ខេត្តកំពង់ស្ពឺ÷ នៅថ្ងៃទី១២ ខែកក្កដា ឆ្នាំ២០២៥ មន្រ្តីក្រសួងបរិស្ថាន ដឹកនាំដោយ លោក អ៊ុង វុទ្ធី អនុប្រធាននាយកដ្ឋាន នៃអគ្គនាយកដ្ឋានគាំពារបរិស្ថាន បានចុះពិនិត្យរោងចក្រ កែច្នៃសន្លឹកថ្នាំជក់ កោះប៉ែន ស្ថិតនៅភូមិដំណាក់ពង្រ ឃុំព្រៃវិហារ ស្រុកគងពិសី ខេត្តកំពង់ស្ពឺ នឹងបានរកឃើញថាបានបង្កឱ្យមានភាពកខ្វក់ក្នុងខ្យល់ និងមិនមានលិខិតអនុញ្ញាតពាក់ព័ន្ធការគ្រប់គ្រងបរិស្ថាន។ ការចុះពិនិត្យនេះបន្ទាប់ពីមានសេចក្តីរាយការណ៍ពីប្រជាពលរដ្ឋ និងអាជ្ញាធរមូលដ្ឋាន ។
ប្រជាពលរដ្ឋ ដែលរស់នៅក្បែរតំបន់រោងចក្រ ក៏ដូចជាអាជ្ញាធរមូលដ្ឋាន បានបញ្ជាក់ដូចគ្នាថា ពិតជាមានក្លិនឈួលថ្នាំ ហើយម្តងម្កាលពិបាកទ្រាំ។ ពួកគាត់មានការព្រួយបារម្ភ ចំពោះការប៉ះពាល់ដល់សុខភាព។ ជាមួយគ្នានេះ ក្រុមការងារបានរកឃើញថារោងចក្រ បានបើកដំណើការតាំងពី ដើមឆ្នាំ២០២៥ ដោយពុំមានលិខិតអនុញ្ញាតពាក់ព័ន្ធការគ្រប់គ្រងបរិស្ថាន ពីមន្ទីរ ឬក្រសួងបរិស្ថាន។ ការទុកដាក់វត្ថុធាតុដើម ផលិតផល និងសំណល់ មិនបានត្រឹមត្រូវ បង្កឱ្យមានក្លិនទៅក្នុងបរិស្ថានដោយផ្ទាល់។ លើសពីនេះ រោងចក្រខាងលើមិនបានរៀបចំប្រព័ន្ធបច្ចេកទេសបរិស្ថាន ដូចជាប្រព័ន្ធបឺតធូលី និងការបំពាក់ឧបករណ៍កាត់បន្ថយក្លិនកខ្វក់។
ប្រឈមនឹងបញ្ហានេះ ក្រុមការងារជំនាញក្រសួងបរិស្ថាន បានអនុវត្តវិធានការមួយចំនួន៖
១-អគារផលិកម្មត្រូវរៀបចំ ជាបន្ទប់ខណ្ឌឱ្យដាច់ពីរវាង ផ្នែកផលិតកម្ម ផ្នែកស្តុកវត្ថុធាតុដើម និងផលិតផលសម្រេច។
២-ត្រូវបំពាក់ប្រព័ន្ធបឺតខ្យល់ និងឧបករណ៍ស្ទាក់ចាប់ធូលី និងក្លិនឱ្យបានគ្រប់គ្រាន់នៅផ្នែកផលិតកម្ម
-ធូលីដែលបានបឺតចេញពីច្រវ៉ាក់ផលិតកម្ម ត្រូវបញ្ចូលទៅក្នុងស៊ីឡូត្រឹមត្រូវ។
៣-និងត្រូវស្នើសុំលិខិតអនុញ្ញាតពាក់ព័ន្ធនឹងការគ្រប់គ្រងបរិស្ថាន ពីមន្ទីរ ឬក្រសួងបរិស្ថាន ដើម្បីអនុវត្តបទដ្ឋានបរិស្ថានឱ្យបានត្រូវត្រូវ។ ក្រុមការងារនឹងបន្តពិនិត្យនិងតាមដានការអនុវត្តវិធានការ ស្របទៅតាមក្រមបរិស្ថាននិងធនធានធម្មជាតិ៕
សូមបញ្ជាក់ថាកាលពីរសៀលថ្ងៃអង្គារទី០១ ខែកក្កដា ឆ្នាំ២០២៥ លោក ផាត សុផល និង លោក ញ៉េន មុន្នីរតនៈ អភិបាលរង នៃគណៈអភិបាលស្រុកគងពិសី បានដឹកនាំក្រុមការងារ មានការិយាល័យជំនាញ លោកមេឃុំព្រៃវិហារ មេភូមិដំណាក់ពង្រ (កក់អង្គុញ) កម្លាំងអធិការដ្ឋាននគរបាលស្រុក មេប៉ុស្តិ៍ឃុំព្រៃវិហារ ដើម្បីចុះត្រួតពិនិត្យទីតាំងរោងចក្រធុនតូចកែច្នៃសន្លឹកថ្នាំជក់កោះប៉ែន ស្ថិតនៅភូមិដំណាក់ពង្រ ឃុំព្រៃវិហារ ស្រុកគងពិសី ខេត្តកំពង់ស្ពឺ។ តែមិនឃើញមានចំណាត់ការអ្វីសោះ ខណៈរោងចក្រកែច្នៃសន្លឹកថ្នាំជក់ កោះប៉ែន នៅតែបន្តធ្វើសកម្មភាពផលិតនិងបំពុលបរិស្ថានធ្វើឲ្យជះក្លិនថ្នាំសាយភាយចេញមកក្រៅប៉ះពាល់សុខភាពនឹងការរស់នៅប្រជាពលរដ្ឋផងដែល៕
