កំពង់ស្ពឺ៖ រសៀល ថ្ងៃទី២៩ ខែកក្កដា ឆ្នាំ២០២៥-ឯកឧត្តម យឹម សុខុម ប្រធានក្រុមប្រឹក្សាខេត្ត ឯកឧត្តមបណ្ឌិត ជាម ច័ន្ទសោភ័ណ អភិបាល នៃគណៈអភិបាលខេត្តកំពង់ស្ពឺ និងលោកជំទាវ បានដឹកនាំគណៈប្រតិភូ មន្ត្រីរាជាការនៃរដ្ឋបាលខេត្ត និងសប្បុរសជននាំយកអំណោយ ដែលកើតចេញពីទឹកចិត្តរបស់បងប្អូនប្រជាពលរដ្ឋទូទាំងខេត្តកំពង់ស្ពឺ យកទៅផ្ដល់ជូនដល់បងប្អូនខ្មែរភៀសសឹកដែលកំពុងនៅទីទួលនៅតំបន់មានសុវត្តិភាព ក្នុងស្រុកវាលវែង ខេត្តពោធិ៍សាត់ ក្នុងនោះមានខីតចំនួន១០០០ ចែកជូនចំនួន២ទីតាំង ស្មើរចំនួន៧០០គ្រូសារ សល់៣០០ខីតទៀតប្រគល់ជូន ឯកឧត្តមអភិបាលខេត្តពោធិសាត់ ជូនដល់កងទ័ពជួរមុខបន្ត។
ឆ្លៀតក្នងឱកាសនោះដែរ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្ត បានមានប្រសាសន៍ថា បងប្អូនប្រជាពលរដ្ឋក្នុងខេត្តកំពង់ស្ពឺ បាននាំគ្នាចូលរួមចំណែកចូលជារួមជាថវិកា និងសម្ភារៈមកផ្ដល់ជូនតាមរយះរដ្ឋបាលខេត្ត ដើម្បីយកបន្តទៅផ្ដល់ជូន ដល់បងប្អូនខ្មែរភៀសសឹក ដែលកំពុងនៅទីទួលនៅតំបន់មានសុវត្តិភាព ហើយវរៈកងទ័ពនៅសមរភូមិជួរមុខដែលកំពុងតែប្រយុទ្ធជាមួយកងទ័ពឈ្លានពានទឹកដីកម្ពុជា ឯកឧត្តមបានសម្តែងនូវការអរគុណចំពោះមន្ត្រីរាជការ ជាពិសេសបងប្អូនប្រជាពលរដ្ឋក្នុងខេត្តកំពង់ស្ពឺ ដែលមានទឹកចិត្តស្នេហាជាតិដោយបានចំណាយនូវធនធានផ្ទាល់ខ្លួនទាំងថវិកា និងសម្ភារៈ ស្បៀងអាហារដល់បងប្អូនជនភៀសសឹក ដែលជាទឹកចិត្តស្នេហាជាតិរបស់បងប្អូនប្រជាពលរដ្ឋគឺជាកម្លាំងចិត្តដ៏មោះមុតចំពោះរាជរដ្ឋាភិបាល ជាពិសេសបងប្អូនកងកម្លាំងប្រដាប់អាវុធដែលកំពុងតស៊ូប្រយុទ្ធនៅសមរភូមិ ហើយយើងទាំងអស់គ្នាសូមបួងសួងដល់ទេវតាជួយបីបាច់ថែរក្សាដល់បងប្អូនកងទ័ពនៅសមរភូមិជួរមុខឲ្យទទួលជ័យជម្នះលើសត្រូវឈ្លានពាន និងការពារបូរណភាពនិងទឹកដីរបស់កម្ពុជាឲ្យបានរុងរឿងទៅមុខទៀត។
