៉ាស៊ីន (ម៉ាស៊ីនរ៉ៃ)របស់ថៅកែឈ្មោះ ធី នៅក្នុងភូមិឃ្លៃថ្មី ឃុំពោធិ៍ចំរើន ស្រុកបសេដ្ឋ ខេត្តកំពង់ស្ពឺ។ ក្នុងនោះគេឃើញសមត្ថកិច្ចឆ្លៀតពេលចុះបង្ក្រាបបានឈើ និងខ្មោចម៉ាស៊ីនរ៉ៃ កញ្ចាស់បញ្ឈរ១គ្រឿង នៅក្នុងឃុំពោធិ៍ចំរើន ស្រុកបសេដ្ឋ ខេត្តកំពង់ស្ពឺ ដឹកនាំដោយ លោក រតន: ឧត្តម អធិការរង និងកម្លាំងក្រុមការងាររបស់ស្រុក ដឹកនាំដោយលោក សួង រុន អភិបាលរងនឹងកម្លាំងរដ្ឋបាលព្រៃឈើផងដែរ និងរឹបអូសបានវត្ថុតាងមួយចំនួន ចំណែកម្ចាស់សិប្បកម្មអាចជ្រៀកឈើបានរត់គេចខ្លួនបាត់ស្រមោល។
ប្រជាពលរដ្ឋឆ្ងល់និងសួរមកអ្នកសារព័ត៌មានយើងថាហេតុអ្វីកន្លែងផ្សេងទៀតសមត្ថកិច្ចមិនបង្ក្រាប អ្នកសារព័ត៌មានយើងបានសួរបន្តទៅលោក យឹម ណន ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ស្ពឺ លោកថាទីតាំងពីរកន្លែងនោះលោកកំពុងតែស្នើសុំ ដីការពីតុលាការ ព្រោះទីតាំងនោះនៅក្នុងផ្ទះ ។ ប៉ុន្តែរហូតមកដល់រសៀលថ្ងៃទី២៦ ខែឧសភា ឆ្នាំ២០២៥ ទីតាំងរោងសិប្បកម្មអាជ្រៀតឈើរបស់ថៅកែ ម៉ៅ នៅតែបន្តសកម្មភាពអាជ្រៀតឈើដដែល.! ហើយអ្នកសារព័ត៌មានយើងបានរាយការណ៍ជូនទៅលោក យឹម ណន ម្តងទៀត តាមប្រព័ន្ធតេឡេក្រាម លោកបានឆ្លើយតបយ៉ាងខ្លីថា (អរគុណច្រើនខ្ញុំឲ្យមន្ត្រីទៅមើលសិន)
ប្រជាពលរដ្ឋមានការងឿងឆ្ងល់ថាតើម្ចាស់រោងសិប្បកម្មអាចជ្រៀតឈើខ្នាតយក្សមួយកន្លែងដោយប្រើប្រភេទម៉ាស៊ីនរ៉ៃ និងម៉ាស៊ីនថាសជាច្រើនរបស់ថៅកែ ម៉ៅ នឹងជាមេឈ្មួញចាស់វស្សា ជាយូរឆ្នាំហើយនោះប្រហែលមានយីអ៊ុនខ្ពស់ (ឬសមានខ្សែអ្នកធំ) បានជាសមត្ថកិច្ចនិងមន្ត្រីជំនាញពាក់ព័ន្ធមិនហ៊ានប៉ះ ខណ:ទីតាំងខាងលើនៅតែបន្តសកម្មភាពអាជ្រៀកឈើរៀងរាល់ថ្ងៃនោះ។
ដោយឡែកលោកឧត្តមសេនីយ៍ មេបញ្ជាការកងរាជអាវុធហត្ថខេត្តកំពង់ស្ពឺ អ្នកព័ត៌មានយើងបានធ្វើសេចក្តីរាយការណ៍ជូនតាមប្រព័ន្ធតេឡេក្រាម លោកបានឆ្លើយតបយ៉ាងខ្លីដែរថា(ចាំខ្ញុំអោយជំនាញចុះទៅពិនិត្យ)
សូមបញ្ជាក់ថារោងសិប្បកម្មអាច្រៀកឈើខ្នាតយក្សប្រើប្រភេទ,ម៉ាស៊ីនរ៉ៃ នៅក្នុងភូមិព្រៃខ្លា ឃុំពោធិ៍អង្គ្រង ស្រុកបសេដ្ឋ ខេត្តកំពង់ស្ពឺ មិនមែនមានតែថៅកែឈ្មោះ ម៉ៅ ម្នាក់នោះទេ នៅមានថៅកែជាច្រើននាក់ទៀតកំពុងតែប្រព្រឹត្តបទល្មើស ដូច្នេះស្នើសុំសមត្ថកិច្ច និងមន្ត្រីជំនាញរដ្ឋបាលព្រៃឈើជាពិសេសមន្ត្រីជំនាញពាក់ព័ន្ធទាំងអស់គួរតែបើកការស៊ើបអង្កេតនិងចុះបង្ក្រាបផងទាន.៕
