កំពង់ស្ពឺ៖ ថ្ងៃទី២៤ ខែកក្កដា ឆ្នាំ២០២៥-ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈ អភិបាលខេត្តកំពង់ស្ពឺ អញ្ជើញដឹកនាំកិច្ចប្រជុំស្តីពីការរៀបចំ គម្រោងចំណូលថវិកា របស់មន្ទីរជំនាញសម្រាប់ការ គ្រប់គ្រង ឆ្នាំ២០២៦ ។ កិច្ចប្រជុំនេះធ្វើឡើងនៅសាលប្រជុំសាលាខេត្តកំពង់ស្ពឺ ដោយមានការចូលរួមពីលោក លោកស្រី អភិបាលរងខេត្ត លោក លោកស្រី ប្រធានមន្ទីរ អង្គភាពពាក់ព័ន្ធ និងមន្រ្តីជំនាញ នៃរដ្ឋបាលខេត្ត ផងដែរ។
ដោយយោងតាមសារាចរណែនាំ លេខ ០៨ ស.រ ចុះថ្ងៃទី២០ ខែឧសភា ឆ្នាំ២០២៥ របស់រាជរដ្ឋាភិបាលកម្ពុជា ស្តីពីការរៀបចំ ផែនការយុទ្ធសាស្ត្រថវិកាឆ្នាំ ២០២៦-២០២៨ និងការរៀបចំ សេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០២៦។ ផ្អែកតាមកម្មវត្ថុនេះ ក្រសួងសេដ្ឋកិច្ច និងហិរញ្ញវត្ថុ បានជម្រាបជូនដល់រដ្ឋបាលរាជធានី-ខេត្ត មន្ទីរសេដ្ឋកិច្ចនិង ហិរញ្ញវត្ថុ រាជធានី-ខេត្ត ប្រធានពន្ធដាររាជធានី-ខេត្ត សូមធ្វើការ កំណត់ជាបឋមកញ្ចប់ថវិកា ជូនរដ្ឋបាលខេត្ត នូវចំណូល សារពើពន្ធ ចំណូលមិនមែនសារពើពន្ធ និងចំណូលឧបម្ភត្ថពី ថវិកាជាតិផងដែរ។
ឯកឧត្តមបណ្ឌិតអភិបាលខេត្ត បានបញ្ជាក់ថា កញ្ចប់ថវិកានេះគឺគ្រាន់តែ កំណត់ជាបណ្តោះអាសន្នប៉ុណ្ណោះ ហើយកញ្ចប់ថវិកាបឋមនេះ រដ្ឋបាលខេត្តអាចរៀបចំ គម្រោងថវិការបស់ខ្លួនទៅតាម ការប្រែប្រួល នៃសក្តានុពលក្នុងការប្រមូលចំណូលតាម ស្ថានភាពសេដ្ឋកិច្ចដែលមានជាក់ស្តែងនៅក្នុងមូលដ្ឋានរបស់ ខ្លួន។
នាឱកាសនោះដែរ ឯកឧត្តមបណ្ឌិត ជាម ច័ន្ទសោភ័ណ ក៏បានស្នើឱ្យ ថ្នាក់ដឹកនាំ មន្ទីរ អង្គភាពនីមួយៗដែលពាក់ព័ន្ធត្រូវបង្កើនស្មារតី យកចិត្តទុកដាក់ក្នុងការប្រមូលឱ្យមានប្រសិទ្ធភាព គ្រប់ប្រភព ចំណូលចូល សម្រាប់បន្តការអភិវឌ្ឍហេដ្ឋារចនាសម្ព័ន្ធនិង សេដ្ឋកិច្ចសង្គមនៅក្នុងខេត្តសំដៅបម្រើប្រយោជន៍សាធារណៈ ក៏ដូចជាប្រជាពលរដ្ឋ បានកាន់តែប្រសើរឡើងថែមទៀត៕
