នគរបាលស្រុកសំរោងទងឃាត់ខ្លួនជនសង្ស័យជាបន្តបន្ទាប់ចំនួន ៣នាក់ និងដកហូតម្សៅក្រាមព័ណ៌សថ្លាសង្ស័យជាគ្រឿងញៀនចំនួន ១០កញ្ចាប់..

ស្រុកសំរោងទង÷កម្លាំងជំនាញប្រឆាំងគ្រឿងញៀនស្រុកសំរោងទង បានឃាត់ខ្លួនជនសង្ស័យជាបន្តបន្ទាប់ ចំនួន ៣នាក់ ដែលជាមុខសញ្ញាជួញដូរដោយខុសច្បាប់នូវសារធាតុញៀន និងដកហូតម្សៅក្រាមព័ណ៌សថ្លាសង្ស័យជាគ្រឿងញៀនចំនួន ១០កញ្ចាប់ ស្ថិតនៅភូមិព្រៃរំដូល ឃុំសែនដី ស្រុកសំរោងទង ខេត្តកំពង់ស្ពឺ។

លោកវីរៈសេនីយ៍ឯក ឃុត សុផល អធិការនគរបាលស្រុកសំរោងទងបានឲ្យដឹងថាដោយអនុវត្តន៍តាមបទបញ្ជាលោក ឧត្ដម សេនីយ៍ទោ ឃឹម សុកខៃ ស្នងការនគរបាលខេត្តកំពង់ស្ពឺ នៅថ្ងៃទី ១១ ខែកក្កដា ឆ្នាំ២០២៥ វេលាម៉ោង ១៣ និង ៥នាទី កម្លាំងជំនាញប្រឆាំងគ្រឿងញៀនស្រុក ចុះល្បាតបានឃាត់ខ្លួនមុខសញ្ញាជួញដូរដោយខុសច្បាប់នូវសារធាតុញៀនចំនួន ៣ នាក់÷
១.ឈ្មោះ យ៉ុង ចិត្ត ភេទ ប្រុស អាយុ ៣១ ឆ្នាំ នៅភូមិព្រៃរំដួល ឃុំសែនដី ស្រុកសំរោងទង ខេត្តកំពង់ស្ពឺ។ និងដកហូតវត្ថុតាង: ១.ម្សៅក្រាមព័ណ៌សថ្លាសង្ស័យជាគ្រឿងញៀនចំនួន ៣ កញ្ចប់ (មធ្យម ១ , តូច ២) ២.ទូរស័ព្ទដៃ ១គ្រឿង និងម៉ូតូ ១គ្រឿង ។

បើតាមចម្លើយរបស់ឈ្មោះ យ៉ុង ចិត្ត បានបន្តឃាត់ឈ្មោះ ឆេង ចាន់ណា ហៅ រស្មី អាយុ ៣៩ ឆ្នាំ ឃាត់នៅចំណុចភូមិស្រែត្រោក ឃុំសែនដី ស្រុកសំរោងទង ខេត្តកំពង់ស្ពឺ។ និងបានដកហូត: ១.រឿងញៀនចំនួន ៤កញ្ចប់ (មធ្យម ១,តូច ៣) ២.ទូរស័ព្ទដៃ ១គ្រឿង។

បើតាមចម្លើយរបស់ឈ្មោះ ឆេង ចាន់បានបន្តឃាត់ឈ្មោះ គុជ ជីវ័ន្ត ហៅ ពៅ អាយុ ៣៥ឆ្នាំ ឃាត់នៅចំណុចភូមិអង្គមេត្រី ឃុំរលាំងគ្រើល ស្រុកសំរោងទង ខេត្តកំពង់ស្ពឺ និងបានដកហូត÷ ១.គ្រឿងញៀនចំនួន ៣ កញ្ចប់មធ្យម, ២.ទូរស័ព្ទដៃចំនួន ២គ្រឿង និងជញ្ជីងអេឡិចត្រូនិចសម្រាប់ថ្លឹងគ្រឿង ១គ្រឿង។

លោកអធិការបានបន្ថែមទៀតថា ក្នុងប្រតិបត្តិការចុះល្បាតនិងបង្ក្រាបនោះកម្លាំងជំនាញបានឃាត់ខ្លួនមុខសញ្ញាជនសង្ស័យសរុបចំនួន ៣នាក់ ប្រុស និងម្សៅក្រាមព័ណ៌សថ្លាសង្ស័យជាគ្រឿងញៀនចំនួន ១០ កញ្ចប់ (មធ្យម ៥ ,តូច ៥),ទូរស័ព្ទដៃចំនួន ៤ គ្រឿង,ម៉ូតូ ១ គ្រឿង និងជញ្ជីងអេឡិចត្រូនិចសម្រាប់ថ្លឹងគ្រឿងញៀន ១ គ្រឿង ។

បច្ចុប្បន្នជនសង្ស័យរួមនិងវត្ថុតាមខាងលើនេះកម្លាំងជំនាញកំពុងសាកសួរកសាងសំណុំរឿងចាត់ការតាមនីតិវិធី៕