ខេត្តបាត់ដំបង÷ សេចក្កីរាយការណ៍បានឱ្យដឹងថាមានទីតាំងលេងល្បែងអនឡាញជាច្រើនកន្លែង កំពុងតែបើកដំណើរការទទួលក្រុមអ្នកញៀនល្បែង ឱ្យចូលលេងយ៉ាងណាធិបតេយ្យពពាក់ពពួនមិនខ្លាចញញើតនិងច្បាប់បន្តិចសោះ និងបានបំពានទៅនឹងចរាចរណ៍ណែនាំរបស់ក្រសួងមហាផ្ទៃ (សង្ស័យអាងខ្នងបង្អែកអ្នកធំ) ដែលស្ថិតនៅក្នុងក្រុងបាត់ដំបង ខេត្តបាត់ដំបង។
ជាក់ស្តែងប៉ុន្មានថ្ងៃកន្លងមកនេះក្រុមការងារសារព័ត៌មានយើងបានចុះផ្តិតយករូបភាពនៅទីតាំងល្បែងស៊ីសងមួយចំនួនមានដូចជា ១.ទីតាំងជាប់តារាងប៊ូលផ្សារបឹងឈូក ក្រុងបាត់ដំបង ខេត្តបាត់ដំបង, ២. ទីតាំងទួលតាឯកនៅក្នុងតារាងបាល់ទះ, ៣.ទីតាំងនៅក្នុងរបងជាប់តារាងបាល់ទះទួលតាឯក (ភូមិទួលតាឯក ឃុំទួលតាឯក ក្រុងបាត់ដំបង ខេត្តបាត់ដំបង,។ នឹងនៅមានតាមបណ្ដាលស្រុកមួយចំនួនទៀតដូចជាទីតាំងនៅក្នុងហាងគុយទាវ ទល់មុខខ្លោងទ្វារវត្តខ្វែង ភូមិខ្វែង ឃុំអូរដំបង ស្រុកសង្កែ ខេត្តបាត់ដំបង, និងទីតាំងជាប់តារាងប៊ូលក្រោយវត្តបាឡាត់, ទីតាំងក្រោយសាលាបឋមសិក្សាឈើទាល ឃុំឈើទាល ស្រុកបាណន់ ខេត្តបាត់ដំបង និងទីតាំងអនឡាញជាច្រើនកន្លែងទៀតដូចជានៅជិតផ្ទះសំណាក់ អូខេដេ ពីមុខផ្សារណាត់ហើយនិងអនឡាញ, នៅដើមពុទ្រា ផ្សារបឹងឈូក ជិតកន្លែងបញ្ចូលហ្គាសក្រុងបាត់ដំបងខេត្តបាត់ដំបង ដែលមានគេស្គាល់ថាម្ចាស់អនឡាញទាំងអស់មានឈ្មោះលោក ខុម ដែលជាជំនួយការរបស់ឯកឧត្តម ឧត្តមសេនីយ៍ទោ ដាញ់ អេងប៊ុនចាន់ ស្នងការខេត្តបាត់ដំបង និងប្អូនប្រុសរបស់លោក ខុម ដែលឈ្មោះ តាក់ និងឈ្មោះ ខេង ហើយនិងឈ្មោះ តែន នាក់ទាំងនេះ សុទ្ធសឹងតែជាមេល្បែងដុះស្លែ។
ទន្ទឹមនឹងនោះក៏មានការលើកឡើងពីប្រជាពលរដ្ឋដោយពួកគាត់បានដាក់ចម្ងល់ថា កន្លងមកគាត់ធ្លាប់ឮថ្នាក់ដឹកនាំចេញបទបញ្ជាឱ្យបង្ក្រាបទាំងអស់រាល់ល្បែងស៊ីសងសូម្បីតែខលធ្យូនក្នុងទូរស័ព្ទក៏ឮដែរថាមិនឱ្យលេងល្បែងស៊ីសង និងបើកល្បែងស៊ីសងឡើយចុះហេតុអ្វីក៏នៅក្រុងបាត់ដំបង ខេត្តបាត់ដំបងនេះសម្បូរល្បែងស៊ីសងតាមអនឡាញបែបនេះ? ក្នុងនោះដែរក៏មានពលរដ្ឋខ្លះឆ្ងល់ទៀតថា មូលហេតុដែលគេមិនបង្ក្រាបប្រហែលជាគេត្រូវរ៉ូវគ្នាឬយ៉ាងណា? ពួកគាត់បន្ថែមទៀតថាបើមានល្បែងស៊ីសងច្រើនបែបនេះតើឯណាទៅពាក្យថាភូមិ-ឃុំមានសុវត្ថិភាព?
