ខេត្តកំពង់ស្ពឺ÷ នៅព្រឹកថ្ងៃទី៥ ខែមិថុនា ឆ្នាំ២០២៥ ក្រុមការងារនគរបាលស្រុកសំរោងទងបាននាំយកថវិកាចុះទៅសួរសុខទុក្ខ កម្លាំងប្រជាការពារ ដែលកំពុងសម្រាកព្យាបាលជម្ងឺ នៅមន្ទីរពេទ្យ ដោយសារគ្រោះថ្នាក់ចរាចរណ៍ កាលពីថ្ងៃទី៣ ខែមិថុនា ឆ្នាំ២០២៥ នៅតាមបណ្ដោយផ្លូវជាតិលេខ៤ ស្ថិតនៅក្នុងឃុំត្រពាំងគង ស្រុកសំរោងទង ខេត្តកំពង់ស្ពឺ។
លោកវរសេនីយ៍ឯក ឃុត សុផល អធិការនគរបាលស្រុកសំរោងទង បានឲ្យដឹងថា ដោយមានការ យកចិត្តទុកដាក់ពីលោកឧត្តមសេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ ក្រុមការងារនគរបាលស្រុកសំរោងទងបាននាំយកថវិកាចុះទៅសួរសុខទុក្ខ លោក ផូ អុីម អាយុ ៤៨ឆ្នាំ រស់នៅភូមិរំដួល ឃុំត្រពាំងគង ជាកម្លាំងប្រជាការពារ ដែលបានជួបគ្រោះថ្នាក់ចរាចរណ៍ ពេលកំពុងរាយសាជីជួយសម្រួលចរាចរណ៍ជូនកម្មករ កម្មការនី នៅមុខរោងចក្រសាប្រ៊ីណា ដែលកំពុងសម្រាកព្យាបាលជម្ងឺ នៅមន្ទីរពេទ្យបង្អែកខេត្តកំពង់ស្ពឺ ។
លោក ឃុត សុផល បានបន្ថែមឲ្យដឹងទៀតថា ថវិកាដែលក្រុមការងារនាំយកទៅនោះមានចំនួន ៦០០,០០០៛ (ប្រាំមួយរយពាន់រៀលគត់)និងទឹកបរិសុទ្ធ ២កេះ ទឹកផ្លៃឈើ ១កេះ ក្នុងនោះថវិកា កងកម្លាំងនគរបាលស្រុកសំរោងទងមានចំនួន ៥០០,០០០រៀល និងថវិកា លោក ឈា វិនុត ប្រធានសហជីព រោងចក្រសាប៊្រីណា ចំនួន ១០០,០០០រៀលផងដែរ ៕
