ខេត្តកំពត៖ ឈើជាច្រើនកំណត់បានដាក់ពង្រាយនៅក្នុងរោងសិប្បកម្មកែច្នៃឈើ និងអាជ្រៀតឈើខ្នាតធំមួយកន្លែងសង្ស័យគ្មានច្បាប់ បាននិងកំពុងធ្វើសកម្មភាព កែច្នៃឈើនិងអារច្រៀកដោយប្រើប្រភេទម៉ាស៊ីនរ៉ៃ ជារៀងរាល់ថ្ងៃ សមត្ថកិច្ចនិង មន្ត្រីជំនាញពាក់ព័ន្ធហាក់បីដូចជាមិនមានឆន្ទះក្នុង ការបង្ក្រាបសោះ ។
សេចក្តីរាយការណ៍បានប្រាប់ឲ្យដឹងថា កន្លែងកែច្នៃឈើ និងអាជ្រៀកឈើដោយប្រើប្រភេទម៉ាស៊ីនរ៉ៃ មួយកន្លែងនេះដែលមានម្ចាស់ឈ្មោះ តា មោក អាយុប្រហែជាង ៥០ឆ្នាំ មានទីតាំងស្ថិតនៅក្នុងភូមិព្រៃខ្មៅ ឃុំស្រែក្នុង ស្រុកជល់គីរី ខេត្តកំពត បានធ្វើសកម្មភាពកែច្នៃឈើ និងអារឈើជារៀងរាល់ថ្ងៃដោយមិនខ្លាច ញញើតច្បាប់អ្វីបន្តិចសោះ។
ជាក់ស្ដែងនៅថ្ងៃទី២៩ ខែឧសភា ឆ្នាំ២០២៥ សំឡេងម៉ាស៊ីនកែច្នៃឈើបានលាន់ឮចេញពីក្នុងរោងសិប្បកម្ម ដោយក្រុមជាងកំពុងតែសម្រុកធ្វើយ៉ាងមមាញឹកដោយមិនមានពេលឈប់សម្រាក ខណៈម្ចាស់សិប្បកម្មឈ្មោះ តា មោក ឈរពិនិត្យមើលពីសកម្មភាពក្រុមជាងកំពុងតែកែច្នៃឈើផងដែរ។ (តើម្ចាស់សិប្បកម្មឈ្មោះ តា មោក មានខ្សែអ្នកធំមែនទេ.?) បានជារោងសិប្បកម្មកែច្នៃឈើនិងអាជ្រៀកឈើប្រើប្រភេទម៉ាស៊ីរ៉ៃ របស់គាត់ បើក ដំណើរការបានយ៉ាងរលូនដូច្នេះនោះ ។
ប្រភពសុំលក្ខខណ្ឌមិនបញ្ចេញឈ្មោះបានប្រាប់ថារាល់ថ្ងៃរោងសិប្បកម្មកែច្នៃឈើ និងអាជ្រៀកឈើមួយកន្លែងនេះបានធ្វើសកម្មភាពអារជារៀងរាល់ថ្ងៃដែលធ្វើឲ្យពួកគាត់ពិបាកក្នុងការរស់នៅ ជួបនឹងការហុយពិបាកដកដង្ហើមទ្រាំនឹងក្លិនអាចម៍រណាស្ទើរតែមិនបាន សំឡេងម៉ាស៊ីនលាន់ឮរំខានរកពេលសម្រាកមិនបាន
ម្យ៉ាងទៀតពេលយប់មានរថយន្ត ឬរ៉ឺម៉កមកទម្លាក់ឈើ នឹងលើកឈើឡើងម្ដងៗឮស្នូរក្តូងក្តាំងរកពេលដេកពួនមិនបាន
ពួកគាត់ឆ្ងល់ថាហេតុអ្វីរោងសិប្បកម្មកែច្នៃឈើ និងអាជ្រៀតឈើខ្នាតធំ ដោយប្រើប្រភេទម៉ាស៊ីនរ៉ៃ របស់ តា មោក អាចបើកដំណើរការនៅក្នុងភូមិបានដោយមិនគិតពីផលប៉ះពាល់ដល់ពួកគាត់ សង្ស័យ តា មោក បានសែនព្រេនដល់អ្នកតាម្ចាស់ទឹកម្ចាស់ដី ឬមន្ត្រីជំនាញពាក់ព័ន្ធអស់ហើយទេដឹង? ទើបបើកដំណើរការបានរលូនបែបនេះនោះ។
ប្រជាពលរដ្ឋសំណូមពរដល់ សមត្ថកិច្ច និងជំនាញពាក់ព័ន្ធមេត្តាជួយចុះពិនិត្យ ទប់ស្កាត់រោងសិប្បកម្មកែច្នៃឈើ និងអាជ្រៀកឈើដែលមានម្ចាស់ឈ្មោះ តា មោក. សង្ស័យគ្មានច្បាប់អនុញ្ញាតនេះផង៕