ជុំវិញករណីល្បែងស៊ីសងតាមអនឡាញទាំងប៉ុន្មានទីតាំងខាងលើនេះក្រុមអ្នកសារព័ត៌មានយើងបានបញ្ជូនរូបភាពទាំងនេះដើម្បីរាយការណ៍ជូនទៅលោក ពេជ្រ សារ៉ែន អធិការក្រុងបាត់ដំបងដែរតែបានត្រឹមឆ្លើយថា(ជាប់រវល់នៅភ្នំពេញ និងចាំឱ្យគេចុះទៅមើល)។ រីឯឯកឧត្តម ឧត្តមសេនីយ៍ទោ ដាញ់ អេងប៊ុនចាន់ ស្នងការនគរបាលខេត្តបាត់ដំបងវិញបានត្រឹមឆ្លើយថា (អរគុណ និងសុំរូបភាពទីតាំង) តែរហូតដល់ពេលនេះឃើញថាទីតាំងល្បែងទាំងនោះបើកលេងដដែល។
ជាការសំណូមពរនិងស្នើសុំដល់លោកឧត្តមសេនីយ៍ទោ ដាញ់ អេងប៊ុនចាន់ ស្នងការនគរបាលខេត្តបាត់ដំបង និងឯកឧត្តម សុខ លូ អភិបាលនៃគណៈអភិបាលខេត្តបាត់ដំបង សូមមេត្តាមានបទបញ្ជាចាត់វិធានការបង្ក្រាបទីតាំងល្បែងស៊ីសងទាំងអស់នេះផងទាន ដើម្បីចូលរួមថែរក្សានិងការពារសេចក្តីសុខ សុវត្ថិភាពជូនដល់ពួកគាត់ក្នុងការរស់នៅ ព្រោះថាបើមូលដ្ឋានណាដែលមានល្បែងស៊ីសងមូលដ្ឋាននោះមិនយូរទេនឹងកើតមានអំពើរចោរកម្មផ្សេងៗជាក់ជាមិនខាន ជាពិសេសដើម្បីចូលរួមអនុវត្តន៍នូវចរាចរណ៍ណែនាំរបស់ក្រសួងមហាផ្ទៃ.ស្តីពី. ការបញ្ឈប់ផ្សព្វផ្សាយល្បែងស៊ីសងខុសច្បាប់ និងអនុវត្តគោលនយោបាយ “ភូមិ-ឃុំ-សង្កាត់មានសុវត្ថិភាព” របស់ រាជរដ្ឋាភិបាល។
អង្គភាពសារព័ត៌មានយេីងខ្ញុំ គ្រាន់តែជាកញ្ចក់ឆ្លុះបញ្ចាំង ពីទិដ្ឋភាពសង្គម ផ្សាយចេញនូវព័ត៌មានពិត ស្របតាមក្រមសីលធម៌ វិជ្ជាជីវៈសារព័ត៌មាន ពុំបានមូលបង្កាច់បង្ខូចកេរ្ដិ៍ឈ្មោះ និងសេចក្ដីថ្លៃថ្នូរ សមត្ថកិច្ចនៅក្នុងខេត្តបាត់ដំបងនោះឡេីយ។
ជុំវិញការចុះផ្សាយខាងលើនេះប្រសិនបើមានប្រតិកម្មណាមួយពីសមត្ថកិច្ចនិងអ្នកពាក់ព័ន្ធនោះ.អង្គភាពសារព័ត៌មានយើងនឹងរងចាំទទួលធ្វើការបកស្រាយ បំភ្លឺគ្រប់ពេលវេលា នៅរៀងរាល់ម៉ោងធ្វើការ ស្តីពីច្បាប់របបនៃសារព័ត៌មានកម្ពុជាគឺឲ្យមានភាពសុក្រឹត្យ-និងយុត្តិធម៌តែប៉ុណ្ណោះសូមអរគុណ ៕
