#ស្រុកសំរោងទង÷នគរបាលស្រុកសំរោងទងដឹកនាំដោយលោកវីរៈសេនីយ៍ឯក ឃុត សុផល អធិការនគរបាលស្រុក ដោយអនុវត្ដតាមបទបញ្ជាពីលោកឧត្ដមសេនីយ៍ទោ ឃឹម សុកខៃ ស្នងការនគរបាលខេត្ដកំពង់ស្ពឺ នៅថ្ងៃទី១៤ ខែកក្កដា ឆ្នាំ២០២៥ កម្លាំងជំនាញផ្នែកប្រឆាំងគ្រឿងញៀនស្រុកសំរោងទង សហការជាមួយកម្លាំងការិយាល័យប្រឆាំងគ្រឿងញៀនខេត្ត បានចុះប្រតិបត្តិការអនុវត្តដីកាចំនួន ២ករណី បង្ក្រាបនិងឃាត់ខ្លួនមនុស្សចំនួន ២នាក់ នឹងបានដកហូតគ្រឿងញៀនចំនួន ៤កញ្ចប់ នៅខេត្តកំពង់ស្ពឺ។
លោកអធិការបានឲ្យដឹងទៀតថាការចុះអនុវត្តដីកាបង្គាប់ឲ្យចាប់ខ្លួនចំនួន ២ករណីនោះរួមមាន:
១)-ឈ្មោះ សន អ៊ួញ (ហៅ ផាត អ៊ួញ)ភេទប្រុស អាយុ២៦ឆ្នាំ នៅភូមិសំបួរ ឃុំមហាសាំង ស្រុកភ្នំស្រួច ខេត្តកំពង់ស្ពឺ តាមដីកាបង្គាប់ឲ្យចាប់ខ្លួន លេខ២៨០ ចុះថ្ងៃទី២៩ ខែមេសា ឆ្នាំ២០២៥ ចេញដោយលោកស្រី នាង ស៊ីណៃ ចៅក្រមស៊ើបសួរ នៃសាលាដំបូងខេត្ត ពីបទៈ ជួញដូរដោយខុសច្បាប់នូវសារធាតុញៀន ប្រព្រឹត្តនៅចំណុចភូមិសំបួរ ឃុំមហាសាំង ស្រុកភ្នំស្រួច ខេត្តកំពង់ស្ពឺ កាលពីថ្ងៃទី២១ ខែសីហា ឆ្នាំ២០២៤ ឃាត់ខ្លួននៅភូមិរំលិចត្នោត ឃុំវល្លិសរ ស្រុកសំរោងទង ខេត្តកំពង់ស្ពឺ ។
២)-ឈ្មោះ ឈិត ផា ភេទប្រុស អាយុ ២៩ឆ្នាំ នៅភូមិទួលសំណាង ឃុំវល្លិសរ ស្រុកសំរោងទង ខេត្តកំពង់ស្ពឺ តាមដីកាបង្គាប់ឲ្យចាប់ខ្លួននិងឃុំខ្លួន លេខ២៨២ ចុះថ្ងៃទី៣១ ខែឧសភា ឆ្នាំ២០២៤ ចេញដោយលោក អ៉ី ឋាវរៈ ចៅក្រមជំនុំជម្រះ នៃសាលាដំបូងខេត្តកំពង់ស្ពឺ ពីបទ:ជួញដូរដោយខុសច្បាប់នូវសារធាតុញៀន ប្រព្រឹត្តនៅចំណុចភូមិអង្គទម្លាប់ ឃុំសំរោងទង ស្រុកសំរោងទង ខេត្តកំពង់ស្ពឺ កាលពីថ្ងៃទី២៣ ខែតុលា ឆ្នាំ ២០២៣ ។
លោកវីរៈសេនីយ៍ឯក ឃុត សុផល អធិការនគរបាលស្រុកសំរោងទងបានបន្ថែមទៀតថាក្នុងប្រតិបត្តិការចុះបង្ក្រាបនោះកម្លាំងជំនាញផ្នែកប្រឆាំងគ្រឿងញៀនបានឃាត់ខ្លួនមនុស្សចំនួន ២នាក់ប្រុស និងធ្វើការដកហូតវត្ថុតាង ម្សៅក្រាមពណ៌សថ្លាសង្ស័យជាគ្រឿងញៀនចំនួន ៤កញ្ចប់(ធំ៣ មធ្យម១) ទូរស័ព្ទដៃចំនួន ២គ្រឿង និងជញ្ជីងអេឡិចត្រូនិចសម្រាប់ថ្លឹងគ្រឿងញៀន ១គ្រឿង និងវិចខ្ចប់គ្រឿងញៀនមួយចំនួន ។
បច្ចុប្បន្នជនសង្ស័យទាំង២នាក់ រួមនឹងវត្ថុតាង ត្រូវបានកម្លាំងសមត្ថកិច្ចបានធ្វើការសាកសួរ និងកសាងសំណុំរឿងបញ្ជូនទៅការិយាល័យប្រឆាំងបទល្មើសគ្រឿងញៀន ដើម្បីចាត់ការបន្តតាមនីតិវិធីបន្ត៕
