ខេត្តកំពង់ស្ពឺ៖ នាថ្ងៃចន្ទ ១១រោច ខែអាសាឍ ឆ្នាំម្សាញ់ សប្តស័ក ព.ស. ២៥៦៩ ត្រូវនឹង ថ្ងៃទី២១ ខែកក្កដា ឆ្នាំ២០២៥ នៅទីតាំងដុតបំផ្លាញគ្រឿងញៀន ទីលានភូមិតាម៉ល់ ដោយមានការអញ្ជេីញពីឯកឧត្តម បណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ និងជាគណកម្មាធិការត្រួតពិនិត្យគ្រឿងញៀនថ្នាក់ខេត្ត ឯកឧត្ដម យឹម សុខុម ប្រធានក្រុមប្រឹក្សាខេត្ដ ឯកឧត្ដម សុិន វិរៈ ព្រះរាជអាជ្ញា ឯកឧត្តម ប្រធានសាលាដំបូងខេត្តកំពង់ស្ពឺ ឯកឧត្ដម លោកជំទាវ មេបញ្ជាការកងកំលាំងប្រដាប់អាវុធទាំង៣ប្រភេទ លោក លោកស្រី ប្រធានមន្ទីរ ជុំវិញខេត្ដ លោក អភិបាលបាលក្រុង / ស្រុក កងកម្លាំងប្រដាប់អាវុធ សិស្ស យុវជន ប្រជាពលរដ្ឋ រួមជាមួយ ព្រះសង្ឍ ។ ល។
ក្នុងពិធីនេះ ឯកឧត្ដមអភិបាលខេត្ដ បានអំពាវនាវគ្រប់ភាគីពាក់ព័ន្ធឱ្យរួមគ្នាបង្ការ ទប់ស្កាត់ និងកាត់ផ្ដាច់ឫសគល់នៃបញ្ហាគ្រឿងញៀននៅកម្ពុជា។ការអំពាវនាវដូចនេះធ្វើឡើងក្នុងពិធីដុតបំផ្លាញគ្រឿងញៀនថ្នាក់ខេត្តជាង ៤គីឡូក្រាម ថ្ងៃទី២១ ខែកក្កដា ឆ្នាំ២០២៥ ។
ការដុតបំផ្លាញចោលគ្រឿងញៀនដែលបានពីការរឹបអូសគ្រប់រូបភាពគឺជាសក្ខីភាពមួយដែលបានបង្ហាញ យ៉ាងប្រត្យក្សនៃការប្រឆាំងការដូញដូរគ្រឿងញៀនដោយខុសច្បាប់ ហើយក្នុងរូបភាពនេះ បានជំរុញសកម្មភាពយុទ្ធនាការដ៏មហាឡោរិក និងផុសផុលពីការចូលរួមពីគ្រប់វិស័យពាក់ព័ន្ធ ពិសេសបង្ហាញពីស្មារតីរួម និងចលនាជាតិមួយចូលរួមទាំងអស់គ្នាដើម្បីជីវិត និងសហគមន៍គ្មានគ្រឿងញៀន។
ឯកឧត្ដម ជាម ច័ន្ទសោភ័ណ បានគូសបញ្ជាក់ថា រាជរដ្ឋាភិបាលនីតិកាលទី៧ បានដាក់ចេញនូវផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ ក្នុងនោះគ្រប់ក្រសួងស្ថាប័ន និងរដ្ឋបាលថ្នាក់ក្រោមជាតិទាំងអស់ត្រូវអនុវត្តគោលការណ៍សម្អាតចកចេញពីបឹងរបស់សម្តេចធិបតី តាមរយៈការបន្តធ្វើតេស្តរកសារធាតុញៀនចំពោះមន្ត្រីរាជការស៊ីវិល និងកងកម្លាំងប្រដាប់អាវុធជាប់ជាប្រចាំ ដើម្បីរក្សាភាពស្អាតស្អំ និងអភិបាលកិច្ចល្អក្នុងស្ថាប័នរដ្ឋ។
ឯកឧត្ដមក៏បានក្រើនរំឭកបន្ថែមដល់គ្រប់ភាគីពាក់ព័ន្ធបន្តស្មារតីរួបរួម និងចលនាជាតិមួយចាប់ពីពេលនេះតទៅ ដើម្បីយ៉ាងណាកាត់ផ្តាច់ឱ្យបាននូវឫសគល់នៃបញ្ហាគ្រឿងញៀន ផ្សព្វផ្សាយ អប់រំ ពីផលប៉ះពាល់នៃគ្រឿងញៀន ក្លាយជាទំនៀមទម្លាប់ប្រពៃណីមួយក្នុងសង្គមខ្មែរ ពោលគឺ ចាប់ផ្ដើមពីគ្រួសារមួយរហូតដល់សាលារៀន កន្លែងធ្វើការ នៅតាមព្រឹត្តិការណ៍ធំៗ ពិធីបុណ្យទាននានា និងគ្រប់វេទិកាទាំងអស់ ដើម្បីឱ្យប្រជាពលរដ្ឋខ្មែរមានជំនឿចិត្តក្នុងខ្លួនថា ខ្លួននឹងមិនពាក់ព័ន្ធជាដាច់ខាតទៅនឹងគ្រឿងញៀន។ ទន្ទឹមនេះយុវជន យុវនារីត្រូវទាញយក និងប្រើប្រាស់កម្មវិធីទូរសព្ទដៃNoDrug ដើម្បីធ្វើជាភ្នែក ច្រមុះ និងត្រចៀករបស់សមត្ថកិច្ច ក្នុងការរាយការណ៍ពីសកម្មភាពនានានៃគ្រឿងញៀនក្នុងសហគមន៍៕
#រូបភាពនិងអត្ថបទស្នងការដ្ឋាននគរបាលខេត្ដកំពង់ស្ពឺ
