ខេត្តកំពង់ស្ពឺ÷ ក្រុមជនឆ្លៀតឱកាសលួចដាក់គ្រឿងចក្រជាច្រើនធ្វើសកម្មភាពជីះកាយដកយកអាចម៍ដីចេញពីក្នុងបឹងប្រវត្តិសាស្ត្រមួយកន្លែងដឹកយកទៅលក់ធ្វើអាជីវកម្មផ្ទាល់ខ្លួន យ៉ាងណាធិបតេយ្យ ខណៈទីតាំងខាងលើត្រូវបានមន្ត្រីជំនាញចុះទៅហាមឃាត់.បិទនិងបានធ្វើកំណត់ហេតុរួចហើយនោះ តែក្រុមជនជាតិឱកាសនៅតែបន្តលួចធ្វើអាជីវកម្ម កេងចំណេញលើពន្ធសួយសាររបស់រដ្ឋ ជាហេតុធ្វើឲ្យបាត់ចំណូលចូលរដ្ឋ។
សូមបញ្ជាក់ថាបឹងប្រវត្តិសាស្ត្រមួយកន្លែងនេះនៅត្រង់ចំណុចទំនប់ចាន់ថ្នាល ស្ថិតនៅភូមិត្រពាំងកក់ ឃុំក្រាំងចេក ស្រុកសាមគ្គីមុន្នីជ័យ ខេត្តកំពង់ស្ពឺ ដែលក្រុមជនឆ្លៀតឱកាសកំពុងដាក់គ្រឿងចក្រជីះកាយដកយកអាចម៍ដីដឹកចេញទៅលក់ធ្វើអាជីវកម្មផ្ទាល់ខ្លួន ដោយគ្មានការ រំខានពីសមត្ថកិច្ចជំនាញពាក់ព័ន្ធនៅក្នុងខេត្តកំពង់ស្ពឺនោះទេ ម្យ៉ាងទៀតក្រុមឡានដឹកជញ្ជូននោះមើលទៅមិនមានលក្ខណៈបច្ចេកទេសមិនបានក្រូបឱ្យបានត្រឹមត្រូវមុននឹងដឹកចេញ ករណីនេះមហាជនមានការសង្ស័យថាប្រហែលអាជ្ញាធរ និងមន្ត្រីជំនាញពាក់ព័ន្ធមួយចំនួនក្នុងខេត្តកំពង់ស្ពឺបានសើមមាត់សើមកហើយ ទើបមិនឃើញចុះទៅធ្វើការទប់ស្កាត់សោះ។
ជុំវិញក្រុមជនឆ្លៀតឱកាសដាក់លួចគ្រឿងចក្រជាច្រើនបានធ្វើសកម្មភាពជីះកាយដកយកអាចម៍ដីចេញពីក្នុងបឹងប្រវត្តិសាស្ត្រខាងលើនេះដែលនៅរសៀលថ្ងៃទី២៤ ខែកក្កដា ឆ្នាំ២០២៥ លោក ចឹក ឈឿន មេឃុំក្រាំងចេក បានប្រាប់ក្រុមការងារសារព័ត៌មានយើងតាមទូរស័ព្ទថា លោកមិនបានទទួលលិខិតអនុញ្ញាតិអ្វីនោះទេ គឺម្ចាស់គ្រឿងចក្រ បានមកសុំលោកដែរ តែលោកប្រាប់ថា សួទៅខាងស្រុកទៅ ស្រាប់តែទៅបាត់ ហើយប៉ុន្មានថ្ងៃនេះឮថាហ៊ានយកគ្រឿងចក្រមកជីះកាយយកអាចម៍ដីដឹកលក់ជាច្រើនថ្ងៃទៅហើយ លោកបានបន្តទៀតថា ស្អែកនេះលោកនឹងដឹកនាំកម្លាំងចុះទៅធ្វើការ។
ដោយឡែកលោក ណុប ផាន់ណា ទទួលបន្ទុករ៉ែនិងថាមពលខេត្តកំពង់ស្ពឺ លោកថាទីតាំងខាងលើគឺមានអាជ្ញាប័ណ្ណរបស់ក្រសួង ហើយក្រសួងបានបិទ តែគាត់នៅតែបន្តទៅធ្វើ ហើយក្រុមការងាររបស់មន្ទីរបានចុះទៅហាមឃាត់បិទនិងបានធ្វើកំណត់ហេតុរួចហើយដែរ។
លោកបានបន្តទៀតថាបើទីតាំងខាងលើនៅតែបន្តធ្វើទៀតលោកនឹងចុះទៅពិនិត្យម្ដងទៀតព្រោះទីតាំងខាងលើនេះត្រូវបានបិទហើយ សូមអរគុណ។
ជាការសំណូមពរ និងស្នើសុំដល់ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ សូមឯកឧត្តមមេត្តាជួយពិនិត្យមើលបឹងប្រវត្តិសាស្ត្រមួយកន្លែងនេះផងត្រូវបានក្រុមជនឆ្លៀតឱកាសដែលតែងតែលួចដាក់គ្រឿងចក្រជីះកាយដកយកអាចម៍ដីដឹកលក់ធ្វើអាជីវកម្មផ្ទាល់ខ្លួនកេងចំណេញលើពន្ធសួយសាររបស់រដ្ឋដោយមិនខ្លាចញញើតនិងច្បាប់អ្វីបន្តិចសោះ និងចាត់វិធានការតាមផ្លូវច្បាប់ទៅលើមន្ត្រីពាក់ព័ន្ធមួយចំនួនដែលតែងតែមានការលួចឃុបឃិតគ្នាជាប្រព័ន្ធជាមួយនឹងក្រុមជនឆ្លៀតឱកាសធ្វើឲ្យមានការបាត់បង់ពន្ធចំណូលចូលរដ្ឋដ៏ធ្ងន់ធ្ងរខាងលើនេះផង៕
